Sehluko 27
Mosiya uyakwala kuhluphana uyaleta kutsi kube khona kulingana—Alima lomncane kanye nemadvodzana lamane aMosiya bafuna kubhubhisa Libandla—Ingilosi iyachamuka futsi ibayaleta kutsi bayiyekele indlela yabo yebubi—Alima ushaywa abe simungulu—Bonkhe bantfu kufanele batalwe kabusha kute bazuze insindziso—Alima kanye nemadvodzana aMosiya bamemetela tindzaba letitfokotisako. Cishe ngemnyaka wa 100 kuya kuwa 92 ngaphambi kwekutalwa kwaKhristu.
1 Manje kwenteka kutsi kuhlushwa lokwatfwaliswa libandla ngulabangakholwa kwaba kukhulu kakhulu kangangekutsi libandla lacala lavungama, lakhonona kubaholi balo mayelana naloludzaba; bakhonona naku-Alima. Futsi Alima walubeka ludzaba phambi kwenkhosi yabo, Mosiya. Mosiya wabonisana nebaphristi bakhe.
2 Futsi kwenteka kutsi inkhosi Mosiya yatfumela simemetelo kulo lonkhe live jikelele kutsi kube bete muntfu longakholwa lotawuhlupha noma ngubani walabo labebabelibandla laNkulunkulu.
3 Futsi kwaba khona umyalo locinile kuwo onkhe emabandla jikelele wekutsi kube bete kuhluphana emkhatsini wabo, nekutsi kufanele kube khona kulingana emkhatsini wabo bonkhe bantfu;
4 Nekutsi bangavumeli kutigcabha nekutikhukhumeta kuphatamise kuthula kwabo; nekutsi wonkhe umuntfu akamatise makhelwane wakhe njengoba atatisa yena, basebente ngetandla tabo lucobo kutondla bona.
5 Yebo, futsi bonkhe baphristi kanye nebafundzisi babo kufanele basebente ngetandla tabo lucobo kute batondle bona, ngaso sonkhe sikhatsi ngaphandle nangabe bagula, noma badzinga kakhulu; futsi ngekwenta leti tintfo, bagcwaliswa ngemusa waNkulunkulu.
6 Kwacala kwaba nekuthula lokukhulu futsi eveni; nebantfu bacala kuba baningi kakhulu, bacala kuhlakateka ndzawotonkhe emhlabeni wonkhe, yebo, enyakatfo kanye naseningizimu, emphumalanga kanye nasenshonalanga, bakha emadolobha lamakhulu kanye nemadolobhana kowo onkhe emagumbi lamane elive.
7 Futsi iNkhosi yabavakashela yaphindze yabaphumelelisa, baba baningi futsi baba bantfu labanotsile.
8 Manje emadvodzana aMosiya bekabalwa kanye nalabo labebangakholwa; futsi ngalokunjalo namunye wemadvodzana a-Alima bekabalwa nabo, abitwa ngekutsi ngu-Alima, lekulibito leyise; noko waba yindvodza lekhohlakele kakhulu futsi akhonta tithico. Futsi bekayindvodza leyayinebuciko, waphindze wabayenga kakhulu bantfu; ngako-ke wahola labaningi bantfu kutsi bente ngendlela yebubi bakhe.
9 Futsi waba ngulesikhulu sivimbelo ekutfutfukeni kwelibandla laNkulunkulu; antjontja tinhlitiyo tebantfu; abanga kuphikisana lokukhulu emkhatsini webantfu; aniketa litfuba sitsa saNkulunkulu kutsi sisebentise emandla aso ngetulu kwabo.
10 Manje kwenteka kutsi ngesikhatsi ahamba azulazula acitsa libandla laNkulunkulu, ngoba bekahamba ngansense azulazula kanye nemadvodzana aMosiya afuna kucitsa libandla, futsi afuna kudukisa bantfu beNkhosi, ngekuphikisana nemiyaleto yaNkulunkulu, noma nenkhosi—
11 Futsi njengoba ngitse kini, njengoba bebahamba bazulazula bavukela Nkulunkulu, buka ingilosi yeNkhosi yavela kubo; yehla shengatsi yayiselifini; yakhuluma shengatsi kwakulivi lekudvuma kwelitulu, lelenta kutsi umhlaba labebeme kuwo utamatame.
12 Futsi kwaba kukhulu kwetfuka kwabo, kangangekutsi bawela phansi, futsi abazange bawacondze lawo mavi leyawakhuluma nabo.
13 Noko yaphindze yamemeta, itsi: Alima, vuka ute ngaphambili, ngoba kungani uhlupha libandla laNkulunkulu na? Ngoba iNkhosi itse: Leli libandla lami, ngitawulimisa; futsi kute intfo leyawulicitsa, ngaphandle kwekutsi kube tiphambeko tebantfu bami.
14 Ngetulu kwaloko, ingilosi yatsi: Buka, iNkhosi iyivile imithandazo yebantfu bayo, futsi ngalokunjalo nemithandazo yenceku yayo, Alima, longuyihlo; ngoba uthandaze ngelukholo lolukhulu mayelana nawe kutsi uletfwe elwatini leliciniso; ngako-ke, ngalena nhloso ngite kutokwenelisa ngemandla kanye neligunya laNkulunkulu, kute imithandazo yetinceku takhe iphendvuleke ngekwelukholo lwabo.
15 Manje buka, ungawangabata yini emandla aNkulunkulu na? Ngoba buka, ngabe livi lami alitamatamisi umhlaba yini? Futsi ngetulu kwaloko awungiboni yini phambi kwakho na? Futsi ngitfunyiwe ngivela kuNkulunkulu.
16 Manje ngitsi kuwe: Hamba, ukhumbule kutfunjwa kwaboyihlo eveni laseHilamu, kanye naseveni laNefi; futsi ukhumbule kutsi tinkhulu kanganani tintfo labentele tona; ngoba bebasekutfunjweni, futsi ubakhululile. Manje ngitsi kuwe, Alima, hamba ngendlela yakho, ungaphindzi ufune kubhubhisa libandla, kute imithandazo yabo iphendvulwe, noma ngabe wena lucobo lwakho utawufuna kulahlwa.
17 Manje kwenteka kutsi lawa kwakungemavi ekugcina ingilosi leyawakhuluma ku-Alima, yase iyahamba.
18 Manje Alima kanye nalabo bekanabo baphindze bawela phansi, ngoba kwaba kukhulu kwetfuka kwabo, ngoba ngewabo emehlo bebabone ingilosi yeNkhosi; futsi livi layo lalinjengekudvuma kwelitulu, lelatamatamisa umhlaba, futsi bati kutsi kwakute lutfo lolwalungatamatamisa umhlaba ngaphandle kwemandla aNkulunkulu futsi ente kutamatame shengatsi kwakutohlukana ekhatsi.
19 Manje kwetfuka kwa-Alima kwaba kukhulu kakhulu kangangekutsi waphendvuka simungulu, kangangekutsi akakwatanga kuvula umlomo wakhe; yebo, futsi waba butsakatsaka, ngendlela yekutsi akakwatanga ngisho nekunyakatisa tandla takhe; ngako-ke watsatfwa ngulabo labekanabo, wetfwalwa angakhoni ngisho kwentani, wate wayawubekwa phambi kweyise.
20 Futsi balandzisa kuyise konkhe lokwakwentekile kubo; neyise watfokota, ngoba bekati kutsi kwakungemandla aNkulunkulu.
21 Wenta kutsi sicuku sibutsane ndzawonye kute sibone kutsi iNkhosi iyenteleni indvodzana yakhe, kanjalo nalabo labebanayo.
22 Wenta kutsi baphristi babutsane ndzawonye; bacala kuzila kudla, kanye nekuthandaza eNkhosini Nkulunkulu wabo kutsi ivule umlomo wa-Alima, kute akhulume, futsi ngalokunjalo nekutsi emalunga akhe atfole emandla awo—kute emehlo ebantfu avuleke kutsi babone bphindze bati ngebuhle kanye nenkhatimulo yaNkulunkulu.
23 Futsi kwenteka kutsi emvakwekutsi sebazile kudla futsi bathandaza sikhatsi lesitinsuku letimbili kanye nebusuku lobubili, emalunga a-Alima atfola emandla awo, wasukuma wacala kukhuluma kubo, wabancenga kutsi badvudvuteke.
24 Ngoba, watsi, sengiphendvukile etonweni tami, futsi sengihlengwe yiNkhosi; bukani sengitelwe ngekwakaMoya.
25 Futsi iNkhosi itse kimi: Ungamangali kutsi bonkhe bantfu, yebo, besilisa nebesifazane, tive tonkhe, imindeni, tilimi kanye nebantfu, kufanele batalwe kabusha; yebo, batalwe ngekwakaNkulunkulu, bashintje esimeni sabo sekunaka inyama nesekuwa, babe sesimeni sekulunga, bahlengwe nguNkulunkulu, babe ngemadvodzana nemadvodzakati akhe.
26 Futsi ngalendlela baba tidalwa letinsha; futsi ngaphandle kwekutsi bente loku, kute ngisho nalencane indlela kutsi badle lifa lembuso waNkulunkulu.
27 Ngitsi kini, ngaphandle kwekutsi kube njalo, kufanele balahlwe; futsi loku ngiyakwati, ngenca yekutsi ngicishe ngalahlwa.
28 Noko, emvakwekwendlula ekuhluphekeni lokukhulu, ngiphendvuka ngisondzele ekufeni, iNkhosi lenemusa ibone kufanele kutsi ingihlwitse ngiphume ekusheni kwaphakadze, futsi sengitelwe ngekwakaNkulunkulu.
29 Umphefumulo wami uhlengiwe enyongweni lebabako nasetinketaneni tebubi. Ngangisemhumeni lomnyama bhuce; kodvwa manje sengibona kukhanya lokumangalisako kwaNkulunkulu. Umphefumulo wami wawuhlushwe buhlungu baphakadze; kodvwa ngihlwitsiwe, futsi umphefumulo wami awusenabuhlungu.
30 Ngamlahla uMhlengi wami, futsi ngakuphika naloko lokwakukhulunywe bobabe betfu; kodvwa manje kute babone kutsi utawufika, futsi nekutsi uyatikhumbula tonkhe tidalwa latibumbile, utawutiveta kubo bonkhe.
31 Yebo, onkhe emadvolo ayawukhotsama, futsi tonkhe tilimi tiyawuvuma phambi kwakhe. Yebo, nangelusuku lwekugcina, ngesikhatsi bonkhe bantfu bayawukuma kutsi behlulelwe nguye, ngaleso sikhatsi bayawuvuma kutsi yena nguNkulunkulu; ngaleso sikhatsi bayawuvuma, labo labangakholwa kuNkulunkulu emhlabeni, kutsi kwehlulela kwesijeziso saphakadze kulungile kubo; futsi bayawutfutfumela, bachachatele, futsi bashwaphane ngaphansi kwekubona kweliso lakhe lelibona konkhe.
32 Manje kwenteka kutsi Alima wacala kusukela ngalesi sikhatsi kuya phambili kutsi afundzise bantfu, kanye nalabo labebana-Alima ngesikhatsi ingilosi ichamuka kubo, bahamba batungeleta live, bamemetela kubo bonkhe bantfu tintfo labebativile futsi batibonile, futsi bashumayela livi laNkulunkulu ekuhluphekeni lokukhulu, bahlushwa kakhulu ngulabo labebangakholwa, bashaywa ngulabaningi babo.
33 Kodvwa nanoma kungenca yako konkhe loku, banika indvudvuto lenkhulu ebandleni, bacinisa lukholo lwabo, futsi babancusa ngekumela bulukhuni kanye nangekuhlupheka lokukhulu kutsi bagcine imiyaleto yaNkulunkulu.
34 Futsi labane babo kwakungemadvodzana aMosiya; emabito abo kwakungu-Amoni, na-Aroni, na-Omineri kanye naHimini; lawa kwakungemabito emadvodzana aMosiya.
35 Futsi bahamba balicedza lonkhe live laseZarahemla, nasemkhatsini wabo bonkhe bantfu labebangaphansi kwekubuswa yinkhosi Mosiya, ngekutikhandla betama kulungisa konkhe konakala labebakwentile ebandleni, bavuma tonkhe tono tabo, futsi bamemetela tonkhe tintfo labebatibonile, futsi bachaza tiphrofetho kanye nemibhalo lengcwele kubo bonkhe labebanesifiso sekukuva.
36 Futsi ngalendlela baba tikhali etandleni taNkulunkulu ekuletseni labaningi elwatini lweliciniso, yebo, elwatini lweMhlengi wabo.
37 Futsi babusiswe kangakanani! Ngoba bakumemetela kuthula; batimemetela tindzaba letimnandzi tebuhle; futsi bamemetela ebantfwini kutsi iNkhosi iyabusa.