Sehluko 21
Lihlumela lakaJese (Khristu) litawehlulela ngekulunga—Lwati ngaNkulunkulu lutawusibekela umhlaba ngeminyaka letinkhulungwane—INkhosi itawuphakamisa siboniso futsi igcogce Israyeli—Catsanisa na Isaya 11. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Futsi kuyawuvela lihlumela esicwini sakaJese, futsi ligala liyawukhula etimphandzeni taso.
2 Moya weNkhosi uyawuhlala etikwakhe, moya wekuhlakanipha kanye newekucondza, moya wekweluleka kanye nemandla, moya welwati kanye newekuyesaba iNkhosi.
3 Uyawumenta abe ngulonekucondza lokusheshako ekuyesabeni iNkhosi; futsi angeke ehlulele ngalakubona ngemehlo akhe, noma ente sincumo ngalakuva ngetindlebe takhe.
4 Kodvwa uyawukwehlulela labamphofu ngekulunga, futsi abekhute ngekungakhetsi labatfobekile bemhlaba; futsi uyawushaya umhlaba ngendvuku yemlomo wakhe, nangekuphefumula kwetindzebe takhe uyawubabulala lababi.
5 Futsi kulunga kuyawuba libhande letinkhalo takhe, nekwetsembeka kuyoba libhande letinso.
6 Ngetulu kwaloko imphisi iyawuhlala nelizinyane lemvu, nengwe iyawuhlala phansi nelizinyane lembuti, litfole kanye nelizinyane lelibhubesi kanye nalokukhuluphalisiwe ndzawonye; umntfwana lomncane uyawutihola.
7 Inkhomati kanye nelibhele kuyawudla ndzawonye; emankhonyane ako ayawucambalala ndzawonye; libhubesi liyawudla tjani njengenkhabi.
8 Umntfwana lomunyako uyawudlala emgodzini wemfeti, nemntfwana losandza kususwa ebeleni uyawufaka sandla sakhe emgodzini welibululu.
9 Angeke kulimate noma kubhubhise entsabeni yami yonkhe lengcwele, ngoba umhlaba uyawugcwala lwati lweNkhosi, njengemanti ambonya lwandle.
10 Futsi ngalolosuku kuyawuba khona imphandze yaJese, leyawukuma njengesiboniso kubantfu, kuso beTive bayawubutsana; futsi kuphumula kwakhe kuyawuba kuhle kakhulu.
11 Futsi kuyawukwenteka ngalolosuku kutsi iNkhosi iyawuwelula sandla sayo futsi kwesibili kubuyisa insali yebantfu bayo labayawube basele, e-Asiriya, naseGibhithe, nasePhathirosi, naseKushe, nase-Elamu, naseShineyari, naseHamati, kanye nasetichingini telwandle.
12 Futsi uyawuphakamisela tive siboniso, futsi agcogce labacoshwa baka-Israyeli, ahlanganisele ndzawonye labahlakatekile bakaJuda emagumbini lamane emhlaba.
13 Umona wa Efrayimu ngetulu kwaloko uyawunyamalala, titsa takaJuda ticedvwe nya; Efrayimu angeke abe nemona ngaJuda, futsi naJuda angeke amhluphe Efrayimu.
14 Kodvwa bayawundizela emahlombe emaFilistiya kuya ngasenshonalanga; baphange nebasemphumalanga kanyekanye; bayawulula sandla sabo kuyo i-Edomi kanye neMowabi; nebantfwana bema-Amoni bayawubalalela.
15 Futsi iNkhosi iyawulibhubhisa nya lulwimi lwelwandle lwaseGibhithe; Futsi ngemoya wayo lonemandla iyawunyakatisa sandla sayo ngetulu kwemfula, futsi iyakuwushaya ube yimifudlana lesikhombisa, futsi yente bantfu bawele ngeticatfulo letomile.
16 Futsi kuyawuba khona umgwaco lomkhulu wensali yebanftu bakhe labayawusala, e-Asiriya, njengoba kwakunjalo ku-Israyeli ngalolosuku laphuma ngalo eveni laseGibhithe.