1 Futsi kwenteka kutsi Amuloni watfola kutsandzeka emehlweni enkhosi yemaLamani; ngako-ke, inkhosi yemaLamani yamnika yena kanye nabomnakabo kutsi babe bafundzisi labakhetsiwe ngetulu kwebantfu bayo, yebo, nangetulu kwebantfu labebaseveni laseShemloni, nebaseveni laseShilomu, kanye nebaseveni lase-Amuloni.

2 Ngoba emaLamani besekawatsatsile onkhe lamave; ngako-ke, inkhosi yemaLamani yabeka emakhosi ngetulu kwawo onkhe lamave.

3 Manje libito lenkhosi yemaLamani kwakunguLamani, yetsiwe ngilibito leyise; ngako-ke yabitwa ngekutsi yinkhosi Lamani. Futsi beyiyinkhsosi ngetulu kwebantfu labaningi.

4 Futsi yakhetsa bafundzisi kubomnakabo-Amuloni kulo lonkhe live lebelilebantfu bakhe; futsi ngaleyondlela lulwimi lwaNefi lwacala kufundziswa emkhatsini wabo bonkhe bantfu bemaLamani.

5 Futsi bebabantfu labanebungani loyo naloyo; noko bebangamati Nkulunkulu; futsi bomnakabo Amuloni ababafundzisanga lutfo mayelana neNkhosi Nkulunkulu wabo, noma ngemtsetfo waMosi; noma babafundzise ngemavi a-Abinadi;

6 Kodvwa babafundzisa kutsi bagcine imibhalo yabo, nekutsi babhalelane loyo naloyo.

7 Futsi ngaleyondlela emaLamani acala kukhula kuyo ingcebo, acala kutsengiselana loyo naloyo futsi andza kakhulu, acala kuba nebucili aphindze aba bantfu labahlakaniphile, ngekuhlakanipha kwelive, yebo, aba bantfu labanebucili lobukhulu, atfokota ngayo yonkhe indlela yebubi kanye neyekuphanga, ngaphandle kwekutsi kube semkhatsini wabomnakabo.

8 Manje kwenteka kutsi Amuloni wacala kusebentisa ligunya ngetulu kwa-Alima kanye nabomnakabo, futsi wacala kumhlupha, wenta kutsi bantfwana bakhe bahluphe bantfwana babo.

9 Ngoba Amuloni bekamati Alima, kutsi bekangulomunye webaphristi benkhosi, futsi nekutsi bekunguye lowawakholwa emavi a-Abinadi futsi wakhishwa phambi kweNkhosi, ngako-ke bekamtfukutselele; ngoba bekangephansi kwenkhosi Lamani, noko walisebentisa ligunya ngetulu kwabo, futsi wababekela imisebenti, wabeka tindvuna temsebenti ngetulu kwabo.

10 Futsi kwenteka kutsi betitinkhulu kakhulu tinhlupheko tabo kangangekutsi bacala kukhala kakhulu kuNkulunkulu.

11 Amuloni wabayala kutsi bakuyekele kukhala kwabo; futsi wabeka bogadzi ngetulu kwabo kutsi bababuke, kute kutsi loyo lotfolakala abita Nkulunkulu abulawe.

12 Futsi Alima kanye nebantfu bakhe abawaphakamiselanga emavi abo eNkhosini Nkulunkulu wabo, kodvwa batitfulula tinhlitiyo tabo kuyo; futsi yayiyati imicabango yetinhlitiyo tabo.

13 Futsi kwenteka kutsi livi leNkhosi lefika kubo basesetinhluphekweni tabo, litsi: Phakamisani tinhloko tenu nidvudvuteke, ngoba ngiyasati sivumelwano lenasenta kimi; ngitawumelana nebantfu bami futsi ngibakhulule baphume ebugcilini.

14 Ngetulu kwaloko ngitawuyenta ibe lula imitfwalo lebekwe etikwemahlombe enu, ngendlela yekutsi nani angeke niyive emihlane yenu, noma nisesebugcilini; futsi loku ngitawukwenta kute nime njengabofakazi bami emvakwaloku, futsi nekutsi nati ngekweliciniso kutsi mine, iNkhosi Nkulunkulu, ngiyabahambela bantfu bami etinhluphekweni tabo.

15 Manje kwenteka kutsi imitfwalo leyayibekwe etikwa-Alima nabomnakabo yentiwa yabalula; yebo, iNkhosi yabacinisa kute bakwati kuyitfwala imitfwalo yabo kalula, futsi batinikela ngekutfokota kanye nangekubeketela kuyo yonkhe intsandvo yeNkhosi.

16 Futsi kwenteka kutsi lwalulukhulu lukholo lwabo kanye nekubeketela kwabo kangangekutsi livi leNkhosi lefika kubo futsi, litsi: Dvudvutekani, ngoba kusasa ngitawunikhulula niphume ebugcilini.

17 Futsi yatsi ku-Alima: Utawuhamba phambi kwalabantfu, futsi ngitawuhamba nawe ngikhulule labantfu baphume ebugcilini.

18 Manje kwenteka kutsi Alima kanye nebantfu bakhe ngesikhatsi sasebusuku bagcogcela imihlambi yabo ndzawonye, futsi ngalokunjalo nalokuyinhlavu kwabo; yebo, sikhatsi sonkhe sasebusuku bebagcogcela ndzawonye imihlambi yabo.

19 Ekuseni iNkhosi yenta kutsi kufike butfongo lobukhulu kumaLamani, yebo, futsi nato tonkhe tindvuna tabo temsebenti betisebutfongweni lobukhulu.

20 Alima kanye nebantfu bakhe besuka baya ehlane; ngesikhatsi sebahambe lilanga lonkhe bamisa emathende abo esigodzini, basibita ngekutsi sigodzi sa-Alima, ngoba wabahola endleleni yabo leya ehlane.

21 Yebo, kuso sigodzi sa-Alima bathandaza ngekubonga kakhulu kuNkulunkulu ngoba bekabe nesihawu kubo, futsi wenta yabalula imitfwalo yabo, futsi wabakhulula baphuma ebugcilini; ngoba bebasebugcilini, futsi kwakute namunye lobekangabakhulula ngaphandle kwekutsi kube yiNkhosi.

22 Futsi bambonga Nkulunkulu, yebo, bonkhe besilisa babo nabo bonkhe besifazane babo kanye nabo bonkhe bantfwana babo labebakwati kukhuluma baphakamisa emavi abo badvumisa Nkulunkulu wabo.

23 Manje iNkhosi yatsi ku-Alima: Sheshisa uphume kanye nalabantfu kulelive, ngoba emaLamani sekavukile futsi ayakulandzela; ngako-ke phuma kulelive futsi ngitawuwamisa emaLamani kuso lesi sigodzi kute angasondzeli ekucosheni laba bantfu.

24 Futsi kwenteka kutsi besuka baphuma esigodzini, batsatsa luhambo lwabo baya ehlane.

25 Futsi emvakwekutsi sebabe sehlane tinsuku letilishumi nakubili befika eveni laseZarahemla; inkhosi Mosiya nayo yabemukela ngenjabulo.