1 Ngoba iNkhosi itawuba nemusa kuJakobe, futsi isatawumkhetsa Israyeli, ibabeke eveni labo; betive bayawuhlanganiswa nabo, futsi bayawutihlanganisa nendlu yaJakobe.

2 Futsi bantfu bayawubatsatsa bababuyisele endzaweni yabo; yebo, kusuka khashane emikhawulweni yemhlaba; futsi bayawubuyela emaveni abo esetsembiso. Bayawuba bendlu yaka-Israyeli, live leNkhosi liyawuba ngeletinceku kanye netincekukati; futsi bayawubatsatsa babatfumbe labo bebakadze babatfumbile; bayawubusa ngetulu kwebacindzeteli babo.

3 Futsi kuyawukwenteka ngalolosuku kutsi iNkhosi iyawukunika kuphumula, etinsizini takho, nasekwesabeni kwakho, nasebugcilini lobumatima lowentiwa kutsi usebente kubo.

4 Futsi kuyawukwenteka ngalolosuku, kutsi uyawusho lesisiga ngenkhosi yaseBhabhulona, utsi: Uphela kanjani umcindzeteli, umuti weligolide uphela kanjani!

5 INkhosi isephulile sagila salababi, lubhoko lwebabusi.

6 Loyo loshaya bantfu ngelulaka ngekushaya lokungancamuki, loyo lobusa tive ngentfukutselo, uhlushiwe, futsi kute namunye lokuncandzako.

7 Umhlaba wonkhe usekuphumuleni, futsi uthulile; bahlokoma ngekuhlabelela.

8 Yebo, tipheshula tiyatfokota ngawe, futsi ngalokunjalo nemisedari yaseLebanoni, itsi: Seloku walaliswa phansi kute umgawuli lotawusijuba.

9 Sihogo ngaphansi sinyakatiselwe wena kukuhlangabeta ekuteni kwakho; sikuphehlela labafile, nabo bonkhe labakhulu bemhlaba; siphakamisele etulu etihlalweni tabo tebukhosi onkhe emakhosi etive.

10 Bonkhe bayawukhuluma batsi kuwe: Ngabe nawe futsi sewubutsakatsaka njengatsi na? Ngabe nawe sewufana natsi na?

11 Bukhatikhati bakho behliselwe phansi ethuneni; umsindvo wemavayolini akho awuvakali; timphetfu tendlaliwe phansi kwakho, futsi timphetfu tiyakumbonya.

12 Ngabe uwe kanjani ezulwini, Awu Lusifa, ndvodzana yentsatsakusa! Ngabe ugecelwe phansi yini, wena lowenta tive tibe butsakatsaka!

13 Ngoba utse enhlitiyweni yakho: Ngitawunyukela ezulwini, ngitawuphakamisela sihlalo sami sebukhosi ngetulu kwetinkhanyeti taNkulunkulu; ngetulu kwaloko ngitawuhlala entsabeni yemhlangano, ngasemajukujukwini asenyakatfo.

14 Ngitawunyukela ngetulu kweticongo temafu; ngitawuba njengaLosetikwako Konkhe.

15 Kodvwa uyokwehliselwa phansi esihogweni, emajukujukwini emgodzi.

16 Labo labakubonako bayawukugolotela, futsi bayawukucaphela, futsi bayawutsi: Ngabe nguye yini lomuntfu lowenta kutsi umhlaba unyakate, loyo lowatamatamisa imibuso na?

17 Futsi lowenta umhlaba waba njengelihlane, wabhubhisa emadolobha awo, futsi wangayivuli indlu yetiboshwa takhe na?

18 Onkhe emakhosi etive, yebo, onkhe, angcwatjwe ngeludvumo, nguleyo naleyo endlini yayo.

19 Kodvwa wena ulahlwe ngaphandle kwelithuna lakho njengeligala lelinengekile, futsi insali yalabo lababulewe, bagwazwa ngenkemba, labo labehlela entansi ematjeni emgodzi; njengesidvumbu sinyatselwa ngaphansi kwetinyawo.

20 Angeke uhlanganiswe nabo ekungcwatjweni, ngenca yekutsi ulibhubhisile live lakho futsi wabulala bantfu bakho; intalelwane yebenti bebubi angeke kukhulunywe ngayo.

21 Tilungiselele kubulala bantfwana bakhe ngenca yebubi baboyise, kute bangavuki, noma bazuze live, noma bagcwalise umhlaba wonkhe ngemadolobha.

22 Ngoba ngitawusukuma ngilwe nabo, kusho iNkhosi yemaBandla, ngibulale eBhabhulona libito, kanye nensali, nendvodzana, kanye nemshana, kusho iNkhosi.

23 Ngetulu kwaloko ngitawuyenta ibe lifa letikhova, kanye nemachibi emanti; futsi ngitawuyishanyela ngemshanyelo wembubhiso, kusho iNkhosi yemaBandla.

24 INkhosi yemaBandla ifungile, yatsi: Ngempela njengoba ngikucabangile, kuyawukwenteka kanjalo; futsi njengekuhlela kwami, kuyawukuma kanjalo—

25 Kutsi ngitawuletsa um-Asiriya eveni lami, futsi etintsabeni tami ngimnyatsele ngaphansi kwetinyawo; ngaleso sikhatsi lijoka lakhe liyawusuka kubo, nemtfwalo wakhe usuke emahlombe abo.

26 Lena yinhloso lehloswe etikwemhlaba wonkhe; futsi lesi sandla leselulelwe etikwetive tonkhe.

27 Ngoba iNkhosi yemaBandla ikuhlosile, futsi ngubani loyawukuyivimbela na? Futsi sandla sayo seluliwe, ngubani loyawusibuyisela emuva na?

28 Ngemnyaka wekufa kwenkhosi Ahazi kwavela lesi sembulo.

29 Ungatfokoti wena, Filisti yonkhe, ngenca yekutsi indvuku yaloyo lokushayile yephukile; ngoba emphandzeni yenyoka kuyawuphuma libululu, futsi sitselo salo siyawuba yinyoka lendizako lenemlilo.

30 Futsi litubulo lalomphofu liyawukondliwa, futsi labeswele bayawulala phansi bavikeleke; futsi ngitawuyibulala imphandze yakho ngendlala, futsi uyawubulala insali yakho.

31 Lila, Awu sango; memeta Awu dolobha; wena, Filisti yonkhe, lengakahleleki; ngoba kuyawuvela enyakatfo intfutfu, futsi kute namunye loyawuba yedvwa ngetikhatsi takhe letibekiwe.

32 Uma kunjalo tiyawunika yiphi imphendvulo titfunywa tesive na? Kutsi iNkhosi iyitfolile iSiyoni, futsi labamphofu bebantfu bayo bayawuphephela kuyo.