1 Manje kwenteka kutsi Amoni kanye nenkhosi Limhayi bacala kubonisana nebantfu kutsi bebangatikhulula kanjani baphume ebugcilini; futsi benta nekutsi bonkhe bantfu bahlangane ndzawonye; loku bakwenta kute beve livi lebantfu mayelana naloludzaba.

2 Futsi kwenteka kutsi abakwatanga kuyitfola indlela yekutikhulula ebugcilini, ngaphandle kwekutsi batsatse bafati nebantfwana babo, nemihlambi yetimvu tabo, nemihlambi yetinkhomo tabo, kanye nemathende abo, basuke baye ehlane; ngoba emaLamani bekamaningi kakhulu, bekungasiko lula kutsi bantfu baLimhayi babange nawo, bacabanga kutsi bebangatikhulula ebugcilini ngenkemba.

3 Manje kwenteka kutsi Gideyoni wahamba futsi wema phambi kwenkhosi, watsi kuyo: Manje Awu nkhosi, kute kube manje uwalalele emavi ami tikhatsi letiningi ngesikhatsi sibanga nabomnaketfu, emaLamani.

4 Manje Awu nkhosi, uma ungakangitfoli nginjengenceku lengenalusito lwalutfo; noma uma nje kute kube manje bewungawalalela emavi ami noma kancane kangakanani, futsi uma abe lusito kuwe, namanje ngifisa kutsi shengatsi bewungawalalela emavi ami nangalesi sikhatsi, futsi ngitawukuba yinceku yakho ngibakhulule laba bantfu ebugcilini.

5 Futsi inkhosi yamvumela kutsi akhulume. Gideyoni watsi kuyo:

6 Buka sikhala lesingemuva, eludvongeni lolungemuva, eceleni lelingemuva kwelidolobha. EmaLamani, noma bogadzi bemaLamani, ebusuku bayadzakwa; ngako-ke asitfumele simemetelo emkhatsini wabo bonkhe laba bantfu kutsi bagcogcele ndzawonye imihlambi yetimvu tabo kanye nemihlambi yetinkhomo, kutsi bayichube bayiyise ehlane ebusuku.

7 Futsi ngitawuhamba njengekwemyalo wakho ngikhokhe umtselo wekugcina weliwayini kumaLamani, futsi atawudzakwa; tsine sitawundlula ngesikhala lesiyimfihlo ngesencele senkambu yawo ngesikhatsi wona sekadzakiwe futsi sekalele.

8 Ngaleyondlela sitawusuka nebafati betfu kanye nebantfwana betfu, imihlambi yetimvu tetfu, kanye nemihlambi yetinkhomo tetfu siye ehlane; futsi sitawuhamba situngelete live laseShilomu.

9 Kwenteka kutsi inkhosi yawalalela emavi aGideyoni.

10 Inkhosi Limhayi yenta kutsi bantfu bayo bagcogcele imihlambi yabo ndzawonye; futsi yatfumela umtselo weliwayini kumaLamani; ngetulu kwaloko yatfumela lelinye liwayini, njengesipho sawo; futsi anatsa ngekukhululeka kulo liwayini inkhosi Limhayi lebeyilitfumele kuwo.

11 Futsi kwenteka kutsi bantfu benkhosi Limhayi besuka ebusuku baya ehlane nemihlambi yetimvu tabo kanye nemihlambi yetinkhomo tabo, bahamba batungeleta live laseShilomu ehlane, futsi bayishintja indlela yabo baya ngaseveni laseZarahemla, baholwa ngu-Amoni kanye nabomnakabo.

12 Futsi bebatsetse lonkhe ligolide labo, nesiliva, kanye netintfo letiligugu tabo, lebebangatitfwala, futsi ngalokunjalo nemiphako yabo, baya ehlane; bachubeka neluhambo lwabo.

13 Emvakwemalanga lamaningi basehlane bafika eveni laseZarahemla, bahlangana nebantfu baMosiya, baba ngephansi kwakhe.

14 Futsi kwenteka kutsi Mosiya wabemukela ngenjabulo; ngalokunjalo wemukela nemibhalo yabo, futsi ngalokunjalo nemibhalo leyayitfolwe bantfu baLimhayi.

15 Manje kwenteka kutsi ngesikhatsi emaLamani sekatfole kutsi bantfu baLimhayi besebesukile baphuma eveni ebusuku, batfumela imphi ehlane kutsi ibalandzele;

16 Futsi emvakwekutsi sebabalandzele tinsuku letimbili, abazange basakwati kulandzela imikhondvo yabo; ngako-ke alahleka ehlane.