1 Manje sengikhuluma ngalokuphatselene nembhabhatiso. Buka, babonisi, baphristi, kanye nebafundzisi bebabhajatiswa; futsi bebangabhajatiswa ngaphandle kwekutsi baletse titselo letifanele tekutsi bakhombise kutsi bafanele.

2 Futsi bebangemukeli namunye ekubhajatisweni ngaphandle kwekutsi beta ngenhlitiyo ledzabukile, nangemoya lowephukile, baphindze bakhombise ebandleni kutsi baphendvuke ngekweliciniso etonweni tabo tonkhe.

3 Futsi kute namunye lobekamukelwa ekubhajatisweni ngaphandle kwekutsi bemukele Khristu baphindze babitwe ngaye, baphokophele kumsebentela kute kube sekugcineni.

4 Futsi emvakwekutsi sebemukelwe ekubhajatisweni, sebaguculiwe baphindze bahlantwa ngemandla aMoya loNgcwele, bebabalwa kanye nebantfu belibandla laKhristu; nemabito abo bekatsatfwa, kute bakhunjulwe baphindze bondliwe ngelivi lelihle laNkulunkulu, kute babagcine basendleleni lengiyo, kute babagcine njalo bahlale bathandaza, betsembela kuphela etentweni letinhle taKhristu, lobekangumcambi kanye nemphelelisi welukholo lwabo.

5 Libandla belihlangana ndzawonye njalo, kute lizile kudla liphindze lithandaze, nekutsi bacocisane lomunye nalomunye mayelana nekuzuza kwemiphefumulo yabo.

6 Bebahlangana njalo kute badle sinkhwa kanye neliwayini, kukhumbula iNkhosi Jesu.

7 Futsi bebacaphela kubuka kutsi kubebete bubi emkhatsini wabo; loyo lobekatfolwa ente bubi, bofakazi labatsatfu belibandla bebabalahla ngelicala ngaphambi kwebabonisi, futsi uma bebangaphendvuki, bangavumi, emagama abo bekesulwa, baphindze bangabalwa nebantfu baKhristu.

8 Kodvwa ngekuphendvuka kwabo njalo bacela intsetselelo, ngenhloso lekungiyo, bebatsetselelwa.

9 Imihlangano yabo beyichutjwa libandla ngendlela yekusebenta kwaMoya, kanye nangemandla aMoya loNgcwele; ngoba njengoba emandla aMoya loNgcwele bekabahola kutsi bashumayele, bakhutsate, bathandaze, bancuse, noma bahlabele, bekwentiwa loko.