1 Futsi kwenteka kutsi saphindza sacala kwakha umbuso saphindze sahlala eveni ngekuthula. Ngenta kutsi kube khona tikhali temphi talo lonkhe luhlobo letentiwako, kute ngaloko ngibe netikhali tebantfu bami ngesikhatsi emaLamani aphindze eta kutolwa nebantfu bami.

2 Ngabeka bogadzi batungeleta live, kute emaLamani angaphindzi atselekele etikwetfu singakacapheli bese ayasibhubhisa; ngaleyondlela ngabavikela bantfu bami kanye nemihlambi yami, futsi ngabagcina ekuweleni etandleni tetitsa tetfu.

3 Futsi kwenteka kutsi salitsatsa live labobabe betfu iminyaka leminingi, yebo, sikhatsi lesiyiminyaka lengemashumi lamabili nakubili.

4 Ngenta kutsi emadvodza alime umhlabatsi, aphindze akhulise tonkhe tinhlobo talokuyinhlavu kanye nato tonkhe titselo letitinhlobonhlobo.

5 Ngenta kutsi besifazane batfunge, futsi batikhandle, basebente, bente tonkhe tinhlobo telineni lecolisakele, yebo, kanye nendvwangu leyinhlobonhlobo, kute sembatsise bungcunu betfu; ngaleyondlela saphumelela kulelive—ngaleyondlela saba nekuthula njalo kulelive sikhatsi lesiyiminyaka lengemashumi lamabili nakubili.

6 Futsi kwenteka kutsi inkhosi Lamani yafa, kwatsi indvodzana yayo yacala kubusa esikhundleni sayo. Futsi yacala kuphehla bantfu bayo kutsi bavukele bantfu bami; ngako-ke bacala kulungiselela imphi, kanye nekutohlasela bantfu bami.

7 Kodvwa bese ngititfumele tinhloli tami tatungeleta live laseShemloni, kute ngitfole ngekutilungiselela kwabo, kute ngibacaphele, kute bangatseleki etikwebantfu bami bababhubhise.

8 Futsi kwenteka kutsi bakhuphukela enyakatfo yelive laseShilomu, kanye nemabutfo abo lamaningi, emadvodza ahlome ngebutjoki, nangemicibisholo, nangetinkemba, nabocelemba, nangematje, kanye nangetilingi; futsi bebahhulile etinhloko tabo tate tangabi nalutfo; futsi bebabophe emabhande etikhumba atungelete tinkhalo tabo.

9 Futsi kwenteka kutsi ngenta kutsi besifazane kanye nebantfwana bebantfu bami babhaciswe ehlane; ngetulu kwaloko ngenta kutsi onkhe emadvodza lamadzala ami labekakwati kuphatsa tikhali, futsi ngalokunjalo nawo onkhe emajaha ami labekakwati kuphatsa tikhali, abutsane ndzawonye kute ahambe ayokulwa nemaLamani; ngababeka ngekwetigaba tabo, wonkhe umuntfu ngekweminyaka yakhe.

10 Futsi kwenteka kutsi sahamba sakhuphuka kutsi siyokulwa nemaLamani; futsi nanami, eminyakeni yami yebudzala, ngahamba ngakhuphuka ngayokulwa nemaLamani. Futsi kwenteka kutsi sahamba sakhuphuka ngemandla eNkhosi sayokulwa.

11 Manje, emaLamani bekangati lutfo mayelana neNkhosi, noma ngemandla eNkhosi, ngako-ke bebancike emandleni abo lucobo. Noko bebabantfu labanemandla, ngekwemandla ebantfu.

12 Bekatidlova, anelunya, futsi abantfu labomele ingati, akholelwa emasikweni abokhokho bawo, labengukutsi—Akholelwa kutsi wona akhishwa eveni laseJerusalema ngenca yebubi baboyise, futsi nekutsi wona aphatfwa kabi ehlane bomnakabo, ngetulu kwaloko aphatfwa kabi ngesikhatsi adzabula lwandle;

13 Ngetulu kwaloko, nekutsi wona aphatfwa kabi ngesikhatsi aseveni lekucala lebelilifa lawo, emvakwekutsi sekadzabule lwandle, futsi konkhe loku kungenca yekutsi Nefi bekatsembekile kakhulu ekugcineni imiyaleto yeNkhosi—ngako-ke bekatsandvwa yiNkhosi, ngoba iNkhosi yayiyiva imithandazo yakhe futsi iyiphendvula, phindze wahamba embili kulo luhambo lwabo ehlane.

14 Bomnakabo bamtfukutselela ngenca yekutsi bebangacondzi ngetento teNkhosi; ngetulu kwaloko bamtfukutselela emantini ngenca yekutsi batenta lukhuni tinhlitiyo tabo ngalokumelene neNkhosi.

15 Ngetulu kwaloko, bamtfukutselela ngesikhatsi sebafike eveni lesetsembiso, ngenca yekutsi batsi yena utsatse kuphatfwa kwebantfu etandleni tabo; futsi bebafuna kumbulala.

16 Ngetulu kwaloko, bamtfukutselela ngenca yekutsi wesuka waya ehlane njengoba iNkhosi beyimyaletile, futsi watsatsa imibhalo lebeyicoshwe kubongcwengcwe belitfusi, ngoba batsi wabaphanga.

17 Ngaloko afundzise bantfwana bawo kutsi babatondze, nekutsi bababulale, nekutsi babagebenge baphindze babaphange, futsi bente konkhe labebangakwenta kutsi bababhubhise; ngako-ke banentondvo yaphakadze kubantfwana baNefi.

18 Ngoba ngaso lesi sizatfu inkhosi Lamani, ngemacebo akhe, kanye nebucili bemanga akhe, kanye netetsembiso takhe letihle, wangikhohlisa, kutsi ngite ngiletse labantfu bami kulelive, kute bababhubhise; yebo, futsi sihluphekile leminyaka leminingi sikulelive.

19 Manje mine, Zenifi, emvakwekutsi sengitishito tonkhe leti tintfo kubantfu bami mayelana nemaLamani, ngabavusetela kutsi bahambe bayokulwa ngemandla abo, babeke litsemba labo eNkhosini; ngako-ke, salwa nawo, buso nebuso.

20 Futsi kwenteka kutsi sawacosha aphuma eveni letfu; futsi sawabulala ngekubulala lokukhulu, aba maningi kangangekutsi asiwabalanga.

21 Futsi kwenteka kutsi saphindze sabuyela eveni letfu, nebantfu bami baphindze bacala kwelusa imihlambi yabo, kanye nekulima umhlabatsi wabo.

22 Manje mine, sengimdzala, ngawuniketa umbuso kumunye wemadvodzana ami; ngako-ke, angisasho lutfo. Futsi shengatsi iNkhosi ingababusisa bantfu bami. Amen.