INcwadzi yaMosiya
Sehluko 1
Inkhosi Bhenjamini ifundzisa emadvodzana ayo lulwimi kanye netiphrofetho taboyise—Inkholo kanye nemphucuko yabo ilondvolotwe ngenca yemibhalo leyayigcinwe kubongcwengcwe labatinhlobonhlobo—Mosiya uyakhetfwa njengenkhosi futsi uniketwa kutsi agcine imibhalo kanye naletinye tintfo. Cishe ngemnyaka wa 130 kuya kuwa 124 ngaphambi kwekutalwa kwaKhristu.
1 Manje besekute umbango eveni lonkhe laseZarahemla, emkhatsini wabo bonkhe bantfu labebabenkhosi Bhenjamini, kangangekutsi inkhosi Bhenjamini yaba nekuthula njalo tonkhe tinsuku tayo lebetisele.
2 Futsi kwenteka kutsi yayinemadvodzana lamatsatfu; yawacamba emabito abo kutsi nguMosiya, Helorumu, kanye naHilamani. Yenta kutsi afundziswe lonkhe lulwimi lwaboyise, kute ngaloko abe ngemadvodzana lanekucondza; kute ati mayelana netiphrofetho letatikhulunywe ngemilomo yaboyise, letatiletfwe kubo ngesandla seNkhosi.
3 Ngetulu kwaloko yawafundzisa mayelana nemibhalo leyayicoshwe kubongcwengcwe belitfusi, itsi: Madvodzana ami, ngifuna kutsi nikhumbule kutsi kube kwakungasiko ngenca yalaba bongcwengcwe, labacuketse lemibhalo kanye nemiyaleto, ngabe sahlala ekungatini, nangalesi sikhatsi samanje, singatati timfihlakalo taNkulunkulu.
4 Ngoba kwakungeke kwenteke kutsi babe, Lehi, akwati kutikhumbula tonkhe leti tintfo, kutsi atifundzise bantfwana bakhe, ngaphandle kwekutsi asitwe ngulaba bongcwengcwe; ngoba yena afundziswe ngelulwimi lwemaGibhithe ngako-ke wakwati kuyifundza lemibhalo, aphindze ayifundzise nebantfwana bakhe, kute ngaloko bona bakwati kuyifundzisa bantfwana babo, kute kugcwaliseke imiyaleto yaNkulunkulu, kwehle kute kube ngulesi sikhatsi samanje.
5 Ngitsi kini, madvodzana ami, kube kwakungasiko ngenca yaleti tintfo, letigciniwe talondvolotwa ngesandla saNkulunkulu, kute sitifundze phindze sicondze ngetimfihlakalo takhe, siphindze sibe nemiyaleto yakhe njalonjalo phambi kwemehlo etfu, nabobabe betfu bebayoncishelwa kukholwa, besiyokuba njengabomnaketfu, emaLamani, wona langati lutfo mayelana naleti tintfo, futsi akatikholwa noma afundziswa ngato, ngenca yemasiko aboyise, langakalungi.
6 Awu madvodzana ami, ngifuna kutsi nite nikhumbule kutsi leti tinkhulumo tiliciniso, nekutsi lemibhalo iliciniso. Bukani, nabongcwengcwe baNefi, labacuketse imibhalo kanye netinkhulumo tabobabe betfu kusukela ngesikhatsi bashiya eJerusalema kute kube manje, baliciniso; futsi singati ngekweliciniso kwabo ngenca yekutsi sinabo phambi kwemehlo etfu.
7 Manje, madvodzana ami, ngifuna kutsi nite nikhumbule kutsi nibacwaninge ngekukhutsala, kute nizuze ngaloko; ngifuna kutsi nite niyigcine imiyaleto yaNkulunkulu, kute niphumelele eveni njengekwetitsembiso iNkhosi leyatenta kubobabe betfu.
8 Tiningi kakhulu tintfo inkhosi Bhenjamini leyatifundzisa emadvodzana ayo, letingakabhalwa kulencwadzi.
9 Futsi kwenteka kutsi ngesikhatsi inkhosi Bhenjamini seyicedzile kufundzisa emadvodzana ayo, yabese iba yindzala, futsi yabese iyabona kutsi besekufanele kutsi masinyane nje ihambe ngendlela yawo wonkhe umhlaba; ngako-ke yakubona kufanele kutsi inikete umbuso kuyinye yemadvodzana ayo.
10 Ngako-ke yenta kutsi Mosiya aletfwe phambi kwayo; lawa ngemavi leyawakhuluma kuye, itsi: Ndvodzana yami, ngifuna kutsi wente simemetelo kulo lonkhe lelive emkhatsini wabo bonkhe laba bantfu, noma bantfu baZarahemla, kanye nakubantfu baMosiya labahlala kulelive, kute ngaloko bagcogcelwe ndzawonye; ngoba kusasa ngitomemetela kubo laba bantfu bami ngemlomo wami kutsi wena sewuyinkhosi kanye nembusi ngetulu kwabo laba bantfu, iNkhosi Nkulunkulu wetfu lesinike bona.
11 Ngetulu kwaloko, ngitonika laba bantfu libito, kute ngaloko behlukaniswe kubo bonkhe bantfu iNkhosi Nkulunkulu leyabakhipha eveni laseJerusalema; loku ngikwenta ngoba bebabantfu labakhutsele ekugcineni imiyaleto yeNkhosi.
12 Ngibaniketa libito lelingeke lesulwe nanini, ngaphandle kwekutsi kube ngenca yesiphambeko.
13 Yebo, ngetulu kwaloko ngitsi kuwe, uma kusho kutsi laba bantfu labatsandvwako kakhulu yiNkhosi bangawela esiphambekweni, futsi babe bantfu lababi kanye nalabaphingako, kute iNkhosi ibanikele etitseni tabo, kute ngaloko babe butsakatsaka njengabomnakabo, ayisenokubalondvolota ngemandla ayo langenakulinganiswa nalamangalisako, njengoba kute kube manje ibalondvolotile bobabe betfu.
14 Ngoba ngitsi kuwe, kube ayiselulanga sandla sayo ekulondvoloteni bobabe betfu bebayowela etandleni temaLamani, babe ngulabahlushwako kunzondo yawo.
15 Futsi kwenteka kutsi emvakwekutsi inkhosi Bhenjamini seyicedzile kukhuluma ngaleti tintfo kundvodzana yayo, yayinika imiyaleto mayelana nato tonkhe tindzaba tembuso.
16 Ngetulu kwaloko, yaphindze yayinika imiyaleto mayelana nemibhalo leyayicoshwe kubongcwengcwe belitfusi; kanjalo nangabongcwengcwe baNefi; futsi kanjalo, nangenkemba yaLabani, kanye nebhola noma inkhombandlela, leyahola bobabe betfu ekhatsi ehlane, leyayilungiswe ngesandla seNkhosi kute ngaloko ibahole, wonkhe muntfu ngekulalela kanye nekukhutsala lebebamniketa kona.
17 Ngako-ke, ngesikhatsi bangenalukholo bebangaphumeleli noma bachubeke ngeluhambo lwabo, kodvwa bebabuyiselwa emuva, batehlisele kungajabuli kwaNkulunkulu etikwabo; ngaloko-ke bebashaywa ngendlala kanye netinhlupheko letibuhlungu, kubaphehla kutsi bakhumbule umsebenti wabo.
18 Manje, kwenteka kutsi Mosiya wahamba wenta njengoba uyise abemyaletile, wamemetela kubo bonkhe bantfu labebaseveni laseZarahemla kute ngaloko bagcogcane ndzawonye, kutsi bahambe bakhuphukele ethempelini kuyokuva emavi uyise labekatowakhuluma kubo.