Sehluko 13
Abinadi uvikelwa ngemandla aNkulunkulu—Ufundzisa imiYaleto leliShumi—Insindziso ayiti ngemtsetfo waMose kuphela—Nkulunkulu lucobo Lwakhe utawukwenta inhlawulo futsi ahlenge bantfu Bakhe. Cishe ngemnyaka wa 148 ngaphambi kwekutalwa kwaKhristu.
1 Manje ngesikhatsi inkhosi seyiwavile lamavi, yatsi kubaphristi bayo: Susani lomfokati, nimbulale, ngoba singentani ngaye, ngoba uyahlanya.
2 Futsi beta ngaphambili betama kumbamba ngetandla tabo; kodvwa wamelana nabo, watsi kubo:
3 Ningangitsintsi, ngoba Nkulunkulu utonishaya uma nibeka tandla tenu kimi, ngoba angikawendlulisi umlayeto iNkhosi lengitfume kutsi ngiwuletse; futsi angikanitjeli ngaloko lenicele kutsi nginitjele kona; ngako-ke, Nkulunkulu angeke avume kutsi ngibhujiswe ngalesi sikhatsi.
4 Kodvwa kufanele ngigcwalise imiyaleto Nkulunkulu langiyalete ngayo; futsi ngenca yekutsi nginitjele liciniso ningitfukutselele. Ngetulu kwaloko, ngenca yekutsi ngikhulume livi laNkulunkulu ningehlulele ngekutsi ngiyahlanya.
5 Manje kwenteka kutsi emvakwekutsi Abinadi sekawakhulumile lamavi bantfu benkhosi Nowa abalokotsanga babeka tandla tabo kuye, ngoba Moya weNkhosi wawusetikwakhe, futsi buso bakhe bakhanya ngenkhatimulo lenkhulu, njengebaMosi ngesikhatsi asentsabeni yaseSinayi, ngesikhatsi akhuluma neNkhosi.
6 Futsi wakhuluma ngemandla nangeligunya lelivela kuNkulunkulu; wachubeka nemavi akhe, watsi:
7 Niyabona kutsi nite emandla ekungibulala, ngako-ke ngiyawucedzela umlayeto wami. Yebo, futsi ngiyacondza kutsi kuyanidzabula etinhlitiyweni tenu ngenca yekutsi nginitjela liciniso mayelana nebubi benu.
8 Yebo, futsi emavi ami anigcwalisa ngekumangala nekwetfuka, nangentfukutselo.
9 Kodvwa ngiyawucedzela umlayeto wami; futsi emvakwaloko akunandzaba kutsi ngiyakuphi, uma nje kusho kutsi ngiyasindziswa.
10 Kodvwa nguloku lenginitjela kona, lenikwentako ngami, emvakwaloku, kuyakuba njengesibonakaliso kanye nemfanekiso wetintfo letitokwenteka.
11 Manje nginifundzela imiyaleto yaNkulunkulu lesele, ngoba ngiyacondza kutsi ayikabhalwa etinhlitiyweni tenu; ngiyacondza kutsi nifundzile futsi nafundzisa bubi sikhatsi lesiningi setimphilo tenu.
12 Manje, niyakhumbula kutsi ngitse kini: Ungatenteli noma ngusiphi sithico lesibatiwe, noma ngabe ngumuphi umfanekiso walokusezulwini etulu, noma walokusemhlabeni ngaphansi, noma walokusemantini ngaphansi kwemhlaba.
13 Futsi ngetulu kwaloko: Ungatikhotsameli, noma utikhonte; ngoba mine iNkhosi Nkulunkulu wakho nginguNkulunkulu lonesikhwele, ngihambela bubi baboyise kubantfwana, kuso situkulwane sesitsatfu kanye nesesine salabo labangizondako.
14 Futsi ngikhombisa umusa kulabatinkhulungwane balabo labangitsandzako nalabagcina imiyaleto yami.
15 Ungaliphatsi ngelite libito leNkhosi Nkulunkulu wakho; ngoba iNkhosi angeke imtfole angenacala lophatsa ngelite libito lakhe.
16 Khumbula lusuku lweSabatha, ulugcine lungcwele.
17 Tinsuku letisitfupha uyawusebenta, wente ngato wonkhe umsebenti wakho;
18 Kodvwa lusuku lwesikhombisa, lisabatha leNkhosi Nkulunkulu wakho, ungenti noma ngangumuphi umsebenti, wena, noma indvodzana yakho, noma indvodzakati yakho, nesisebenti sakho lesidvuna, noma sisebenti sakho lesisikati, noma tinkhomo takho, noma ngabe ngusiphi sihambi lesingekhatsi kwelisango lakho.
19 Ngoba ngetinsuku letisitfupha iNkhosi yenta lizulu nemhlaba, nelwandle, kanye nako konkhe lokukuko; ngaloko-ke iNkhosi yalubusisa lusuku lwesabatha, futsi yalungcwelisa.
20 Hlonipha uyihlo nenyoko, kute tinsuku takho tandze eveni iNkhosi Nkulunkulu wakho lekunike lona.
21 Ungabulali.
22 Ungaphingi. Ungebi.
23 Ungafakazi emanga ngamakhelwane wakho.
24 Ungayihawukeli indlu yamakhelwane wakho, ungamhawukeli nemfati wamakhelwane wakho, noma sisebenti sakhe lesidvuna, noma sisebenti sakhe lesisikati, noma inkhabi yakhe, noma imbongolo yakhe, noma yini lengeyamakhelwane wakho.
25 Futsi kwenteka kutsi emvakwekutsi Abinadi sekayicedzile lenkhulumo watsi kubo: Ngabe nibafundzisile yini laba bantfu kutsi betame kwenta tonkhe leti tintfo kute bayigcine lemiyaleto na?
26 Ngitsi kini, Cha; ngoba kube nikwentile loko, iNkhosi beyingeke ingente kutsi ngite lapha futsi ngiphrofethe ngebubi mayelana nalaba bantfu.
27 Manje nitsi insindziso ita ngemtsetfo waMosi. Ngitsi kini kudzingekile kutsi niwugcine umtsetfo waMosi kwamanje; kodvwa ngitsi kini, sikhatsi siyawufika lapho kungasayudzingeka nanini kugcina umtsetfo waMosi.
28 Futsi ngetulu kwaloko, ngitsi kini, insindziso ayiti ngemtsetfo kuphela, futsi kube kwakungasiko ngenca yenhlawulo, leyo Nkulunkulu lucobo lwakhe layawuyenta ngenca yetono kanye nebubi bebantfu bakhe, kute babhubhe ngekungavimbeleki, nanoma kukhona umtsetfo waMosi.
29 Manje ngitsi kini kwakudzingekile kutsi kube khona umtsetfo loniketwa bantfwana baka-Israyeli, yebo, umtsetfo locine kakhulu; ngoba bebabantfu labebanetinhloko letilukhuni, bashesha kwenta bubi, futsi baphuta kukhumbula iNkhosi Nkulunkulu wabo;
30 Ngako-ke kukhona umtsetfo lebebanikwe wona, yebo, umtsetfo wetento kanye netimiso, umtsetfo lebekumele bawugcine ngebucotfo lusuku nelusuku, kute bagcinwe ekukhumbuleni Nkulunkulu kanye nemsebenti wabo kuye.
31 Kodvwa bukani, ngitsi kini, tonkhe leti tintfo tatitibonakaliso tetintfo letatitokuta.
32 Manje, ngabe bawucondza yini lomtsetfo na? Ngitsi kini, Cha, abawucondzanga bonkhe lomtsetfo; futsi loku kungenca yebulukhuni betinhlitiyo tabo; ngoba abacondzanga kutsi akunakuba khona namunye umuntfu losidziswako ngaphandle kwekutsi kube ngekuhlengwa nguNkulunkulu.
33 Ngoba bukani, ngabe Mosi akaphrofethanga yini kubo mayelana nekuta kwaMesiya, kanye nekutsi Nkulunkulu uyohlenga bantfu bakhe na? Yebo, futsi bonkhe baphrofethi baphrofetha kusukela ekucaleni kwemhlaba—ngabe abakhulumanga yini ngaloko lokutsi akufane naleti tintfo na?
34 Ngabe abashongo yini kutsi Nkulunkulu lucobo lwakhe uyowehlela phansi emkhatsini webantfwana bebantfu, atsatse simo semuntfu, futsi ahambe ngemandla lamakhulu etikwemhlaba wonkhe na?
35 Yebo, ngabe abashongo yini kutsi uyokwenta kube khona kuvuka kwalabafile, nekutsi yena, lucobo lwakhe, uyocindzetelwa futsi ahlushwe na?