Inchazelo Lemfishane ngeNcwadzi yaMormon

INcwadzi yaMormon ingumbhalo longcwele webantfu baseMelika yasendvulo futsi wawucoshwe emakhasini ensimbi. Imitfombo lokutsatfwe kuyo lombhalo ngulena:

1. Bongcwengcwe baNefi, labebahlukene kabili: bongcwengcwe labancane kanye nabongcwengcwe labakhulu. Bekucala bebagcile kakhulukati etintfweni takamoya kanye nebufundisi kanye netimfundziso tebaphrofethi, bese kutsi tekugcina tona tatiphatselene kakhulukati nemlandvo walabo bantfu lokukhulunywa ngabo (1 Nefi 9:2–4). Kodvwa kusukela esikhatsini saMosiya, bongcwengcwe labakhulu nabo bebafaka tintfo letibaluleke kakhulu ngekwakamoya.

2. Bongcwengcwe baMormon, labacuketse lokufinyetwe nguMormon kusuka kubongcwengcwe labakhulu baNefi, kanye netinchazelo letiningi. Laba bongcwengcwe futsi bacuketse kuchubeka kwemlandvo lokwentiwa nguMormon kanye netengeto letentiwa yindvodzana yakhe Moroni.

3. Bongcwengcwe ba-Etere, labaniketa umlandvo wemaJaredi. Lombhalo wafinyetwa nguMoroni, lowafaka tinchazelo takhe futsi wawuhlanganisa umbhalo kanye nemlandvo wonkhe ngaphansi kwesihloko lesitsi “INcwadzi ya-Etere.”

4. Bongcwengcwe beliTfusi labaletfwa bantfu bakaLehi basuka eJerusalema ngemnyaka wa 600 ngaphambi kwekutalwa kwaKhristu. Laba bebacuketse “tincwadzi letisihlanu taMosi, … futsi kanjalo nembhalo wemaJuda kusukela ekucaleni, … kwehla njalo kuya ekucaleni kwekubusa kwaSedekiya, inkhosi yakaJuda; kanjalo netiphrofetho tebaphrofethi labangcwele” (1 Nefi 5:11–13). Lokuningi kucashunwe kubo laba bongcwengcwe, lokuphatselene na-Isaya, kanye nebaphrofethi belibhayibheli nalokungesibo belibhayibheli, tiyavela eNcwadzini yaMormon.

INcwadzi yaMormon icuketse tincenye noma tigaba letimcoka letilishumi nesihlanu, letatiwa njengetincwadzi, ngaphandle kwayinye, imvamisa letibitwa ngemcambi wato lomkhulu. Incenye yekucala (tincwadzi tekucala letisitfupha, letigcina nga-Omini) ikuhunyushwa lokusuka kubongcwengcwe labancane baNefi. Emkhatsini wencwadzi ya-Omini kanye neyaMosiya kunalokufakiwe lokubitwa ngekutsi ngemaVi aMormon. Loku lokufakiwe kuhlanganisa umbhalo locoshwe kubongcwengcwe labancane kanye nalokufinyetwe nguMormon kubongcwengcwe labakhulu.

Incenye lendze kakhulu, kusukela kuMosiya kuya kuMormon sehluko 7, kukuhunyushwa lokufinyetiwe kwaMormon kwabongcwengcwe labakhulu baNefi. Incenye leyisiphetfo, kusuka kuMormon sehluko 8 kuya ekugcineni kwemculu, yacoshwa yindvodzana yaMormon Moroni, lokwatsi emvakwekucedza umbhalo wemphilo yeyise, wenta lokufinyetiwe ngembhalo wemaJaredi (njengencwadzi ya-Etere) futsi lokwatsi ngemuva wangeta tincenye letatiwa ngekutsi yincwadzi yaMoroni.

Ngemnyaka noma cishe ngemnyaka wa 421 emvakwekutalwa kwaKhristu, Moroni, longumphrofethi longumlandzi wekugcina kumaNefi, wawuvala umbhalo longcwele futsi wawufihla eNkhosini, kute ukhishwe etinsukwini tekugcina, njengoba kwakuphrofethiwe ngelivi laNkulunkulu ngebaphrofethi Bakhe basendvulo. Ngemnyaka wa 1823 emvakwekutalwa kwaKhristu, yena kanye Moroni, ngaleso sikhatsil lobekasengumuntfu lovukile, wavakashela umPhrofethi Joseph Smith futsi muva wabaletsa bongcwengcwe labacoshiwe kuye.

Mayelana naloluhlelo lolu: Sihloko selikhasi lekucala, lesita nje ngaphambi kwelikhasi lelinalokucuketfwe, sitsatswe kubongcwengcwe futsi siyincenye yembhalo longcwele. Tendvulelo letingakabhalwa ngemagama latjekile, njengaku Nefi wekucala kanye nangaphambi nje kwesehluko 9 saMosiya, nato tiyincenye yembhalo longcwele. Leto tendvulelo letibhalwe ngemagama latjekile, njengaleto letisekucaleni kwetehluko, atikatsatfwa embhalweni wekucala kodvwa titinsita letentelwe kutsi umuntfu afundze kalula.

Lamanye emaphutsa lamancane embhalweni achutjekisiwe etinhlelweni letendlulile teNcwadzi yaMormon lekhishwe ngesiNgisi. Lolu luhlelo lucuketse kulungisa lokubonakala kufanele ekwenteni umsebenti wemukeleke emibhalweni lebeyingakashicilelwa kanye netinhlelo tekucala letatihlelwe ngumPhrofethi Joseph Smith.