1 Futsi kwenteka kutsi ngesikhatsi Abinadi asacedzile leti tinkhulumo, inkhosi yayaleta kutsi baphristi bamtsatse futsi bente kutsi abulawe.

2 Kodvwa bekukhona munye emkhatsini wabo libito lakhe bekungu-Alima, naye futsi awesitukulwane saNefi. Bekalijaha, futsi wawakholwa emavi Abinadi labekawakhulumile, ngoba bekati mayelana nebubi Abinadi labekafakaze ngabo ngalokumelene nabo; ngako-ke wacala kuncenga enkhosini kutsi ingamtfukutseleli Abinadi, kodvwa imvumele kutsi esuke ngekuthula.

3 Kodvwa inkhosi yatfukutsela kakhulu, futsi yenta kutsi Alima acoshwe emkhatsini wabo, futsi yatfumela tinceku tayo emvakwakhe kute timbulale.

4 Kodvwa wabaleka phambi kwato wabhaca kangangoba atimtfolanga. Futsi ngesikhatsi abhacile tinsuku letiningi wawabhala onkhe emavi Abinadi labekawakhulumile.

5 Futsi kwenteka kutsi iNkhosi yenta kutsi bogadzi bayo bamtungelete Abinadi bambambe; bambopha baphindze bamphonse ejele.

6 Futsi emvakwetinsuku letintsatfu, seyibonisene nebaphristi bayo, yenta kutsi aphindze aletfwe phambi kwayo.

7 Futsi yatsi kuye: Abinadi, sikutfole unelicala, futsi ufanelwe kufa.

8 Ngoba utse Nkulunkulu lucobo lwakhe kufanele ehlele phansi emkhatsini webantfwana bebantfu; manje, ngenca yaloku utawubulawa ngaphandle kwekutsi uwahocise onkhe lamavi lowuwakhulumile lamabi mayelana nami kanye nebantfu bami.

9 Manje Abinadi watsi kuyo: Ngitsi kuwe, angeke ngiwahocise lamavi lengiwakhulumile kuwe mayelana nalabantfu, ngoba aliciniso; kute nati ngebuciniso bawo ngitivumele kutsi ngiwele etandleni tenu.

10 Yebo, futsi ngitawuhlupheka kute kube sekufeni, angeke ngiwahocise lamavi ami, ayawukuma njengebufakazi ngalokumelene nani. Futsi uma ningibulala nitawube nicitsa ingati lemsulwa, futsi loku nako ngalokunjalo kuyawukuma njengebufakazi ngalokumelene nani ngelusuku lwekugcina.

11 Futsi manje inkhosi Nowa beseyitomkhulula, ngoba beyesaba livi lakhe; ngoba beyesaba kutsi tehlulelo taNkulunkulu tatitokuta etikwayo.

12 Kodvwa baphristi baphakamisa emavi abo ngalokumelene naye, bacala kumbeka licala. Batsi: Uyitfukile inkhosi. Ngako-ke inkhosi bayiphehla kute itfukutsele ngalokumelene naye, futsi yamnikela kutsi abulawe.

13 Futsi kwenteka kutsi bamtsatsa bambopha, basishaya sikhumba sakhe ngenyandza yetinkhuni, yebo, washa wate wafa.

14 Manje ngesikhatsi emalangabi acala kumhashula, wamemeta kubo, watsi:

15 Bukani, njengoba nentile kimi, ngalokunjalo kuyawukwenteka kutsi intalelwane yenu iyawukwenta kutsi labaningi beve letinhlungu lengitivako, ngisho netinhlungu tekufa ngemlilo; futsi loku ngenca yekutsi ikholelwa ensindzisweni yeNkhosi Nkulunkulu wabo.

16 Futsi kutawukwenteka kutsi niyawuhlushwa ngato tonkhe tinhlobo tetifo ngenca yebubi benu.

17 Yebo, niyawushaywa kuto tonkhe tindzawo, futsi niyawucoshwa niphindze nihlakatwe niye emuva naphambili, njengemhlambi wasendle ucoshwa tilwane tasendle letesabekako.

18 Ngalolosuku niyawutingelwa, futsi niyawutsatfwa ngesandla setitsa tenu, emvakwaloko niyawukuva buhlungu, njengoba nami ngiva, tinhlungu tekufa ngemlilo.

19 Ngaleyondlela Nkulunkulu wenta imphindziselo etikwalabo lababulala bantfu bakhe. Awu Nkulunkulu, yemukela umphefumulo wami.

20 Manje, ngesikhatsi Abinadi sekawashito lamavi, wawa, eve buhlungu bekufa ngemlilo; yebo, abulewe ngenca yekutsi angeke ayiphike imiyaleto yaNkulunkulu, alicinisekisile liciniso lemavi akhe ngekufa kwakhe.