Sehluko 23
Kubhujiswa kweBhabhulona kuluhlobo lwekubhujiswa ngeKuta kwesiBili—Kutawuba lusuku lwentfukutselo kanye nekuphindzisela—iBhabhulona (umhlaba) itawukuwa ingunaphakadze—Catsanisa na-Isaya 13. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Sembulo ngeBhabhulona, Isaya indvodzana ya-Amose leyasibona.
2 Phakamisani siboniso entsabeni lephakeme, phakamiselani livi kubo, nibakhwebe ngesandla, kute bangene emasangweni alabaphakeme.
3 Ngibayaletile labangcwele bami, ngetulu kwaloko ngiwabitile emachawe ami, ngoba intfukutselo yami ayikho kulabo labatfokotako ebukhulwini bami.
4 Umsindvo wesicuku etintsabeni njengewebantfu labaningi, umsindvo wekuphitsitela kwemibuso yetive ihlangene ndzawonye, iNkhosi yemaBandla ivivisa emabutfo emphi.
5 Baphuma eveni lelikhashane, bavela ekugcineni kwelizulu, yebo, iNkhosi, kanye netikhali telulaka lwayo, kubhubhisa umhlaba wonkhe.
6 Lilani, ngoba lusuku lweNkhosi selusondzele; luyawufika njengembubhiso levela kuSomandla.
7 Ngako-ke, tandla tonkhe tiyawuphelelwa ngemandla, tinhlitiyo tebantfu bonkhe tiyawushona phansi;
8 Futsi bayawukwesaba; tinhlungu kanye netinsizi kuyawubabamba; bayawushaceka lomunye kulomunye; buso babo buyawuba njengemalangabi.
9 Bukani, lusuku lweNkhosi luyeta, lunelunya lwelulaka kanye nentfukutselo leyesabekako kutsi lwente live libete lutfo; futsi iyawubhubhisa toni talo letikulo.
10 Ngoba tinkhanyeti telizulu nemabutfo ato angeke kunikete kukhanya kwako; lilanga liyawufiphala ekuphumeni kwalo, futsi nenyanga angeke ikhiphe kukhanya kwayo.
11 Futsi ngitawujezisa umhlaba ngebubi bawo, kanye nalababi ngebubi babo; ngitawulicedza ligcabho kulabatigcabhako, ngikubeke phansi kutikhukhumeta kwalabasabekako.
12 Ngitawukwenta umuntfu abe ligugu lelikhulu kuneligolide lelicengekile; umuntfu abe ligugu lelikhulu kuneligolide lase-Ofiri.
13 Ngako-ke, ngitakuwatamatamisa emazulu, futsi umhlaba usuke uphele endzaweni yawo, ngelulaka lweNkhosi yemaBandla, nangelusuku lwentfukutselo yakhe lesabekako.
14 Futsi kuyawuba njengenyamatane letingelwako, nanjengetimvu letite umelusi; kuyawutsi loyo naloyo aphendvukele kubantfu bakubo, nguloyo naloyo muntfu abalekele eveni lakubo.
15 Bonkhe labo labatichenyako bayawugwazwa; yebo, bonkhe labo labatihlanganisa nalababi bayawudliwa yinkemba.
16 Bantfwana babo ngetulu kwaloko bayawuphihlitwa babe ticucu phambi kwemehlo abo; tindlu tabo tiyawuphangwa futsi bafati babo badlwengulwe.
17 Buka, ngitawubaphehlela emaMede kutsi abahlasele, wona angeke anake isiliva neligolide, noma atfokote ngalo.
18 Butjoki bawo buyawudubula emajaha abe ticucu; futsi bona angeke babe nesihawu ebantfwaneni; emehlo abo angeke abe nemusa kubantfwana.
19 Futsi iBhabhulona, ligugu lemibuso, buhle lobukhulu bemaKhaledi, iyawuba njengesikhatsi Nkulunkulu aketula iSodoma kanye neGomora.
20 Angeke kuphidze kuhlalwe kuyo nanini, noma kuhlalwe kuyo titukulwane ngetitukulwane: noma um-Arabu amise lithende lapho; noma belusi balale nemihlambi yabo lapho.
21 Kodvwa tilwane tasendle tasehlane tiyawulala khona lapho; netindlu tabo tiyawugcwala timphungushe; netikhova tiyawuhlala lapho, netimbuti tesiganga tiyawutjakadvula khona.
22 Futsi tilo tasesichingini tiyawushaya umkhulungwane etindlini tabo letingenalutfo, bodrago etigodlweni tabo letinhle, futsi sikhatsi sakhe sesisondzele, lusuku lwakhe angeke lusachutjelwa embili. Ngoba ngitawumbhubhisa ngekushesha; yebo, ngoba ngitawuba nesihawu kubantfu bami, kodvwa lababi bayawushabalaliswa.