Umbhalo waZenifi—Umlandvo ngebantfu bakhe, kusukela ngesikhatsi bashiya eveni laseZarahemla kute kube sikhatsi lapho bakhululwa etandleni temaLamani.
Utfolakala etahlukweni 9 kuya ku 22.
Sehluko 9
Zenifi uhola licembu lelisuka eZarahemla kuyotsatsa live lemaLehi-Nefi—Inkhosi yemaLamani ibavumela kutsi balitsatse live njengelifa labo—Kukhona imphi emkhatsini wemaLamani kanye nebantfu baZenifi. Cishe ngemnyaka wa 200 kuya kuwa 187 ngaphambi kwekutalwa kwaKhristu.
1 Mine, Zenifi, ekubeni ngifundzisiwe ngalo lonkhe lulwimi lwemaNefi, nginelwati ngelive laNefi, noma live lelilifa lekucala labobabe betfu, futsi ekubeni ngitfunywe njengenhloli emkhatsini wemaLamani kute ngihlole emabutfo awo, kute libutfo letfu litseleke etikwawo phindze liwabhubhise—kodvwa ngesikhatsi ngibona loko lokwakukuhle emkhatsini wabo ngaba nesifiso sekutsi angabhujiswa.
2 Ngako-ke ngaphikisana nabomnaketfu ehlane, ngoba ngangifuna kutsi umbusi wetfu ente sivumelwano nawo; kodvwa ngenca yekutsi bekanelulaka futsi angumuntfu lowomela ingati wayaleta kutsi ngibulawe; kodvwa ngasindziswa kucitseka kwengati leningi; ngoba babe walwa nababe, umnakabo nemnakabo, kwate kwatsi sibalo lesikhulu selibutfo letfu labhujiswa ehlane; futsi sabuyela, labo betfu lebesisindzile, eveni laseZarahemla, kutsi siyolandzisa leyo ndzaba kubafati babo kanye nakubantfwana babo.
3 Futsi noko, mine nginenshisekelo lenkhulu yekutfola njengelifa live labobabe betfu, ngagcogca labaningi labebafisa kukhuphuka kuyotsatsa lelo live, futsi saphindze sacala luhambo lwetfu ehlane kukhuphukela eveni, kodvwa sabulawa yindlala kanye netinhlupheko letibuhlungu; ngoba sasephuta kukhumbula iNkhosi Nkulunkulu wetfu.
4 Noko, emvakwetinsuku letiningi sizulazula ehlane samisa emathende etfu endzaweni lapho bomnaketfu bebabulawelwe khona leyayisedvute nelive labo babe betfu.
5 Futsi kwenteka kutsi ngaphindza ngahamba nalamane emadvodza ami kuya edolobheni, saya enkhosini, kute ngati simo senkhosi, nekutsi ngati kutsi ngangingangena yini nebantfu bami futsi ngilitsatse live ngekuthula.
6 Ngangena ngaya enkhosini, futsi yavumelana nami kutsi ngingalitsatsa live lemaLehi-Nefi, kanye nelive laseShilomu.
7 Ngetulu kwaloko yayaleta kutsi bantfu bayo besuke kulelo live, kwatsi mine nebantfu bami sahamba saya kulelive kute silitsatse.
8 Sacala kwakha takhiwo, kanye nekulungisa tindvonga telidolobha, yebo, tindvonga telidolobha lemaLehi-Nefi, kanye nelidolobha laseShilomu.
9 Sacala kulima umhlaba, yebo, ngato tonkhe tinhlobo tetinhlanyelo, ngetinhlanyelo temmbila, netakolo, netemabele, netinesi, neteshemu, kanye netinhlanyelo tayo yonkhe inhlobo yetitselo; futsi sacala kwandza saphindze saphumelela eveni.
10 Manje kwakungemacebo kanye nebucili benkhosi Lamani, kutsi iletse bantfu bami ebugcilini, kutsi iyekele lelive kute silitsatse.
11 Ngako-ke kwenteka, kutsi emvakwekutsi sesihleli kulelive sikhatsi lesiyiminyaka lelishumi nakubili inkhosi Lamani yacala kukhatsateka, hleze bantfu bami bakhule bacine kulelive, futsi nekutsi bebangeke basakhona kubancoba baphindze babaletse ebugcilini.
12 Manje emaLamani bekabantfu labebangemavila futsi bakhonta tithico; ngako-ke bebanesifiso sekutsi basiletse ebugcilini, kute batitike ngemisebenti yetandla tetfu; yebo, kute batondle emihlanjini yemasimu etfu.
13 Ngako-ke kwenteka kutsi inkhosi Lamani yacala kuphehla bantfu bayo kutsi balwe nebantfu bami; ngako-ke kwacala kwaba khona timphi kanye nemibango kulelo live.
14 Ngoba, ngemnyaka welishumi nakutsatfu wekubusa kwami eveni laNefi, khashane eningizimu yelive laseShilomu, ngesikhatsi bantfu bami banatsisa baphindze badlisa imihlambi yabo, balima imihlaba yabo, libutfo lelikhulu lemaLamani latseleka etikwabo lacala kubabulala, nekubatsatsela imihlambi yabo, kanye nemmbila wemasimu abo.
15 Yebo, futsi kwenteka kutsi babaleka, bonkhe labo labangazange batfolwe, babalekela edolobheni laNefi, futsi bangicela kutsi ngitobavikela.
16 Futsi kwenteka kutsi ngabahlomisa ngebutjoki, nangemicibisholo, nangetinkemba, nangabocelemba, nangetagila, nangetilingi, kanye nangato tonkhe tinhlobo tetikhali lesasingatakha, futsi mine nebantfu bami sahamba sayolwa nemaLamani.
17 Yebo, ngemandla eNkhosi sahamba sayolwa nemaLamani; ngoba mine nebantfu bami sakhala kakhulu eNkhosini kutsi isikhulule etandleni tetitsa tetfu, ngoba sabese sivuselwa kukhumbula ngekukhululwa kwabobabe betfu.
18 Nkulunkulu wakuva kukhala kwetfu futsi wayiphendvula imithandazo yetfu; sahamba ngemandla akhe, yebo, sahamba sayolwa nemaLamani, futsi ngelusuku lunye kanye nebusuku sabulala tinkhulungwane letintsatfu nemashumi lamane nakutsatfu; sawabulala sate sawacosha sawakhiphela ngephandle kwelive letfu.
19 Futsi mine, lucobo lwami, ngetami tandla, ngasita kungcwaba labafile bawo. Buka, ngekudzabuka lokukhulu kanye nekulila, emakhulu lamabili nemashumi lasikhombisa nemfica abomnaketfu babulawa.