1 Manje emvakwekutsi Mosiya sekakwentile loku watfumela kulo lonkhe live, kubo bonkhe bantfu, anesifiso sekwati intsandvo yabo mayelana nekutsi ngubani lobekatoba yinkhosi yabo.

2 Futsi kwenteka kutsi livi lebantfu lefika, litsi: Sinesifiso sekutsi Aroni indvodzana yakho ibe yinkhosi yetfu kanye nembusi wetfu.

3 Manje Aroni bekahambile wakhuphukela eveni laNefi, ngako-ke inkhosi ayikhonanga kuniketa umbuso kuye; futsi naye Aroni akawemukelanga umbuso; futsi akubanga khona namunye kumadvodzana aMosiya lobekatimisele kutsatsa umbuso.

4 Ngako-ke inkhosi Mosiya yaphindza yatfumela kubantfu; yebo, yatfumela nangelivi lelibhaliwe kubantfu. Futsi lawa ngemavi labekabhaliwe, atsi:

5 Bukani, Awu nine bantfu bami, noma bomnaketfu, ngoba nginitsatsa kanjalo, ngifisa kutsi nisicabange simo lenibitelwe kutsi nisicabange—ngoba ninesifiso sekutsi nibe nenkhosi.

6 Manje ngimemetela kini kutsi loyo lokunguye lonelilungelo lembuso walile, futsi angeke awutsatse umbuso.

7 Manje uma kungaba khona lomunye longabekwa esikhundleni sakhe, bukani ngesaba kutsi kuyawuvuka imibango emkhatsini wenu. Futsi ngubani lowatiko kumbe indvodzana yami, umbuso lekufanele ube ngewayo, iyawushintja itfukutsele futsi idvonsele khashane incenye yalaba bantfu bete kuyo, lokuyawudala timphi kanye nemibango emkhatsini wenu, lokuyawuba sizatfu sekucitsa ingati leningi kanye nekugucula indlela yeNkhosi, yebo, futsi kubhubhise imiphefumulo yalabaningi bantfu.

8 Manje ngitsi kini asihlakaniphe siphindze sicabange ngaleti tintfo, ngoba asinalo lilungelo lekubulala indvodzana yami, futsi akukafaneli sibe nelilungelo noma liphi lekutsi sibulale lomunye uma angabekwa esikhundleni sayo.

9 Futsi uma indvodzana yami ingaphindza ibuyele ekutichenyeni kwayo kanye nasetintfweni letinye iyawutihocisa tintfo leyatisho, futsi bese ifuna lilungelo layo lembuso, loko lokuyawuyenta futsi ngalokunjalo nalaba bantfu kutsi bente tono letiningi.

10 Manje asihlakaniphe futsi sibuke embili kuleti tintfo, futsi sente loko lokutawenta kuthula kwalaba bantfu.

11 Ngako-ke ngitawuba yinkhosi yenu etinsukwini tami letisele; noko, asibeke behluleli, kutsi behlulele laba bantfu ngekwemtsetfo wetfu; futsi sitawutihlela kabusha tindzaba talabantfu, ngoba sitawubeka bantfu labahlakaniphile kutsi babe behluleli, labatawukwehlulela laba bantfu ngekwemiyaleto yaNkulunkulu.

12 Manje kuncono kutsi umuntfu ehlulelwe ngekwakaNkulunkulu kunekutsi kube ngekwemuntfu, ngoba tehlulelo taNkulunkulu tihlale tilungile njalo, kodvwa tehlulelo temuntfu atihlali tilungile njalo.

13 Ngako-ke, uma bekungenteka kutsi nibe nemadvodza lalungile kutsi abe ngemakhosi enu, layawumisa imitsetfo yaNkulunkulu, futsi ehlulele laba bantfu ngekwemiyaleto yakhe, yebo, uma beningakwati kutsi nibe nemadvodza abe ngemakhosi enu langenta njengoba babe Bhenjamini abentela laba bantfu—ngitsi kini, uma loku bekungase kuhlale kunjalo bekuyawuba kuhle kutsi nibe nemakhosi kutsi abuse ngetulu kwenu njalonjalo.

14 Futsi nanami lucobo lwami ngisebentile ngawo onkhe emandla kanye netikhwepha lenginato, kutsi nginifundzise imiyaleto yaNkulunkulu, futsi ngakhe kuthula kulo lonkhe live, kute kungabi khona timphi nemibango, nekweba, nekuphanga, noma nanoma hlobo luni lwebubi;

15 Futsi loyo lowente bubi, ngimjezisile njengekwelicala lelo lalentile, ngekwemtsetfo loyo lesiniketwe wona bobabe betfu.

16 Manje ngitsi kini, ngenca yekutsi bonkhe bantfu abakalungi akukafaneli kutsi nibe nenkhosi noma emakhosi kutsi abuse ngetulu kwenu.

17 Ngoba bukani, buningi kangakanani bubi inkhosi lembi yinye leyenta kutsi bentiwe, yebo, futsi kukhulu kangakanani kubhujiswa!

18 Yebo, khumbulani inkhosi Nowa, bubi bayo kanye netinengiso tayo, futsi ngalokunjalo nebubi kanye netinengiso tebantfu bayo. Bukani kukhulu kangakanani kubhujiswa lokwafika etikwabo; ngetulu kwaloko ngenca yebubi babo baletfwa ebugcilini.

19 Futsi kube bekungasiko kutsi bekungenca yekulanyulelwa nguMdali wabo lonekuhlakanipha konkhe, futsi loku ngenca yekuphendvuka kwabo kweliciniso, bekufanele basale ngalokungenakuvinjelwa ebugcilini kute kube manje.

20 Kodvwa bukani, wabakhulula ngenca yekutsi batitfoba phambi kwakhe; futsi ngenca yekutsi bakhala kakhulu kuye wabakhulula wabakhipha ebugcilini; futsi iNkhosi isebenta kanjalo ngemandla ayo kuto tonkhe timo emkhatsini webantfwana bebantfu, yelula sandla semusa kulabo lababeka litsemba labo kuyo.

21 Futsi bukani, manje ngitsi kini, aninakuyisusa esihlalweni inkhosi lenebubi ngaphandle kwekutsi kube khona umbango lomkhulu, kanye nekucitseka kwengati leningi.

22 Ngoba bukani, inebangani bayo ebubini, futsi igcina labayigadzako edvute nayo; futsi idzabula imitsetfo yalabo lababuse ngekulunga phambi kwayo; futsi inyatsela ngaphansi kwetinyawo tayo imiyaleto yaNkulunkulu.

23 Imisa imitsetfo, iyitfumele kubantfu bayo, yebo, imitsetfo lehambisana nenkhohlakalo yayo lucobo; futsi loyo longayilaleli imitsetfo yayo yenta kutsi abulawe; futsi labo labayivukelako itawutfumela emabutfo ayo kubo kutsi ayokulwa, futsi uma kungenteka itawubabulala; futsi inkhosi lengakalungi itigucukela kanjalo-ke tindlela tako konkhe kulunga.

24 Manje bukani ngitsi kini, akukafaneli kutsi tinengiso letinjena tite etikwenu.

25 Ngako-ke, khetsani ngelivi lalabantfu, behluleli, kute nehlulelwe ngekwemitsetfo leyo leninikwe yona bobabe betfu, lelungile, futsi labebaniketwe yona ngesandla seNkhosi.

26 Manje akukajwayeleki kutsi livi lebantfu lifise nanoma yini lengahambisani naloko lokulungile; kodvwa kujwayelekile kutsi incenye lencane yebantfu ifise loko lokungakalungi; ngako-ke loku kutofanele nikugcine niphindze nikwente umtsetfo wenu—kutsi nente umsebenti wenu ngelivi lebantfu.

27 Futsi uma sikhatsi sesifika lapho livi lebantfu likhetsa bubi, ngaleso sikhatsi kutawuba sikhatsi lapho tehlulelo taNkulunkulu titawufika etikwenu; yebo, kutawuba sikhatsi lapho atawunivakashela ngekubhujiswa lokukhulu njengoba alivakashele lelive.

28 Manje uma ninebehluleli, futsi banganehluleli ngekwemtsetfo loyo lobekiwe, ningenta kutsi behlulelwe ngumehluleli lomhkulu.

29 Uma behluleli benu labakhulu bangahluleli ngetehlulelo letilungile, niyawukwenta kutsi sibalo lesincane sebehluleli benu labancane bahlangane ndzawonye, futsi bayawukwehlulela behluleli benu labakhulu, ngekwelivi lebantfu.

30 Futsi ngiyaniyala kutsi nente leti tintfo ngekwesaba iNkhosi; futsi ngiyaniyala kutsi nitente leti tintfo, nekutsi ningabi nenkhosi; kute kutsi uma laba bantfu benta tono kanye nebubi bayawubutwa etikwetinhloko tabo.

31 Ngoba bukani ngitsi kini, tono tebantfu labaningi tentiwa bubi bemakhosi abo; ngako-ke bubi babo bubutwa etikwetinhloko temakhosi abo.

32 Manje ngifisa kutsi loku kungalingani kungabe kusaba khona kulelive, ikakhulukati emkhatsini walabantfu bami; kodvwa ngifisa kutsi lelive libe live lenkhululeko, futsi wonkhe umuntfu atfokotele emalungelo akhe kanye nematfuba ngalokufanako, kuphela nje uma inkhosi isabona kulungile kutsi siphile futsi silitfole lelive njengelifa, yebo, kuphela nje uma ngabe noma ngubaphi betitukulwane tetfu letitako basesele eveni lonkhe.

33 Futsi tiningi kakhulu tintfo inkhosi Mosiya leyababhalela tona, yabambulela konkhe kuhlupheka kanye netinkinga tenkhosi lelungile, yebo, konkhe kushikashikeka kwemphefumulo ngebantfu bayo, futsi ngalokunjalo nako konkhe kuvungama kwebantfu enkhosini yabo; futsi wabachazela ngako konkhe.

34 Futsi wabatjela kutsi leti tintfo akukafaneli kutsi tibe khona; kodvwa kutsi umtfwalo kufanele ubewebantfu bonkhe, kute wonkhe umuntfu atitfwalele incenye yakhe.

35 Futsi ngetulu kwaloko wabembulela ngato tonkhe timo letimbi labasebenta ngaphansi kwato, ngekuba nenkhosi lengakalungi lebusako ngetulu kwabo;

36 Yebo, bonkhe bubi kanye netinengiso tayo, nato tonkhe timphi, nemibango, nekucitseka kwengati, nekweba, nekuphanga, nekwenta bugwadla, kanye nalo lonkhe luhlobo lwebubi lolungenakubalwa—abatjela kutsi leti tintfo akukafaneli tibe khona, nekutsi kwakucacile kutsi tatinengekile emiyaletweni yaNkulunkulu.

37 Futsi Manje kwenteka, emvakwekutsi inkhosi Mosiya seyititfume letintfo emkhatsini webantfu beneliswa ngeliciniso lemavi akhe.

38 Ngako-ke batiyekela tifiso tabo tekuba neNkhosi, bacala baba nenshisekelo lenkhulu yekutsi wonkhe umuntfu abe nelitfuba lelilinganako kulo lonkhe live; yebo, futsi wonkhe umuntfu wavakalisa kutimisela ngekutiphendvulela ngetono takhe.

39 Ngako-ke, kwenteka kutsi babutsana ndzawonye ngemacembu kulo lonkhe live, kutsi batovakalisa emavi abo mayelana nekutsi bobani labangaba behluleli babo, kutsi babehlulele ngekwemtsetfo loyo labebaniketwe wona; futsi bajabula kakhulu ngenca yenkhululeko labebaniketwe yona.

40 Futsi bakhula bacina ekumtsandzeni Mosiya; yebo, bamphakamisa kakhulu kunawo wonkhe lomunye umuntfu; ngoba bebangamboni njengemcindzeteli lobekafuna kuzuza, yebo, inzuzo leyo leyonakalisa umphefumulo; ngoba akabitanga ingcebo kubo, noma atfokote ngekucitseka kwengati; kodvwa wenta kutsi kube khona kuthula eveni, futsi wabaniketa bantfu bakhe kutsi bakhululwe kulo lonkhe luhlobo lwebugcili; ngako-ke bamphakamisa, yebo, kakhulu, ngetulu kwekungalinganiswa.

41 Futsi kwenteka kutsi bababeka behluleli kutsi babuse ngetulu kwabo, noma kutsi babehlulele ngekwemtsetfo; futsi loku bakwenta kulo lonkhe live.

42 Futsi kwenteka kutsi Alima wabekwa kutsi abe ngumehluleli lomkhulu wekucala, futsi ngetulu kwaloko angumphristi lomkhulu, uyise amnikile leso sikhundla, futsi amnikete ligunya mayelana nato tonkhe tindzaba telibandla.

43 Manje kwenteka kutsi Alima wahamba etindleleni teNkhosi, futsi wayigcina imiyaleto yayo, futsi wehlulela tehlulelo letilungile; futsi kwaba khona kuthula njalo eveni lonkhe.

44 Kwacala kanjalo-ke kubusa kwebehluleli kulo lonkhe live laseZarahemla, emkhatsini wabo bonkhe bantfu labo labebabitwa ngemaNefi; Futsi Alima bekangumehluleli wekucala futsi lomkhulu.

45 Manje kwenteka kutsi uyise wafa, aneminyaka lengemashumi lasiphohlongo nakubili budzala, ahlalile kuyigcwalisa imiyaleto yaNkulunkulu.

46 Futsi kwenteka kutsi Mosiya wafa naye ngalokunjalo, ngemnyaka wemashumi lamatsatfu nakutsatfu wekubusa kwakhe, aneminyaka lengemashumi lasitfupha nakutsatfu budzala; lokwenta sekuhlangene, iminyaka lengemakhulu lasihlanu nemfica kusukela ngesikhatsi Lehi ashiya eJerusalema.

47 Futsi kwaphela kanjalo-ke kubusa kwemakhosi ebantfwini baNefi; futsi taphela kanjalo-ke netinsuku ta-Alima, lobekangumsunguli welibandla labo.