Sehluko 8
Amoni ufundzisa bantfu baLimhayi—Ufundza ngabongcwengcwe labangemashumi lamabili nakune bemaJarede—Imibhalo yasendvulo ingahunyushwa baboni—Kute sipho lesikhulu kunesekuba ngumboni. Cishe ngemnyaka wa 121 ngaphambi kwekutalwa kwaKhristu.
1 Futsi kwenteka kutsi emvakwekutsi inkhosi Limhayi seyicedzile kukhuluma kubantfu bayo, ngoba yakhuluma letiningi tintfo kubo kodvwa timbalwa kuphela tato lengitibhalile kulencwadzi, yatjela bantfu bayo tonkhe tintfo mayelana nabomnakabo labebaseveni laseZarahemla.
2 Futsi yenta kutsi Amoni eme ngembili kwesicuku, asilandzise konkhe lokwakwentekile kubomnakabo kusukela ngesikhatsi lapho Zenifi ahamba aphuma kulelolive kute kube sikhatsi lapho yena lucobo ahamba aphuma kulelolive.
3 Ngetulu kwaloko waphindza wabalandzisa emavi ekugcina inkhosi Bhenjamini leyayibafundzisa wona, wawachaza kubantfu benkhosi Limhayi, kute bawacondze onkhe emavi leyawakhuluma.
4 Futsi kwenteka kutsi emvakwekutsi sekakwentile konkhe loku, inkhosi Limhayi yasikhulula sicuku, yenta kutsi wonkhe umuntfu abuyele endlini yakhe.
5 Futsi kwenteka kutsi yenta kutsi bongcwengcwe labebacuketse umbhalo webantfu bayo kusukela ngesikhatsi besuka eveni laseZarahemla, baletfwe phambi kwa-Amoni, kute abafundze.
6 Manje, masinyane nje emvakwekutsi Amoni sekawufundzile lombhalo, inkhosi yafuna kwati kuye kutsi bekangakwati yini kuhumusha tilimi, Amoni wayitjela kutsi bekangeke akwati.
7 Inkhosi yatsi kuye: Ngekudzabuka ngenca yetinhlupheko tebantfu bami, ngenta kutsi labangemashumi lamane nakutsatfu bebantfu bami batsatse luhambo baye ehlane, kute ngaloko batfole live laseZarahemla, kute sicele kubomnaketfu kutsi basikhiphe ebugcilini.
8 Balahleka ehlane sikhatsi lesitinsuku letiningi, noko bebakhutsele, abalitfolanga live laseZarahemla kodvwa babuyela kulelive, sebahambe eveni lelisemkhatsini wemanti lamaningi, sebatfole live lelaligcwele ematsambo ebantfu, kanye newetilwane, ngetulu kwaloko ligcwele takhiwo letatibhidlikile talo lonkhe luhlobo, sebatfole live lebelikadze ligcwaliswe bantfu labebabaningi njengeticuku taka-Israyeli.
9 Futsi kufakaza kutsi tintfo lebebatishito tiliciniso babuya nabongcwengcwe labangemashumi lamabili nakune labagcwele imifanekiso lecoshiwe, futsi bebabeligolide lelimsulwa.
10 Buka, ngetulu kwaloko, baletse tivikelo tesifuba, letinkhulu, telitfusi kanye nekhopha, futsi tinhle kakhulu.
11 Ngetulu kwaloko, baletse tinkemba, tibambo tato lesetibolile, kukhalipha kwato kwasekudliwe kutfomba; kute namunye kulelive lokwatiko kuhumusha lulwimi noma imifanekiso lecoshiwe lekubongcwengcwe. Kungako-ke ngitsite kuwe: ungakwati yini kuhumusha na?
12 Ngiyaphindza ngitsi kuwe: kukhona yini lomatiko lokwati kuhumusha na? Ngoba ngifisa kutsi lemibhalo ihunyushelwe elulwimini lwetfu; ngoba, mhlawumbe, itawusinika lwati ngensali yalaba bantfu lababhujiswa, lapho lemibhalo yavela khona; noma, mhlawumbe, itosinika lwati ngabo labantfu lababhujiswa; nginesifiso sekwati sizatfu sekubhujiswa kwabo.
13 Manje Amoni watsi kuyo: Ngingakutjela ngesiciniseko, Awu nkhosi, ngemuntfu longakwati kuhumusha imibhalo; ngoba yena unaloko lakwati kubuka kuko, ahumushe yonkhe imibhalo yasendvulo; kusipho lesivela kuNkulunkulu. Letintfo tibitwa ngekutsi tihumushi, kute umuntfu lokwati kubuka kuto ngaphandle kwekutsi ayaletiwe, hleze abuke loko lokungakafaneli bese uyabhubha. Loyo loyaletwa kutsi abuke kuto, loyo ubitwa ngemboni.
14 Buka, inkhosi yebantfu labaseveni laseZarahemla nguye umuntfu loyaletiwe kutsi ente leti tintfo, futsi lonalesi sipho lesikhulu lesivela kuNkulunkulu.
15 Inkhosi yatsi umboni mkhulu kunemphrofethi.
16 Futsi Amoni watsi umboni ungumembuli kanye nemphrofethi; leso sipho lesikhulu kute umuntfu longaba naso, ngaphandle kwekutsi abe nemandla aNkulunkulu, lokute muntfu longaba nawo; noko umuntfu longaba nemandla lamakhulu aniketwe wona avela kuNkulunkulu.
17 Kodvwa umboni angati ngetintfo letendlulile, ngalokunjalo nangetintfo letisatokwenteka, ngebahumushi tonkhe tintfo tiyawukwembulwa, noma, lokungenani, tintfo letisitsekile tiyawukwentiwa tibonakale, netintfo letifihlakele tiyawukwembulwa, ngetulu kwaloko kuyawukwembulwa tintfo ngato lebetingeyawukwatiwa ngaphandle kwato.
18 Ngaleyondlela Nkulunkulu wente tindlela tekutsi umuntfu, ngelukholo, ente timangaliso letinkhulu; ngako-ke uba lusito lolukhulu kubantfu bakubo.
19 Manje, ngesikhatsi Amoni sekacedzile kukhuluma lamavi inkhosi yatfokota kakhulu, yabonga Nkulunkulu, itsi: Ngekungangabateki imfihlakalo lenkhulu icuketfwe ngekhatsi kwalaba bongcwengcwe, naleti tihumushi ngalokungangabateki tilungiswa ngenhloso yekusombulula tonkhe timfihlakalo letinje kubantfwana bebantfu.
20 Awu imangalisa kangakanani imisebenti yeNkhosi, kuyote kube nini ibeketelela bantfu bayo; yebo, bungakanani bumphumphutse nebumatima bekucondza kwebantfwana bebantfu; ngoba abakufuni kuhlakanipha, noma bafise kutsi kona kubabuse!
21 Yebo, banjengemhlambi wasendle wona lobalekela umelusi, usakateke, ubalekiswe, futsi udliwe tilwane tasendle.