1 Manje kwenteka kutsi bebabaningi besitukulwane lesikhulako labebangakwati kuwacondza emavi enkhosi Bhenjamini, basebantfwana labancane ngaleso sikhatsi akhuluma kubantfu bakhe; futsi bebangakholelwa kuwo emasiko aboyise.

2 Bebangakholwa nguloko kwakushiwo mayelana nekuvuka kwalabafile, noma bakholwe mayelana nekuta kwaKhristu.

3 Manje ngenca yekungakholwa kwabo abakwatanga kulicondza livi laNkulunkulu; futsi tinhlitiyo tabo tatilukhuni.

4 Futsi abazange babhajatiswe; noma batihlanganise nelibandla. Bebabantfu labehlukile ngekwelukholo lwabo, bahlala banjalo nangemvakwaloko, nasesimeni sabo sekunaka inyama kanye nalesigcwele kona; ngoba abazange bayibite iNkhosi Nkulunkulu wabo.

5 Manje ekubuseni kwaMosiya bebangasiyo ngisho nencenye lenkhulu njengebantfu baNkulunkulu; kodvwa ngenca yekuphikisana emkhatsini webazalwane bona bandza kakhulu.

6 Ngoba kwenteka kutsi babakhohlisa labaningi ngemavi abo lalutsako, labo labebasebandleni, futsi babenta kutsi bente tono letiningi; ngako-ke kwenteka kutsi kwadzingeka kutsi labo labente sono, labebasebandleni, bayalwe libandla.

7 Futsi kwenteka kutsi baletfwa phambi kwebaphristi, betfulwa kubaphristi bafundzisi; futsi baphristi babaletsa phambi kwa-Alima, lobekangumphristi lomkhulu.

8 Manje inkhosi Mosiya beyinikete Alima ligunya ngetulu kwelibandla.

9 Futsi kwenteka kutsi Alima bekangati labekumele akwente mayelana nabo; kodvwa bekukhona bofakazi labaningi ngalokumelene nabo; yebo, bantfu bema bafakaza ngebubi babo lobuningi.

10 Manje kwakungakate kube khona intfo lenje leyake yenteka ebandleni ngaphambilini; ngako-ke Alima wakhatsateka emoyeni wakhe, futsi wenta kutsi baletfwe phambi kwenkhosi.

11 Watsi enkhosini: Buka, naba labaningi lesibaletse phambi kwakho, lababekwe licala bazalwane babo; yebo, futsi batfolwe benta bubi lobuyinhlobonhlobo. Futsi abaphendvuki ebubini babo; ngako-ke sibaletse phambi kwakho, kute ubehlulele ngekwemacala abo.

12 Kodvwa inkhosi Mosiya yatsi ku-Alima: Buka, angeke ngibehlulele; ngako-ke ngibanikela etandleni takho kute behlulelwe.

13 Manje moya wa-Alima waphindze wakhatsateka; wahamba wayobuta eNkhosini kutsi kufanele enteni mayelana naloludzaba, ngoba bekesaba kutsi angahle ente lokungakalungi emehlweni aNkulunkulu.

14 Futsi kwenteka kutsi emvakwekutsi sekathandaze ngenshisekelo lenkhulu kuNkulunkulu, livi leNkhosi lafika kuye, litsi:

15 Ubusisiwe, Alima, futsi babusisiwe labo lababhajatiswa emantini aMormon. Ubusisiwe ngenca yelukholo lwakho lolukhulu emavini odvwa nje enceku yami Abinadi.

16 Futsi babusisiwe labo ngenca yelukholo lwabo lolukhulu emavini odvwa nje lowuwakhulume kubo.

17 Futsi ubusisiwe ngoba umise libandla emkhatsini walaba bantfu; bayawumiswa, futsi bayawukuba bantfu bami.

18 Yebo, babusisiwe laba bantfu labanesifiso sekutsi babitwe ngelibito lami; ngoba bayawubitwa ngelibito lami; futsi bangebami.

19 Futsi ngenca yekutsi ubute kimi mayelana nesoni, ubusisiwe.

20 Uyinceku yami; futsi ngenta sivumelwano nawe sekutsi uyawukuba nekuphila lokuphakadze; futsi uyawungisebentela uphindze uhambe egameni lami, ugcogcela dzawonye timvu tami.

21 Futsi loyo lotawukuva livi lami uyawuba yimvu yami; futsi uyawumemukela ebandleni, nami ngalokunjalo ngitawumemukela.

22 Ngoba buka, leli libandla lami; noma ngubani lobhajatiswako uyawubhajatiselwa ekuphendvukeni. Futsi nanoma ngubani lowemukelako uyawukholwa egameni lami; futsi ngitawumtsetselela ngekukhululeka.

23 Ngoba ngimi lotfwala tono temhlaba; ngoba ngimi lobadalile; futsi ngimi lomniketako loyo lokholwako kute kube sekugcineni indzawo esandleni sami sangesekudla.

24 Ngoba buka, babitwa ngelibito lami; futsi uma bangati bayawukuta ngaphambili, babe nendzawo yaphakadze esandleni sami sangesekudla.

25 Futsi kuyawukwenteka kutsi ngesikhatsi licilongo lesibili likhala ngaleso sikhatsi labo labangazange bangati bayawukuta ngaphambili futsi beme phambi kwami.

26 Ngaleso sikhatsi bayawukwati kutsi ngiyiNkhosi Nkulunkulu wabo, nginguMhlengi wabo; kodvwa bona bakhetsa kungahlengwa.

27 Ngaleso sikhatsi ngitawuvuma kubo kutsi angizange ngibati; futsi bayawuhamba baye emlilweni longapheli lolungiswe ngudeveli kanye netingilosi takhe.

28 Ngako-ke ngitsi kuwe, loyo longeke alive livi lami, nguye kanye loyo longayumemukela ebandleni lami, ngoba loyo angeke ngimemukele ngelusuku lwekugcina.

29 Ngako-ke ngitsi kuwe, Hamba; futsi noma ngubani lowonako ngalokumelene nami, loyo uyawumehlulela njengekwetono takhe latentile; futsi uma ativuma tono takhe phambi kwakho nami, futsi aphendvuke ngekweliciniso enhlitiyweni yakhe, uyawumtsetselela, nami ngalokunjalo ngitawumtsetselela.

30 Yebo, futsi njalo nje uma bantfu bami baphendvuka ngitawubatsetselela etiphambekweni tabo ngalokumelene nami.

31 Futsi ngetulu kwaloko niyawutsetselelana loyo naloyo tiphambeko tenu; ngoba ngicinisile ngitsi kuwe, loyo longamtsetseleli makhelwane wakhe tiphambeko takhe ngesikhatsi atsi uyaphendvuka, loyo utiletsela sijeziso.

32 Manje ngitsi kuwe, Hamba; futsi nanoma ngubani longeke aphendvuke etonweni takhe loyo akayukubalwa nebantfu bami; futsi loku kuyawugcinwa kusukela ngalesi sikhatsi kuya phambili.

33 Futsi kwenteka ngesikhatsi Alima sekawavile lamavi wawabhala phansi kute abe nawo, kute ehlulele bantfu belibandla njengekwemiyaleto yaNkulunkulu.

34 Futsi kwenteka kutsi Alima wahamba wabehlulela labo labebabanjwe benta bubi, njengekwelivi leNkhosi.

35 Futsi nanoma bobani labebaphendvuka etonweni tabo futsi bativuma, wababala nebantfu belibandla;

36 Futsi labo labangativumanga tono tabo futsi bangaphendvuki ebubini babo, ababalwanga kanye nebantfu belibandla, futsi emabito abo esulwa.

37 Futsi kwenteka kutsi Alima watilawula tonkhe tindzaba telibandla; bacala kutsi babe nekuthula futsi baphumelela kakhulu etindzabeni telibandla, bahamba ngekucaphela phambi kwaNkulunkulu, bemukela labaningi, futsi babhabhatisa labaningi.

38 Manje tonkhe leti tintfo Alima kanye nalabo labekasebenta nabo labebangamele libandla batenta, bahamba ngako kukhutsala, bafundzisa livi laNkulunkulu kuto tonkhe tintfo, bahlupheka ngalo lonkhe luhlobo lwetinhlupheko, bahlushwa ngibo bonkhe labo labebangesibo belibandla laNkulunkulu.

39 Futsi bayala bazalwane babo; nabo ngalokunjalo bayalwa, wonkhe umuntfu ngelivi laNkulunkulu, ngekwetono takhe, noma kuleto tono labekatentile, bayaletwe nguNkulunkulu kutsi bathandaze bangayekeli, futsi babonge kuto tonkhe tintfo.