1 Manje Alima, asacwayiswe yiNkhosi kutsi emabutfo enkhosi Nowa abeyawutseleka etikwabo, futsi asabatisile bantfu bakhe, ngako-ke bagcogcela ndzawonye imihlambi yabo, futsi batsatsa lokuyinhlavu kwabo, besuka baya ehlane phambi kwemabutfo enkhosi Nowa.

2 INkhosi yabacinisa, kute bantfu benkhosi Nowa bangakhoni kubakhandza kute bababulale.

3 Babaleka batsatsa luhambo lwetinsuku letisiphohlongo basehlane.

4 Befika eveni, yebo, live lelihle kakhulu futsi lelenelisako kakhulu, live lemanti lacwebile.

5 Bamisa emathende abo, bacala kulima umhlabatsi, bacala kwakha takhiwo; yebo, bebakhutsele, futsi basebenta kakhulu.

6 Futsi labantfu bebanesifiso sekutsi Alima abe yinkhosi yabo, ngoba bekatsandvwa bantfu bakhe.

7 Kodvwa watsi kubo: Bukani, akukafaneli kutsi sibe nenkhosi; ngoba naku lokushiwo yiNkhosi: Anitubeka lomunye umuntfu ngetulu kwalomunye, noma indvodza lenye ayinakuticabanga ingetulu kwalenye; ngako-ke ngitsi kini akukafanele kutsi nibe nenkhosi.

8 Noko, kube kwakungenteka kutsi nikwati kuba nemadvodza lalungile njalo kutsi abe ngemakhosi enu bekuyawuba kuhle kini kutsi nibe nenkhosi.

9 Kodvwa khumbulani bubi benkhosi Nowa kanye nebaphristi bayo; futsi nami lucobo ngangena elugibeni, ngenta tintfo letiningi letatinengekile emehlweni eNkhosi, letangibangela kuphendvuka lokubuhlungu kakhulu;

10 Noko, emvakwekuhlupheka kakhulu, iNkhosi yakuva kukhala kwami, yayiphendvula imithandazo yami, futsi seyingente sikhali etandleni tayo ekuletseni labaningi kangaka benu ekulatini liciniso layo.

11 Noko, kuloku angitichayisi, ngoba angikafaneli kutichayisa.

12 Manje ngitsi kini, benicindzetelwe yinkhosi Nowa, benisebugcilini bakhe kanye nebaphristi bakhe, futsi nangena ebubini ngenca yabo; ngako-ke naniboshwe ngetibopho tebubi.

13 Manje njengoba senikhululiwe ngemandla aNkulunkulu naphuma kuleti tinketane; yebo, nasetandleni tenkhosi Nowa kanye nebantfu bayo, futsi ngalokunjalo nakuto tinketane tebubi, kanjalo ngifisa kutsi nime nicine kulenkhululelo lenikhululwe ngayo, futsi nekutsi ningatsembi muntfu kutsi abe yinkhosi ngetulu kwenu.

14 Ngetulu kwaloko ningetsembi namunye kutsi abe ngumfundzisi noma sikhonti senu, ngaphandle kwekutsi angumuntfu waNkulunkulu, ahamba etindleleni takhe futsi ayigcina imiyaleto yakhe.

15 Alima wabafundzisa ngalendlela bantfu bakhe, kutsi wonkhe muntfu kufanele atsandze makhelwane wakhe njengoba atitsandza yena, kute kungabi khona umbango emkhatsini wabo.

16 Manje Alima bekangumphristi wabo lomkhulu, ngoba yena angumsunguli welibandla labo.

17 Futsi kwenteka kutsi kute namunye lowaniketwa ligunya lekushumayela noma kufundzisa ngaphandle kwekutsi alitfole ngaye livela kuNkulunkulu. Ngako-ke wagcoba bonkhe baphristi kanye nabo bonkhe bafundzisi babo; futsi kute labagcotjwa ngaphandle kwekutsi babantfu labalungile.

18 Ngako-ke babagadza bantfu babo, futsi babondla ngetintfo letiphatselene nekulunga.

19 Futsi kwenteka kutsi bacala kuphumelela kakhulu eveni; balibita lelive ngekutsi yiHilamu.

20 Futsi kwenteka kutsi bandza baphindze baphumelela kakhulu eveni laseHilamu; futsi bakha lidolobha, lebalibita ngekutsi lidolobha laseHilamu.

21 Noko iNkhosi ibona kufanele kutsi ibajezise bantfu bayo; yebo, iyakuvivinya kubeketela kwabo kanye nelukholo lwabo.

22 Noko—loyo lobeka litsemba lakhe kuyo nguye kanye loyo loyawuphakanyiswa ngelusuku lwekugcina. Yebo, futsi kwaba njalo nakulaba bantfu.

23 Ngoba buka, ngitawunikhombisa kutsi bebaletfwe ebugcilini, futsi kwakute namunye lobekangabakhulula ngaphandle kweNkhosi Nkulunkulu wabo, yebo, Nkulunkulu wa-Abrahama kanye na-Isaka kanye naJakobe.

24 Futsi kwenteka kutsi yabakhulula, futsi yawakhombisa emandla ayo lamakhulu kubo, futsi yaba yinkhulu injabulo yabo.

25 Ngoba buka, kwenteka kutsi ngesikhatsi baseveni laseHilamu, yebo, edolobheni laseHilamu, ngesikhatsi balima eveni lonkhe, buka imphi yemaLamani yayiseminceleni yalelive.

26 Futsi kwenteka kutsi bomnakabo Alima babaleka emasimini abo, babutsana ndzawonye edolobheni laseHilamu; bebanekwesaba lokukhulu ngenca yekuchamuka kwemaLamani.

27 Kodvwa Alima wahamba wema emkhatsini wabo, wabancusa kutsi bangesabi, kodvwa bakhumbule iNkhosi Nkulunkulu wabo futsi iyawubakhulula.

28 Ngako-ke bakwehlisa kwesaba kwabo, bacala kukhala eNkhosini kutsi itsambise tinhlitiyo temaLamani, kute angababulali nebafati babo, kanye nebantfwana babo.

29 Futsi kwenteka kutsi iNkhosi yatitsambisa tinhlitiyo temaLamani. Alima kanye nabomnakabo bahamba batinikela etandleni tawo; futsi emaLamani alitsatsa live laseHilamu.

30 Manje emabutfo emaLamani, lawo labekalandzele ngemuva bantfu benkhosi Limhayi, abesalahlekile ehlane tinsuku letiningi.

31 Futsi buka, abesatfole labo baphristi benkhosi Nowa, endzaweni lebebayibita ngekutsi yi-Amuloni; futsi besebacale kutsatsa live lase-Amuloni sebacale kulima umhlabatsi.

32 Manje libito lemholi walabo baphristi kwakungu-Amuloni.

33 Futsi kwenteka kutsi Amuloni wawancenga emaLamani; ngetulu kwaloko watfumela bafati babo, labebangemadvodzakati emaLamani, kutsi ancenge bomnakabo, kutsi angawabulali emadvodza abo.

34 Futsi emaLamani aba nebubele ku-Amuloni kanye nakubomnakabo, futsi akatange ababulale ngenca yebafati babo.

35 Amuloni kanye nabomnakabo bahlangana nemaLamani, futsi bebahamba ehlane bafuna live laNefi ngesikhatsi batfola live laseHilamu, lelalihlala Alima kanye nabomnakabo.

36 Futsi kwenteka kutsi emaLamani amtsembisa Alima kanye nabomnakabo, kutsi uma bangabakhombisa indlela leyayitobaholela eveni laNefi bangabanika imphilo kanye nenkhululeko yabo.

37 Kodvwa emvakwekutsi Alima sekabakhombisile indlela leyayiya eveni laNefi emaLamani akasigcinanga setsembiso sawo; kodvwa abeka bogadzi batungeleta live laseHilamu, ngetulu kwa-Alima kanye nabomnakabo.

38 Futsi insalela yabo yahamba yaya eveni laNefi; kwatsi incenye yabo yabuyela eveni laseHilamu, ngetulu kwaloko baletsa kanye nabo bafati kanye nebantfwana babogadzi labo labebashiywe eveni.

39 Futsi inkhosi yemaLamani yayinikete Amuloni kutsi abe yinkhosi kanye nembusi ngetulu kwebantfu bakhe, labebaseveni laseHilamu; noko abengetukuba nemandla ekwenta noma yini leyayingahambisani nentsandvo yenkhosi yemaLamani.