Sehluko 21
Bantfu baLimhayi bayashaywa futsi bayehlulwa ngemaLamani—Bantfu baLimhayi bahlangana na-Amoni baphindze bayaphendvuka—Batjela Amoni ngabongcwengcwe labangemashumi lamabili nakune bemaJaredi. Cishe ngemnyaka wa 122 kuya kuwa 121 ngaphambi kwekutalwa kwaKhristu.
1 Futsi kwenteka kutsi Limhayi kanye nebantfu bakhe babuyela edolobheni laNefi, bacala kuhlala kulelive ngekuthula futsi.
2 Futsi kwenteka kutsi emvakwetinsuku letiningi emaLamani acala futsi kutsi aphehlelwe entfukutselweni ngalokumelene nemaNefi, acala kuta eminceleni yelive lelibatungeletile.
3 Manje bekangeke alokotse ababulale, ngenca yesifungo inkhosi yawo leyayisentile kuLimhayi; kodvwa bekabashaya etihlatsini tabo, asebentise ligunya ngetulu kwabo; futsi acala kubatfwalisa imitfwalo lesindzako emihlane yabo, babachuba njengembongolo lesimungulu—
4 Yebo, konkhe loku kwentiwa kute livi leNkhosi ligcwaliseke.
5 Manje tinhlupheko temaNefi tatitinkhulu, futsi kwakute indlela yekutsi batikhulule etandleni tawo, ngoba emaLamani abebatungelete ndzawo tonkhe.
6 Futsi kwenteka kutsi bantfu bacala kuvungama enkhosini ngenca yetinhlupheko tabo; bacala baba nesifiso sekutsi bahambe bayolwa nawo. Bayihlupha kakhulu inkhosi ngetikhalo tabo; ngako-ke yabavumela kutsi bente njengekwetifiso tabo.
7 Futsi baphindze babutsana ndzawonye, bahloma tikhali tabo, bahamba bayolwa nemaLamani kute bawakhiphele ngephandle kwelive labo.
8 Futsi kwenteka kutsi emaLamani abashaya, ababuyisela emuva, abulala labaningi babo.
9 Manje kwaba khona kukhala lokukhulu kanye nesililo emkhatsini webantfu baLimhayi, umfelokati akhalela indvodza yakhe, indvodzana nendvodzakati bakhalela uyise, bomnakabo bakhalela banakabo.
10 Manje besekukhona bafelokati labaningi kakhulu eveni, futsi bakhala kakhulu lusuku ngelusuku, ngoba kwesaba lokukhulu emaLamani kwakusetikwabo.
11 Futsi kwenteka kutsi kukhala kwabo lokungapheli kwabaphehla labebasele bebantfu baLimhayi kutsi batfukutsele ngalokumelene nemaLamani; bahamba futsi bayolwa, kodvwa babajikisa bababuyisela emuva futsi, balahlekelwe kakhulu.
12 Yebo, babuyela futsi kwesitsatfu, baphindze balahlekelwa njengasekucaleni; labo labebangakabulawa baphindze babuyela edolobheni laNefi.
13 Futsi batitfoba naselutfulini, batiletsa kulo lijoka lebugcili, batinikela kutsi bashaywe, nekutsi babalekiswe behliswe benyuswa, futsi bahlushwe, njengekutsandza kwetitsa tabo.
14 Futsi batehlisa nasekujuleni kwekutitfoba; futsi bakhala kakhulu kuNkulunkulu; yebo, nangabo bonkhe budze belusuku bakhala kuNkulunkulu wabo kutsi abakhulule baphume etinhluphekweni tabo.
15 Manje iNkhosi yephuta kuva kukhala kwabo ngenca yebubi babo; noko iNkhosi yakuva kukhala kwabo, yacala kutsambisa tinhlitiyo temaLamani kangangekutsi acala kuyenta yaba melula imitfwala yabo; noko iNkhosi ayibonanga kufanele kutsi ibakhulule ebugcilini.
16 Futsi kwenteka kutsi bacala kuphumelela kancane kancane eveni, bacala kukhulisa lokuyinhlavu ngebuningi, kanye nemihlambi yetimvu, kanye nemihlambi yetinkhomo, kangangekutsi abahlushwanga yindlala.
17 Manje bekukhona sibalo lesiningi sebafati, lesasingetulu kwaleso semadvodza; ngako-ke iNkhosi Limhayi yayaleta kutsi nguleyo ndvodza ayinikele kute kondliwe bafelokati kanye nebantfwana babo, kute nabo bangabhujiswa yindlala; futsi loku akwenta ngenca yesibalo lesikhulu sabo lesasibulewe.
18 Manje bantfu baLimhayi batigcina ndzawonye bayimbumba kangangoba kwakungahle kwenteke, futsi bavikela lokuyinhlavu kwabo kanye nemihlambi yabo;
19 Futsi nenkhosi lucobo lwayo yayingatetsembi uma ingephandle kwetindvonga telidolobha, ngaphandle kwekutsi itsatse bogadzi bayo nayo, ngekwesaba kutsi ngandlela tsite ingawela etandleni temaLamani.
20 Futsi yenta kutsi bantfu bayo bagadze live ndzawotonkhe, kute ngandlela tsite babambe labo baphristi labebabalekele ehlane, labebantjontje emadvodzakati emaLamani, futsi labebente kutsi kube khona imbubhiso lenkhulu kangaka etikwabo.
21 Ngoba bebanesifiso sekutsi bababambe kute babajezise; ngoba bebete eveni laNefi ebusuku, futsi batfwala lokuyinhlavu kwabo kanye nalokuningi kwetintfo tabo letiligugu; ngako-ke bahlala babalindza.
22 Futsi kwenteka kutsi akuzange kusaba khona kuphatamisana emkhatsini wemaLamani nebantfu baLimhayi, kwaze kwaba sikhatsi Amoni kanye nabomnakabo bafika eveni.
23 Futsi inkhosi ngesikhatsi ingephandle kwemasango elidolobha kanye nabogadzi bayo, yatfola Amoni kanye nabomnakabo; futsi icabanga kutsi bekubaphristi baNowa ngako-ke yenta kutsi babanjwe, baboshwe, baphonswe ejele. Futsi kube bekubaphristi baNowa yayitokwenta kutsi babulawe.
24 Kodvwa ngesikhatsi itfola kutsi kwakungasibo, nekutsi kwakubomnakabo, futsi bebaphuma eveni laseZarahemla, yagcwala injabulo lenkhulu kakhulu.
25 Manje inkhosi Limhayi yayitfumele, ngaphambi kwekufika kwa-Amoni, lidlanzana lemadvodza kuyofuna live laseZarahemla; kodvwa akakhonanga kulitfola, futsi lalahleka ehlane.
26 Noko, atfola live lelalikadze linebantfu; yebo, live lelalimbonywe ngematsambo lomile; yebo, live lebelikadze linebantfu lelalibhujisiwe; futsi bona, bebacabanga kutsi kwakungilo live laseZarahemla, babuyela eveni laNefi, bafike eminceleni yelive kungasito tinsuku letiningi phambi kwekutsi kufike Amoni.
27 Futsi beta nembhalo, umbhalo walabo bantfu ematsambo abo labebawatfolile; futsi wawucoshwe kubongcwengcwe bensimbi.
28 Manje Limhayi waphindze wagcwala injabulo nakatfola ngemlomo wa-Amoni kutsi inkhosi Mosiya beyinesiphiwo lesivela kuNkulunkulu, lebekangakhona kuhumusha ngaso imifanekiso lecoshiwe lenjena; yebo, futsi Amoni ngalokunjalo naye watfokota.
29 Noko Amoni kanye nabomnakabo bagcwala kudzabuka ngenca yekutsi labaningi kakhulu babomnakabo bebabulewe.
30 Futsi ngalokunjalo nekutsi inkhosi Nowa kanye nebaphristi bayo bebente bantfu kutsi bente tono kanye nebubi lobuningi kangaka ngalokumelene naNkulunkulu; futsi ngetulu kwaloko bakhala ngekufa kwa-Abinadi; ngalokunjalo nangekuhamba kwa-Alima kanye nalabo bantfu labahamba naye, labebasungule libandla laNkulunkulu ngemandla kanye neligunya laNkulunkulu, kanye nelukholo emavini labekakhulunywe ngu-Abinadi.
31 Yebo, bakhala ngekuhamba kwabo, ngoba bebangati kutsi bebabalekele kuphi. Manje ngabe bebayawuhlanganyela nabo ngekutfokota, ngoba nabo bese bangene esivumelwaneni naNkulunkulu kutsi bamsebentele futsi bagcine imiyaleto yakhe.
32 Manje kusukela ngekufika kwa-Amoni, inkhosi Limhayi nayo ngalokunjalo yangena esivumelwaneni naNkulunkulu, futsi ngalokunjalo nebantfu bayo labaningi; kutsi bamsebentele futsi bagcine imiyaleto yakhe.
33 Futsi kwenteka kutsi inkhosi Limhayi kanye nebantfu bayo labaningi bebanesifiso sekubhajatiswa; kodvwa kwakute namunye kulelive lobekaneligunya lelivela kuNkulunkulu. Amoni wala kukwenta loku, ngoba bekatibona njengenceku lengakafaneli.
34 Ngako-ke abazange ngaleso sikhatsi batihlanganise babe libandla, balindze Moya weNkhosi. Manje bebanesifiso sekutsi babe njenga-Alima kanye nabomnakabo, labebabalekele ehlane.
35 Bebanesifiso sekutsi babhajatiswe njengesibonakaliso kanye nebufakazi bekutsi bebatimisele kusebentela Nkulunkulu ngato tonkhe tinhlitiyo tabo; noko baselula sikhatsi; futsi indzaba yekubhajatiswa kwabo itoniketwa emvakwaloku.
36 Manje yonkhe imetamo ya-Amoni nebantfu bakhe, nenkhosi Limhayi kanye nebantfu bayo, kwakungukutsi batikhulule baphume etandleni temaLamani kanye nasebugcilini.