1 Manje mine, Moroni, sengibhala lokutsite njengoba ngibona kukuhle kimi; futsi ngibhalela bomnaketfu, emaLamani; ngifuna kutsi bati kuti sekwendlule iminyaka lengetulu kwemakhulu lamane nemashumi lamabili seloku saniketwa sibonakaliso sekuta kwaKhristu.

2 Futsi sengiyayivala ngiyayilondza lemibhalo, emvakwekutsi sengikhulume lamavi lambalwa ngendlela yekunikhutsata.

3 Bukani, ngiyanikhutsata kutsi ngesikhatsi senitifundza letintfo, uma kukuhlakanipha kuNkulunkulu kutsi nitifundze, kutsi nikhumbule kutsi iNkhosi ibe nesihawu lesingakanani kubantfwana bebantfu, kusukela ekudalweni kwa-Adamu kwehle kute kube sikhatsi lapho niyawutitfola khona letintfo, futsi nizindle ngato etinhlitiyweni tenu.

4 Futsi ngesikhatsi senititfola letintfo, ngiyanikhutsata kutsi nibute kuNkulunkulu, Babe waPhakadze, egameni laKhristu, kutsi ngabe leti tintfo tiliciniso na; uma niyawubuta ngeliciniso, nangenhloso lengiyo, ninelukholo kuKhristu, uyawulibonakalisa liciniso lato kini, ngemandla aMoya loNgcwele.

5 Futsi ngemandla aMoya loNgcwele ningalati liciniso lato tonkhe tintfo.

6 Futsi noma ngabe yini lenhle ilungile iphindze iliciniso; ngaloko-ke, kute lokuhle lokuphika Khristu, kodvwa kuyavuma kutsi unguye.

7 Futsi ningati kutsi unguye, ngemandla aMoya loNgcwele; ngaloko-ke ngiyanikhutsata kutsi ningawaphiki emandla aNkulunkulu; ngoba usebenta ngemandla, ngekwelukholo lwebantfwana bebantfu, ngalokufanako namuhla nakusasa, futsi tikhatsi tonkhe.

8 Ngetulu kwaloko, ngiyanikhutsata, bomnaketfu, kutsi ningatiphiki tipho taNkulunkulu, ngoba tiningi; futsi tivela kuye kanye loyo Nkulunkulu. Futsi tiningi tindlela letiniketwa ngato leti tipho; Kodvwa nguye kanye loyo Nkulunkulu losebenta yonkhe indzawo etintfweni tonkhe; futsi tinikwa ngetibonakaliso taMoya waNkulunkulu kubantfu, kute bazuze.

9 Ngoba bukani, kulomunye kuniketwe ngaMoya waNkulunkulu, kutsi afundzise livi lekuhlakanipha;

10 Kulomunye, kutsi afundzise livi lelwati ngaMoya lofanako;

11 Futsi kulomunye, lukholo lolukhulu kakhulu; futsi kulomunye, tipho tekuphilisa ngaloyo Moya lofanako;

12 Ngetulu kwaloko, kulomunye, kutsi ente timangaliso letinkhulu;

13 Ngetulu kwaloko, kulomunye, kutsi aphrofethe mayelana nato tonkhe tintfo;

14 Futsi ngetulu kwaloko, kulomunye, kutsi abone tingilosi kanye nemimoya lefundzisako;

15 Ngetulu kwaloko, kulomunye, tonkhe tinhlobo tetilimi;

16 Ngetulu kwaloko, kulomunye, kuhunyushwa kwetilimi kanye netinhlobonhlobo tetilimi.

17 Futsi tonkhe leti tipho tita ngaMoya waKhristu; tiphindze tita kuwo wonkhe umuntfu ngamunye, njengoba atsandza.

18 Futsi ngiyanikhutsata, bomnaketfu labatsandzekako, kutsi nikhumbule kutsi tonkhe tipho letihle tivela kuKhristu.

19 Futsi ngiyanikhutsata, bomnaketfu labatsandzekako, kutsi nikhumbule kutsi uyafana itolo, namuhla, naphakadze, nekutsi tonkhe leti tipho lesengikhulume ngato, letitakamoya, angeke tiphele nanini, uma nje umhlaba usemile, kuphela nje ngekungakholwa kwebantfwana bebantfu.

20 Ngaloko-ke, kufanele kube khona lukholo; uma kufanele kube khona lukholo kufanele futsi kube khona litsemba; futsi uma kufanele kube khona litsemba kufanele kube khona lutsandvo.

21 Futsi ngaphandle kwekutsi nibe nelutsandvo angeke nikwati kutsi nisindziswe embusweni waNkulunkulu; angeke nikwati kutsi nisindziswe embusweni waNkulunkulu uma ningenalo lukholo; futsi angeke nikwati uma nite litsemba.

22 Uma nite litsemba kufanele kutsi niphelelwe litsemba; futsi kuphelelwa litsemba kuta ngenca yebubi.

23 Futsi Khristu ngempela watsi kubobabe betfu: Uma ninelukholo ningenta tonkhe tintfo letifanele kimi.

24 Manje sengikhuluma kini nonkhe mikhawulo yemhlaba—kutsi uma lusuku lufika lapho emandla kanye netipho taNkulunkulu tiyawuphela emkhatsini wenu, kuyawuba ngenca yekungakholwa.

25 Maye kubantfwana bebantfu uma kunjalo; ngoba akuyukuba khona namunye lowenta lokuhle emkhatsini wenu, cha kute namunye. Ngoba uma kungaba khona munye emkhatsini wenu lowenta lokuhle, uyawusebenta ngemandla kanye nangetipho taNkulunkulu.

26 Maye kulabo labayawususa leti tintfo bese bayafa, ngoba bafela etonweni tabo, futsi angeke basindziswe embusweni waNkulunkulu; ngikhuluma loku njengekwemavi aKhristu; futsi angicambi manga.

27 Futsi ngiyanikhutsata kutsi nitikhumbule leti tintfo; ngoba sikhatsi siyeta ngekushesha lapho niyawukwati kutsi angicambi manga, ngoba niyawungibona esihlalweni saNkulunkulu; futsi iNkhosi Nkulunkulu iyawutsi kini: Ingabe angiwashongo yini lamavi ami kini, labekabhalwe ngulenandvodza, njengaloyo lokhala kulabafile, yebo, njengaloyo lokhuluma aselutfulini na?

28 Ngisho leti tintfo kute ngigcwalise tiphrofetho. Futsi bukani, tiyawuphuma emlonyeni waNkulunkulu waphakadze; futsi livi lakhe liyawuhamba ngemandla titukulwane ngetitukulwane.

29 Futsi Nkulunkulu uyawunikhombisa, kutsi loku lengikubhalile kuliciniso.

30 Ngetulu kwaloko ngiyanikhutsata kutsi nite kuKhristu, niphindze nibambelele kuto tonkhe tipho letinhle, futsi ningasitsintsi sipho lesibi, noma intfo lengakahlanteki.

31 Vuka, usukume elutfulini, Awu Jerusalema; yebo, yembatsa tingubo takho letinhle, Awu ndvodzakati yaseSiyoni; ucinise tikhonkhwane takho uphindze wandzise imincele yakho ingunaphakadze, kute ungabe usatfotjiswa nanini, kute tivumelwano taBabe waPhakadze latenta kuwe, Awu nine bendlu yaka-Israyeli, tigcwaliseke.

32 Yebo, wotani kuKhristu, niphindze nipheleliswe kuye, futsi ningakuvumeli konkhe lokungahambisani naNkulunkulu; uma ningayukuvumela lokungahambisani naNkulunkulu, nitsandze Nkulunkulu ngemandla enu onkhe, ngengcondvo kanye nangemfutfo wenu, uma kunjalo umusa wakhe unenele, kute ngemusa wakhe nipheleliswe kuKhristu; futsi uma ngemusa waNkulunkulu nipheleliswa kuKhristu, ngeke nanini niwaphike emandla aNkulunkulu.

33 Ngetulu kwaloko, uma ngemusa waNkulunkulu niphelelisiwe kuKhristu, ningawaphiki emandla akhe, uma kunjalo seningcwelisiwe kuKhristu ngemusa waNkulunkulu, ngekucitseka kwengati yaKhritsu, lokusesivumelwaneni saBabe ekutsetselelweni kwetono tenu, kute nibe ngcwele, ningabi nelibala.

34 Manje sengiyavalelisa kini nonkhe, salani kahle. Masinyane ngitawuhamba ngiyawuphumula epharadesi laNkulunkulu, kute kutsi umoya wami kanye nemtimba kuphindze kuhlangane, futsi ngite ngikhishwe ngincobile emoyeni, kute ngihlangane nani phambi kwesihlalo lesitfokotisako saJehova lomkhulu, uMehluleli waPhakadze walabaphilako kanye nalabafile. Amen.