Sehluko 14
Isaya ukhuluma njengaMesiya—Kwedzelelwa kanye nekuhlupheka kwaMesiya kuyashiwo—Wenta umphefumulo Wakhe ube ngumnikelo wesono futsi uncengela toni—Catsanisa na-Isaya 53. Cishe ngemnyaka wa 148 ngaphambi kwekutalwa kwaKhristu.
1 Yebo, Isaya akashongo yini kutsi: Ngubani lokholwe ngumbiko wetfu, futsi umkhono weNkhosi wembulelwe bani na?
2 Ngoba uyawukhula phambi kwakhe njengelihlumela lelitsambile, futsi nanjengemphandze lephuma emhlabatsini lowomile; akanasimo noma buhle; futsi ngesikhatsi sesimbona kute buhle lesiyobe sesibufuna kute simtsandze.
3 Udzelelwe futsi waliwa bantfu; umuntfu wetinsizi, futsi lowatiko ngekuhlupheka; futsi sibufihlile buso betfu kuye; wadzelelwa, futsi asimatisanga.
4 Ngempela utetfwele tinsizi tetfu, futsi wakwetjatsa kuhlupheka kwetfu; kodvwa tsine sayitsatsa ngekutsi umukuliwe, ushaywe nguNkulunkulu, futsi uhlushiwe.
5 Kodvwa walinyatwa ngenca yetiphambeko tetfu, futsi wafihlitwa ngenca yekona kwetfu, sijeziso saba setikwakhe; futsi ngemanceba emivimbo yakhe siyaphiliswa.
6 Sonkhe, njengetimvu, sidukile; nguloyo naloyo utihambela endleleni yakhe; futsi iNkhosi yetfwese yena kona kwetfu sonkhe.
7 Wacindzetelwa, futsi wahlushwa, kodvwa akawuvulanga umlomo wakhe; uletfwa njengemvana ekuhlatjweni, nanjengemvu phambi kwebahhuli bayo isimungulu kanjalo akawuvulanga umlomo wakhe.
8 Wakhishwa ejele kanye nasekwehlulelweni; futsi ngubani loyomemetela situkulwane sakhe na? Ngoba wancunywa eveni lalabaphilako; ngenca yetono tebantfu bami washaywa.
9 Futsi walibeka lithuna lakhe kanye nalababi, futsi kanye nalonjingile ekufeni kwakhe; noma yena angazange ente bubi, noma kwakungekho nemacebo emlonyeni wakhe.
10 Noko kwaba yintsandvo yeNkhosi kutsi alinyatwe; yamfaka elusizini, uma ungenta umphefumulo wakhe umnikelo wesono, yena uyoyibona intalelwane yakhe, uyawutelula tinsuku takhe, futsi intsandvo yeNkhosi iyawuphumelela esandleni sakhe.
11 Uyawububona buhlungu bemphefumulo wakhe, futsi uyawuneliswa; ngelwati lwayo inceku yami lelungile iyawubatfola bangenacala labaningi; ngoba uyawubutfwala bubi babo.
12 Ngako-ke ngitawumabela sabelo kanye nalabakhulu, futsi uyawuhlukanisa imphango nalabanemandla; ngoba uwutfululile umphefumulo wakhe ekufeni; futsi wabalwa kanye netoni; futsi watitfwala tono talabaningi, futsi watincengela toni.