Sendvulelo
INcwadzi yaMormon ingumculu wemibhalo lengcwele lecatsaniswa neliBhayibheli. Ingumbhalo wetento taNkulunkulu nalabebahlala eMelika endvulo futsi icuketse leliphelele livangeli laphakadze.
Lencwandzi yabhalwa baphrofethi labaningi basendvulo ngamoya wekuphrofetha kanye newekwembulelwa. Emavi abo abhalwe kubongcwengcwe beligolide, acashunwa futsi afinyetwa ngumphrofethi longumlandzi lobitwa ngaMormon. Lombhalo uniketa umlandvo wetive letimbili letinkhulu. Sinye sasuka eJerusalema ngemnyaka wa 600 ngaphambi kwekutalwa kwaKhristu futsi muva sahlukana saba tive letimbili, letatiwa ngekutsi ngemaNefi kanye nemaLamani. Lesinye sasuka kudzala kakhulu ngesikhatsi iNkhosi iphambanisa tilimi eMbhoshongweni waseBhabheli. Lelicembu latiwa ngekutsi ngemaJaredi. Emvakwetinkhulungwane teminyaka, tonkhe tabhujiswa ngaphandle kwemaLamani, futsi wona angulabanye bokhokho bemaNdiya aseMelika.
Sigigaba lesikhulu kakhulu lesibhaliwe eNcwadzini yaMormon bufundisi beNkhosi Jesu Khristu lucobo emkhatsini wemaNefi masinyane nje emvakwekuvuka kwayo. Sibeka ngalokusobala timfundziso telivangeli, sicacisa ngelisu lensindziso, futsi sitjela bantfu kutsi kufanele benteni kute bazuze kuthula kulemphilo kanye nensindziso yaphakadze emphilweni letako.
Emvakwekutsi Mormon asayicedzile imibhalo yakhe, umlandvo wawuniketa indvodzana yakhe Moroni, leyangeta emavi ayo lambalwa futsi yabafihla bongcwengcwe eGcumeni iKumora. Ngemhlaka 21 eNyonini, 1823, yena kanye loyo Moroni, ngaleso sikhatsi lobekasengumuntfu lokhatimulisiwe, lovukile, wavela kumPhrofethi Joseph Smith futsi wamfundzisa macondzana nembhalo wasendvulo kanye nekumiselwa kwawo kuhunyushelwa elulwimini lwesiNgisi.
Ekugcineni bongcwengcwe banikwa Joseph Smith, lowabahumusha ngesipho kanye nangemandla aNkulunkulu. Lombhalo manje ukhishwa ngetilwimi letiningi njengebufakazi lobusha kanye nalobungetiwe bekutsi Jesu Khristu uyiNdvodzana yaNkulunkulu lophilako futsi nekutsi bonkhe labatawuta Kuye futsi nalabahlonipha imitsetfo kanye nemisimeto yelivangeli Lakhe bangasindziswa.
Mayelana nalombhalo umPhrofethi Joseph Smith watsi: “Ngabatjela bomnaketfu kutsi iNcwadzi yaMormon beyingulecondze kakhulu kunanoma nguyiphi lenye incwadzi emhlabeni, futsi isisekelo senkholo yetfu, futsi umuntfu uyawuba sedvutane naNkulunkulu ngekugcina imiyalo yayo, ngetulu kwanoma nguyiphi lenye incwadzi.”
Ngaphandle kwaJoseph Smith, iNkhosi yalungisela labanye labalishumi nakunye kutsi bababone ngekwabo bongcwengcwe beligolide futsi babe bofakazi labakhetsekile beliciniso kanye nekutsi iNcwadzi yaMormon ivela kuNkhulunkulu. Bufakazi babo lobubhaliwe bufakiwe lapha njenge “buFakazi baboFakazi labaTsatfu” kanye “nebuFakazi baboFakazi labasiPhohlongo.”
Simema bonkhe bantfu noma ngukuphi kutsi bayifundze iNcwadzi yaMormon, bazindle etinhlitiyweni tabo ngemlayeto lewucuketse, futsi emvakwaloko babute Nkulunkulu, Babe waPhakadze, egameni laKhristu kutsi ngabe lencwadzi iliciniso na. Labo labalandzela lendlela baphindze babute ngelukholo batawuzuza bufakazi bebuciniso bayo kanye nekutsi ivela kuNkulunkulu ngemandla aMoya loNgcwele. (Buka Moroni 10:3–5.)
Labo labazuza lobu bufakazi baNkulunkulu lobuvela kuMoya loNgcwele batawuphindza bati ngawo lawo mandla kutsi Jesu Khristu nguMsindzisi wemhlaba, nekutsi Joseph Smith ungumambuli kanye nemphrofethi Wakhe kuleti tinsuku tekugcina, kanye nekutsi Libandla LaJesu Khristu Lalabangcwele Betinsuku Tekugcina lingumbuso weNkhosi lophindze wamiswa emhlabeni, kulungiselela Kuta kwesiBili kwaMesiya.