Sehluko 6
Inkhosi Bhenjamini ibhala emabito ebantfu phindze ibeka baphristi kutsi babafundzise—Mosiya ubusa njengeNkhosi lelungile. Cishe ngemnyaka wa 124 kuya kuwa 121 ngaphambi kwekutalwa kwaKhristu.
1 Manje, inkhosi Bhenjamini yacabanga kutsi kwakukuhle, emvakwekutsi seyicedzile kukhuluma kubantfu, kutsi itsatse emabito abo bonkhe labo labebangene esivumelwaneni naNkulunkulu kutsi bagcine imiyaleto yakhe.
2 Futsi kwenteka kutsi kwakute namunye umuntfu, ngaphandle kwebantfwana labancane, longangenanga esivumelwaneni wamukela Khristu wabitwa ngelibito lakhe.
3 Ngetulu kwaloko, kwenteka kutsi ngesikhatsi inkhosi Bhenjamini seyisentile siphetfo sayo tonkhe leti tintfo, seyingcwelisile indvodzana yayo Mosiya kutsi ibe ngumbusi kanye nenkhosi ngetulu kwebantfu bayo, seyiyiniketile imiyaleto mayelana nembuso, ngetulu kwaloko seyibabekile baphristi kutsi bafundzise bantfu, kute ngaloko bayive baphindze bayati imiyaleto yaNkulunkulu, nekutsi babaphehlele ekukhumbuleni sifungo labasenta, yasikhulula sicuku, babuyela emuva, wonkhe umuntfu, njengekwemindeni yabo, etindlini tabo.
4 Mosiya wacala kubusa esikhundleni seyise. Wacala kubusa ngemnyaka wemashumi lamatsatfu eminyaka yakhe yebudzala, loku kwenta sekukonkhe, cishe iminyaka lengemakhulu lamane nemashumi lasikhombisa nesitfupha kusukela ngesikhatsi Lehi ashiya eJerusalema.
5 Inkhosi Bhenjamini yaphila iminyaka lemitsatfu yase-iyafa.
6 Futsi kwenteka kutsi inkhosi Mosiya yahamba etindleleni teNkhosi, yatigcina tehlulelo tayo kanye nemitsetfo yayo, yayigcina imiyaleto yayo kuto tonkhe tintfo noma ngabe yini leyayimyalete ngayo.
7 Inkhosi Mosiya yenta bantfu bayo kutsi balime umhlabatsi. Naye ngalokunjalo, lucobo lwakhe, wawulima umhlabatsi, kute ngaloko angabi ngumtfwalo kubantfu bakhe, kute ente njengoba uyise bekentile kuto tonkhe tintfo. Akutange kube khona umbango emkhatsini wabo bonkhe bantfu bakhe sikhatsi lesingangeminyaka lemitsatfu.