1 Manje kwenteka kutsi emvakwekutsi emadvodzana aMosiya sekatentile tonkhe leti tintfo, atsatsa sibalo lesincane kanye nawo abuyela kuyise, inkhosi, futsi anesifiso sekutsi iwavumele kutsi, wona kanye nalabo labebabakhetsile, bahambe bakhuphukele eveni laNefi kute bayoshumayela tintfo lebebativile, nekutsi bayokwabelana ngelivi laNkulunkulu nabomnakabo, emaLamani—

2 Kute mhlawumbe babaletse elwatini lweNkhosi Nkulunkulu wabo, futsi babente baneliswe ngebubi baboyise; nekutsi mhlawumbe babalaphe ekutondvweni kwabo kumaNefi, kute nabo bentiwe bajabule eNkhosini Nkulunkulu wabo, kute babe nebungani kuloyo naloyo, kanye nekutsi kungabe kusaba khona imibango nanini kulo lonkhe live iNkhosi Nkulunkulu wabo lebanike lona.

3 Manje bebanesifiso sekutsi insindziso imenyetelwe kuto tonkhe tidalwa, ngoba abakwatanga kukumela kutsi noma ngumuphi umphefumulo wemuntfu ulahleke; yebo, nemicabango nje yekutsi noma ngumuphi umphefumulo kufanele uve buhlungu lobungapheli kwabenta kutsi batfutfumele futsi bachachatele.

4 Futsi Moya weNkhosi wasebenta ngaleyondlela kubo, ngoba bebatoni letimbi kakhulu, futsi iNkhosi yabona kufanele ngemusa wayo longapheli kutsi ibasindzise; noko beva lobukhulu buhlungu emphefumulweni ngenca yebubi babo, bahluphekile kakhulu futsi besaba kutsi bebayawulahlwa ingunaphakadze.

5 Futsi kwenteka kutsi bamncenga uyise tinsuku letiningi kutsi bahambe bakhuphukele eveni laNefi.

6 Inkhosi Mosiya yahamba futsi yayobuta eNkhosini kutsi iwavumele yini emadvodzana ayo ahambe akhuphukele emkhatsini wemaLamani kutsi ayoshumayela livi.

7 INkhosi yatsi kuMosiya: Bavumele bahambe bakhuphuke, ngoba baningi labayawukholelwa emavini abo, futsi bayawuba nekuphila lokuphakadze; futsi ngitawukhulula emadvodzana akho aphume etandleni temaLamani.

8 Futsi kwenteka kutsi Mosiya wabavumela kutsi bahambe futsi bente njengekwesicelo sabo.

9 Batsatsa luhambo lwabo baya ehlane bahamba bakhuphuke bayoshumayela livi emkhatsini wemaLamani; futsi ngiyawuniketa umlandvo ngetento tabo emvakwaloku.

10 Manje inkhosi Mosiya beyingenamuntfu wekutsi imnike umbuso, ngoba bekute namunye wemadvodzana ayo labekayawuvuma kutsatsa umbuso.

11 Ngako-ke watsatsa imibhalo lebeyicoshwe kubongcwengcwe belitfutsi, ngalokunjalo nakubongcwengcwe baNefi, kanye nato tonkhe tintfo lebekatigcinile futsi atilondvolotile njengekwemiyaleto yaNKulunkulu, emvakwekutsi sekayihumushile wenta kutsi imibhalo ibhalwe leyo lebeyikubongcwengcwe beligolide lebeyitfolwe bantfu baLimhayi, lebeyiletfwe kuye ngesandla saLimhayi;

12 Futsi loku wakwenta ngenca yenshisekelo lenkhulu yebantfu bakhe; ngoba bebanesifiso lesingenakulinganiswa sekutsi bati mayelana nalabo bantfu labebabhujisiwe.

13 Manje watihumusha ngekusebentisa lawo matje lamabili laboshelwe emngcengcemeni weluhlaka.

14 Manje leti tintfo betilungiswe kusukela ekucaleni, futsi betindlulisiwe tehla titukulwane ngetitukulwane, ngenhloso yekuhumusha tilimi;

15 Futsi betigciniwe futsi talondvolotwa ngesandla seNkhosi, kute ivetele tonkhe tidalwa letiyotsatsa live bubi kanye netinengiso tebantfu bayo;

16 Futsi loyo lonaleti tintfo ubitwa ngekutsi ngumboni, ngendlela yesikhatsi sakudzala.

17 Manje emvakwekutsi Mosiya sekacedzile kuhumusha lemibhalo, buka, yanika umlandvo webantfu labebabhujisiwe, kusukela ngesikhatsi lababhujiswa ngaso kuya emuva ekwakhiweni kwembhoshongo lomkhulu, ngesikhatsi iNkhosi iphambanisa lulwimi lwebantfu futsi bahlakatwa ndzawotonkhe emhlabeni wonkhe, yebo, futsi kusukela ngaleso sikhatsi kuya emuva kute kube sekudalweni kwa-Adamu.

18 Manje lomlandvo wenta bantfu baMosiya kutsi bakhale kakhulu, yebo, bebagcwele lusizi; noko wabanika lwati loluningi, lekwatsi ngalo bajabula.

19 Futsi lomlandvo uyawubhalwa emvakwaloku; ngoba buka, kuhle kutsi bonkhe bantfu bayawutati tintfo letibhalwe kulomlandvo.

20 Manje, njengoba ngishito kini, kutsi emvakwekutsi inkhosi Mosiya seyitentile leti tintfo, yatsatsa bongcwengcwe belitfusi, kanye nato tonkhe tintfo lebeyitigcinile, yatinika Alima, lobekayindvodzana ya-Alima; yebo, yonkhe imibhalo, futsi ngalokunjalo netihumushi, futsi yatiniketa yena, yamyaleta kutsi atigcine futsi atilondvolote, futsi ngetulu kwaloko agcine nembhalo webantfu, atindlulise tehle kusukela esitukulwaneni kuya kulesinye, nanjengoba tatindlulisiwe kwehla kusukela ngesikhatsi Lehi ashiya eJerusalema.