1 Manje, kwenteka kutsi emvakwekutsi Abinadi sekakhulume lamavi welula sandla sakhe watsi: Sikhatsi siyeta lapho bonkhe bayawuyibona insindziso yeNkhosi; lapho tonkhe tive, imindeni, tilimi, kanye nebantfu bayawubona ngewabo emehlo futsi bayawuvuma phambi kwaNkulunkulu kutsi tehlulelo takhe tilungile.

2 Futsi ngaleso sikhatsi lababi bayawucoshwa, futsi bayawukuba nesizatfu sekuhhewula, nesekukhala, nesekulila, kanye nesekugedletela kwematinyo abo; futsi loku kuyawuba ngenca yekutsi abalilalelanga livi leNkhosi; ngako-ke iNkhosi ayibahlengi.

3 Ngoba banaka inyama futsi banebudeveli, futsi develi unemandla ngetulu kwabo; yebo, leyo nyoka lendzala leyakhohlisa batali betfu bekucala, leyaba sizatfu sekuwa kwabo; lokwaba sizatfu seluntfu lonkhe kutsi lunake inyama, nemizwa, lube nebudeveli, lwati lokubi kulokuhle, lwatibeka ngaphansi kwekulawulwa ngudeveli.

4 Ngaleyondlela lonkhe luntfu lwalahleka; buka, lwaluyawulahleka ngalokungapheli kube bekungasiko kutsi Nkulunkulu wabahlenga bantfu bakhe ekulahlekeni kwabo kanye nasesimeni sabo sekuwa.

5 Kodvwa khumbulani kutsi loyo lophikelelako esimeni sakhe semvelo yasemhlabeni, achubeke etindleleni tesono futsi ahlubuke kuNkulunkulu, uhlala asesimeni sakhe sekuwa futsi develi uba nemandla onkhe ngetulu kwakhe. Ngako-ke kuye kuba shengatsi akutange kute kube khona kuhlengwa lokwentiwa, asitsa saNkulunkulu; futsi ngalokunjalo nadeveli usitsa saNkulunkulu.

6 Futsi kube Khristu akazange ete emhlabeni, ngikhuluma ngetintfo letisatokwenteka shengatsi setentekile, bekungeke kube khona kuhlengwa.

7 Futsi kube Khristu akazange avuke kulabafile, noma adzabule tibopho tekufa kute lithuna lingabi nekuncoba, futsi nekutsi kufa kungabi neludvonsi, bekungeke kube khona kuvuka.

8 Kodvwa kukhona kuvuka, ngako-ke lithuna lite kuncoba, futsi ludvonsi lwekufa lugwinywe kuKhristu.

9 Ukukhanya kanye nekuphila kwemhlaba; yebo, ukukhanya lokungapheli, lokungeke kufiphaliswe nanini; yebo, futsi ngalokunjalo nemphilo lengapheli, kute kungabe kusaba khona kufa nanini.

10 Naloko lokubhubhako kuyawugcoka kungabhubhi; naloko lokubolako kuyawugcoka kungaboli, futsi kuyawuletfwa kutsi kume phambi kwesihlalo saNkulunkulu, kute kwehlulelwe nguye njengekwemisebenti yabo noma ngabe mihle noma ngabe mibi—

11 Uma imihle, ekuvukeni kwekuphila lokungapheli kanye nenjabulo; futsi uma imibi, ekuvukeni kwebuhlungu lobungapheli, baniketwe develi, lobabeke ngaphansi kwakhe, lokukulahlwa—

12 Bahambe ngekwentsandvo yenyama kanye netifiso tabo; bangatange bayibite nanini iNkhosi ngesikhatsi tandla temusa telulelwe kubo, ngoba tandla temusa betelulelwe kubo, futsi abazange bawemukele umusa; bayaliwe ngebubi babo kepha bangasuki kubo, futsi bayalwa kutsi baphendvuke kepha abatange baphendvuke.

13 Manje, ngabe akukameli yini nitfutfumele futsi niphendvuke etonweni tenu, futsi nikhumbule kutsi kuye kuphela kanye nangaye Khristu ningasindziswa na?

14 Ngako-ke, uma nifundzisa umtsetfo waMosi, ngetulu kwaloko fundzisani kutsi kungumfanekiso waleto tintfo letitako—

15 Bafundziseni kutsi kuhlengwa kuta ngaKhristu iNkhosi, longuBabe waPhakadze lucobo. Amen.