1 Ngilaleleni, nine lenilandzela kulunga. Bukani kulo lidvwala lapho nicetulwe khona, kanye nakuyo imbobo yemgodzi lenikhishwe kuyo.

2 Bukani ku-Abrahama, uyihlo, kanye nakuye Sara, lonitalako; ngoba nguye yedvwa lengambita, ngaphindze ngambusisa.

3 Ngoba iNkhosi iyawuyidvudvuta iSiyoni, itawutidvudvuta tonkhe tindzawo leticitsiwe tayo; futsi itawukwenta lihlane layo libe njenge-Edeni, kanye nelugadvule lwayo lube njengensimu yeNkhosi. Injabulo kanye nentfokoto kuyawutfolakala kuyo, kubonga kanye nelivi lekuhlabelela.

4 Ngilaleleni, bantfu bami; futsi ningiphe indlebe, Awu sive sami; ngoba umtsetfo uyawuvela kimi, futsi ngitawukwenta kwehlulela kwami kube kukhanya kubantfu.

5 Kulunga kwami kusondzele; insindziso yami seyihambe phambili, futsi umkhono wami uyawukwehlulela bantfu. Tichingi titongilindza, futsi tiyawutsembela emkhonweni wami.

6 Phakamiselani emehlo enu ezulwini, nibuke emhlabeni ngaphansi, ngoba emazulu ayawushabalala njengentfutfu, nemhlaba uyawuguga njengengubo; futsi labo labahlala kuwo bayawufa njengendlela lefanako. Kodvwa insindziso yami iyawuma ingunaphakadze, nekulunga kwami angeke kucedvwe.

7 Ngilaleleni, nine lenati kulunga, nine bantfu tinhlitiyo tabo lengibhale umtsetfo wami kuto, ningakwesabi kusolwa bantfu, noma nesabe tihlamba tabo.

8 Ngoba umvunya uyawubadla njengengubo, nemphetfu iyawubadla njengensontfo. Kodvwa kulunga kwami kuyawuma ingunaphakadze, futsi nensindziso yami titukulwane ngetitukulwane.

9 Vuka, vuka! Yembatsa emandla, Awu mkhono weNkhosi; vuka njengasetinsukwini tasendvulo. Ngabe akusiwe yini lona lowancuma Rahabi, futsi wagwaza idrago na?

10 Ngabe kwakungesiwe yini lona lowomisa lwandle, emanti elwandle lolukhulu; lowenta indlela ekujuleni kwelwandle kute labahlengiwe bewele na?

11 Ngako-ke, labahlengiwe beNkhosi bayawubuya, futsi bete ngekuhlabelela eSiyoni; intfokoto lengunaphakadze nebungcwele kuyawuba setinhloko tabo; futsi bayawutfola kujabula nentfokoto; lusizi nekukhala kuyawubaleka.

12 Nginguye; yebo, nginguye loyo lonidvudvutako. Bukani, ungubani wena, kutsi ungesaba umuntfu, loyawufa, futsi loyindvodzana yemuntfu, loyawukwentiwa abe njengetjani na?

13 Futsi ukhohliwe yini yiNkhosi umenti wakho, leyaneka emazulu, futsi yabeka sisekelo semhlaba, futsi wesabile njalonjalo mihla yonkhe, ngenca yentfukutselo yemcindzeteli, shengatsi sewulindzele kubhubhisa na? Futsi iphi intfukutselo yemcindzeteli na?

14 Lotfunjiwe losiboshwa uyashesha, kute akhululwe, futsi kute angafeli emgodzini, noma kute kudla kwakhe angakwesweli.

15 Kodvwa ngiyiNkhosi Nkulunkulu wakho, lomagagasi akhe ayahlokoma; iNkhosi yemaBandla libito lami.

16 Futsi ngiwafakile emavi ami emlonyeni wakho, ngakusibekela emtfuntini wesandla sami, kute ngitjale emazulu futsi ngitibeke tisekelo temhlaba, ngitsi kuyo iSiyoni: Bukani, nibantfu bami.

17 Vuka, vuka, usukume, Awu Jerusalema, wena lonatse esandleni seNkhosi indzebe yentfukutselo yakhe—wena lonatse tidzidzi endzebeni yekutfutfumela letikhanyiwe—

18 Kute namunye longamhola emkhatsini wawo onkhe emadvodzana lawatele; noma kube khona longamtsatsa ngesandla, kuwo onkhe emadvodzana lawakhulisile.

19 Lamadvodzana lamabili etile kuwe, ngubani loyawukukhalela—incitsakalo kanye nekubhujiswa kwakho, indlala kanye nenkemba—futsi ngubani lengingakudvudvuta ngaye na?

20 Emadvodzana acalekile, ngaphandle kwalawa lamabili; wona alala ekugcineni kwemigwaco yonkhe; njengenkunzi yasendle isenethini, bagcwele intfukutselo yeNkhosi, kukhuta kwaNkulunkulu wakho.

21 Ngako-ke vani loku manje, wena lohluphekile, futsi lodzakiwe, kodvwa hhayi ngewayini:

22 Naku lokushiwo yiNkhosi yakho, iNkhosi lenguNkulunkulu wakho icelela bantfu bayo indlela; bukani, ngitsetse esandleni sakho indzebe yekutfutfumela, tidzidzi tendzebe yentfukutselo yami; awuseyukunatsa futsi nanini.

23 Kodvwa ngitawuyibeka esandleni sabo labo labakuhluphako; labatse emphefumulweni wakho: Khotsama, kute sindlule—futsi uwendlalile umtimba wakho njengemhlabatsi nanjengemgwaco kubo labendlulako.

24 Vuka, vuka wembatse emandla akho, Awu Siyoni; yembatsa tingubo takho letinhle, Awu Jerusalema, dolobha lelingcwele; kusukela nyalo kuya phambili akuseyukungena kuwe nanini longakasoki kanye nalongcolile.

25 Titsintsitse elutfulini; sukuma, hlala phansi, Awu Jerusalema; tikhulule kuto tibopho tentsamo yakho, Awu ndvodzakati letfunjiwe yaseSiyoni.