Sehluko 14
ISiyoni kanye nemadvodzakati ayo atawuhlengwa futsi ahlanjululwe ngelusuku lweminyaka letinkhulungwane—Catsanisa na-Isaya 4. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Futsi ngalolosuku, besifazane labasikhombisa bayawubamba indvodza yinye batsi: Sitawudla sinkhwa setfu, sembatse tingubo tetfu; kuphela nje sivumele sibitwe ngelibito lakho kute ususe lihlazo kitsi.
2 Ngalolosuku ligala leNkhosi liyawuba lihle futsi likhatimule; sitselo semhlaba siyoba sihle kakhulu futsi sibukeke kulabo labaphunyuka baka-Israyeli.
3 Futsi kuyawukwenteka kutsi, labo labashiywe eSiyoni basala eJerusalema bayawubitwa ngekutsi ngulabangcwele, bonkhe labo lababhalwe emkhatsini walabaphilako eJerusalema—
4 Lapho iNkhosi seyikugezile kungcola kwemadvodzakati aseSiyoni, futsi nalapho seyiyesulile ingati yaseJerusalema ekhatsi kwayo ngemoya wekwehlulela kanye nangemoya wekushisa.
5 Futsi iNkhosi itawudala etikwayo yonkhe indzawo yekuhlala yentsaba yaseSiyoni, nalabahlanganela kuyo; lifu kanye nentfutfu emini kanye nekukhanya kwelilangabi lemlilo ebusuku; ngoba etikwayo yonkhe inkhatimulo yaseSiyoni kuyawuba khona kuvikelwa.
6 Futsi kuyawuba khona lidvokodvo lemtfunti emini ekushiseni, libe yindzawo yekuphephela kanye neyekukhosela kuto tivunguvungu nakuyo imvula.