1 Kodvwa buka, kuyawuba khona labaningi—ngalolosuku lapho sengichubeka nekwenta umsebenti lomangalisako emkhatsini wabo, kute ngikhumbule tivumelwano tami lengitentile kubantfwana bebantfu, kute ngelule sandla sami futsi kwesibili kubuyisela bantfu bami, lababendlu yaka-Israyeli;

2 Futsi ngetulu kwaloko, kute ngikhumbule tetsembiso lengatenta kuwe, Nefi, futsi ngalokunjalo nakuyihlo, kutsi ngiyoyikhumbula intalelwane yenu; nekutsi emavi entalelwane yenu ayovela aphuma emlonyeni wami aya kuyo intalelwane yenu; nemavi ami ayawuhamba ngemandla aye nasemikhawulweni yemhlaba, abe sibonakaliso kubantfu bami, lababendlu yaka-Israyeli;

3 Futsi ngenca yekutsi emavi ami ayawuhamba ngemandla—labaningi betive bayawutsi: LiBhayibheli! LiBhayibheli! Sinalo liBhayibheli, futsi angeke kube khona lelinye liBhayibheli.

4 Kodvwa naku lokushiwo yiNkhosi Nkulunkulu: Awu tiwula, bayawuba nalo liBhayibheli; futsi liyawuvela kuwo emaJuda, bantfu bami bakudzala besivumelwano. Futsi ngabe bawabonga ngani emaJuda ngalelo liBhayibheli labalitfola kuwo na? Yebo, ngabe beTive bacondzeni na? Ngabe bayatikhumbula yini tinhlupheko, nemisebenti, nemetamo lemikhulu yemaJuda, kanye nenkhutsalo kimi, ekuletseni insindziso kubeTive na?

5 Awu nine beTive, nike nawakhumbula emaJuda, bantfu bami bakudzala besivumelwano na? Cha; kodvwa niwacalekisile, nawutondza, futsi anitange nifune kuwabuyisa. Kodvwa bukani, ngitawutibuyisa tonkhe leti tintfo etikwetinhloko tenu lucobo; ngoba mine iNkhosi angikabakhohlwa bantfu bami.

6 Wena siwula, loyawukutsi: LiBhayibheli, tsine sinalo liBhayibheli, asilidzingi lelinye liBhayibheli. Ngabe nalitfola yini liBhayibheli ngaphandle kwekutsi kwaba ngenca yemaJuda na?

7 Anati yini kutsi kunetive letiningi kunalesisodvwa na? Anati yini kutsi Mine, iNkhosi Nkulunkulu wenu, ngibadalile bonkhe bantfu, futsi nekutsi ngiyabakhumbula labo labasetichingini telwandle; futsi nekutsi ngibusa emazulwini ngetulu nasemhlabeni ngaphansi; futsi ngiletsa livi lami kubantfwana bebantfu, yebo, nasetikwato tonkhe tive temhlaba na?

8 Ngaloko-ke nivungamelani, ngoba niyawutfola lokuningi ngelivi lami? Anati yini kutsi bufakazi betive letimbili bubufakazi kini bekutsi mine nginguNkulunkulu, nekutsi ngikhumbula sive lesisodvwa njengalesinye na? Ngaloko-ke, ngikhuluma emavi lafanako kulesinye sive njengakulesinye. Futsi uma tive letimbili tiyawuba khona ndzawonye nebufakazi betive letimbili buyawuba khona ndzawonye futsi.

9 Futsi ngikwenta loku kute ngikhombise kulabaningi kutsi ngiyafana itolo, namuhla, naphakadze; nekutsi ngikhuluma emavi ami njengekutsandza kwami. Futsi ngenca yekutsi ngikhulume livi linye akukafaneli nicabange kutsi ngeke ngisalikhuluma lelinye; ngoba umsebenti wami awukapheli; noma ngeke uphele kute kube sekupheleni kwemuntfu, noma kusukela kuleso sikhatsi kuya phambili ingunaphakadze.

10 Ngaloko-ke, ngenca yekutsi ninalo liBhayibheli akukafaneli nicabange kutsi licuketse onkhe emavi ami; noma nicabange kutsi angitange ngente lokunye lokuningi kutsi kubhalwe.

11 Ngoba ngiyaleta bonkhe bantfu, emphumalanga nasenshonalanga, enyakatfo, naseningizimu, kanye nasetichingini telwandle, kutsi bawabhale emavi lengiwakhuluma kubo; ngoba etincwadzini letiyawubhalwa ngitawuwehlulela umhlaba, wonkhe umuntfu ngekwemisebenti yakhe, ngekwaloko lokubhaliwe.

12 Ngoba buka, ngiyawukhuluma kumaJuda futsi akubhale loko; futsi ngalokunjalo ngiyawukhuluma kumaNefi nawo ayawukubhala loko; futsi ngalokunjalo ngiyawukhuluma kuletinye tivana tendlu yaka-Israyeli, lengitiholele kudze; futsi nato tiyawukubhala loko; kanjalo ngiyawukhuluma kuto tonkhe tive temhlaba futsi nato tiyawukubhala loko.

13 Futsi kuyawukwenteka kutsi emaJuda ayawuba nemavi emaNefi, futsi nemaNefi ayawuba nemavi emaJuda; futsi emaNefi kanye nemaJuda ayawuba nemavi etivana letilahlekile taka-Israyeli; futsi tivana letilahlekile taka-Israyeli tiyawuba nemavi emaNefi kanye newemaJuda.

14 Futsi kuyawukwenteka kutsi bantfu bami, lababendlu yaka-Israyeli, bayawugcogcelwa ekhaya emaveni langewabo; futsi nelivi lami ngalokunjalo liyawuhlanganiswa libe linye. Ngitawubakhombisa labo labalwa nelivi lami kanye nebantfu bami, lababendlu yaka-Israyeli, kutsi nginguNkulunkulu, futsi nekutsi ngavumelana na-Abrahama kutsi ngiyoyikhumbula intalelwane yakhe ingunaphakadze.