Sehluko 13
Juda kanye neJerusalema batawujeziswa ngenca yekungalaleli kwabo—INkhosi iyabancusela futsi iyabehlulela bantfu Bayo—Emadvodzakati aseSiyoni ayacalekiswa futsi ayahlushwa ngenca yekutsandza kwawo tintfo temhlaba—Catsanisa na-Isaya3. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Ngoba buka, iNkhosi, iNkhosi yemaBandla, isusa eJerusalema, kanye nakuJuda, lokungenako kanye nalokubasekelako, sinkhwa sonkhe lesibasekelako, kanye nemanti onkhe langenako.
2 Indvodza lelichawe, kanye nendvodza yemphi, umehluleli, kanye nemphrofethi, kanye nalohlakaniphile, kanye nalomdzala.
3 Indvuna yemashumi lasihlanu, kanye nemuntfu lohloniphekile, kanye nemeluleki, kanye nengcweti lehlakaniphile, kanye nesikhulumi lesinelikhono.
4 Futsi ngitawubanika bantfwana kutsi babe ngemakhosi abo, nebantfwana bayawubusa ngetulu kwabo.
5 Futsi bantfu bayawucindzetelwa, nguloyo naloyo, futsi nguloyo naloyo acindzetele makhelwane wakhe, umntfwana uyawuhamba ngeligcabho phambi kwalabadzala, ngalokunjalo nesisekelo kubo labahloniphekile.
6 Lapho umuntfu ayawubamba umnakabo wendlu yeyise, atsi: Wena unesembatfo, bani ngumbusi wetfu, futsi ungawuvumeli lomonakalo ute ngaphansi kwesandla sakho—
7 Ngalolosuku uyawufunga, atsi: Angituba ngumelaphi; ngoba endlini yami kute sinkhwa netembatfo; ningangenti umbusi webantfu.
8 Ngoba iJerusalema icitsiwe, futsi naJuda uwile, ngenca yekutsi tilimi tabo kanye netento tabo betiphambene neNkhosi, kuchukuluta emehlo enkhatimulo yayo.
9 Simo sebuso babo siyafakaza ngalokumelene nabo, futsi simemetela sono sabo kutsi sibe njengeseSodoma, futsi ngeke basifihle. Maye emiphefumulweni yabo, ngoba batiletsele bubi.
10 Tjelani labalungile kutsi kutawubahambela kahle; ngoba bayawudla titselo tetento tabo.
11 Maye kulababi, ngoba bayawubhujiswa; ngoba umvuzo wetandla tabo uyawuba setikwabo!
12 Bantfu bami, bantfwana babacindzeteli babo, futsi besifazane bayabusa ngetulu kwabo. Awu bantfu bami, labo labaniholako benta kutsi niphambuke futsi bashabalalisa indlela lenihamba ngayo.
13 INkhosi imele kunincusela, futsi imele kwehlulela bantfu.
14 INkhosi itawungena ekwehluleleni nalabadzala bebantfu bayo kanye nemakhosana abo; ngoba nidle sivini kanye nemphango yalabamphofu etindlini tenu.
15 Nisho kutsini na? Nishaya bantfu bami babe ticucu, futsi nigaya buso balabamphofu, kusho iNkhosi Nkulunkulu wemaBandla.
16 Ngetulu kwaloko, iNkhosi itsi: Ngenca yekutsi emadvodzakati aseSiyoni ayatigcabha, ahamba netintsamo leteluliwe kanye nemehlo lacwashatako, ashayela etulu ekuhambeni kwawo, futsi enta kukhehleta ngetinyawo tawo.
17 Ngaloko-ke iNkhosi itawushaya ngetilondza umchele wetinhloko temadvodzakati aseSiyoni, futsi iNkhosi itawuveta tincenye letifihlekile tabo.
18 Ngalolosuku iNkhosi itawubemuka bucwebecwebe bemijiva yawo lekhehletelako, kanye netigcoko letinemanethi, kanye nemibhodze letindingilizi njengenyanga;
19 Tigcizo nemasongo kanye netimvakazi;
20 Tigcoko, nemijiva yemilente, nemichele, nemakha, kanye nemacici etindlebe;
21 Tindandatho, kanye nebucwebe bemakhala.
22 Tembatfo letingagcokwa naletinye, netembatfo temikhosi, netembatfo tekumbonya buso nentsamo, kanye netipeleti tetinwele;
23 Tibuko, kanye nelineni lecolisakele, kanye nemishuculo, kanye nemaveyili.
24 Futsi kuyawukwenteka kutsi, esikhundleni semakha kuyawuba khona luboti; esikhundleni selibhande, kudzabuka; esikhundleni setinwele letilungiswe kahle, imphandla; esikhundleni setembatfo letinhle, kwembatsa ingubo yelisaka; sishadza esikhundleni sebuhle.
25 Emadvodza akho ayawufa ngenkemba kanye nemachawe akho emphini.
26 Futsi emasango ayo ayawulila futsi akhale; iyawubate lutfo, futsi iyawuhlala phansi.