Sehluko 16
Isaya ubona iNkhosi—Tono ta-Isaya tiyatsetselelwa—Ubitelwa kutsi aphrofethe—Uphrofetha ngekulahlwa kwetimfundziso taKhristu ngemaJuda—Insali itawubuya—Catsanisa na-Isaya 6. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Ngemnyaka iNkhosi Uziya leyafa ngawo, ngayibona iNkhosi ihleti esihlalweni sayo sebukhosi, lesisetulu futsi lesiphakeme, umsila wesembatfo sayo wawugcwalise lithempeli.
2 Ngetulu kwaso kwakume emaserafi; ngulelo nalelo lalinetimphiko letisitfupha; ngetimphiko letimbili atimbonye buso bawo, ngaletimbili atimbonye tinyawo tawo, kwatsi ngaleti letimbili andiza.
3 Linye lalimemeta kulelinye, latsi: Ingcwele, ingcwele, ingcwele iNkhosi yemaBandla; umhlaba wonkhe ugcwele inkhatimulo yayo.
4 Tinsika temnyango tatfutfumela ngenca yelivi lakhe loyo lobekamemeta, futsi indlu yagcwala intfutfu.
5 Emvakwaloko ngatsi: Maye kimi! Ngoba ngiphelile; Ngenca yekutsi ngingumuntfu lotindzebe takhe tingcolile; futsi ngihleti ekhatsi kwebantfu labatindzebe tabo tingcolile; ngoba emehlo ami ayibonile iNkhosi, iNkhosi yemaBandla.
6 Emvakwaloko linye lemaserafi landiza leta kimi, liphetse lilahle lelivutsako esandleni salo, lelalilitsatse ngeludlawu elatini;
7 Futsi lalibeka emlonyeni wami, latsi: Buka, loku kutsintse tindzebe takho; bubi bakho bususiwe, netono takho tihlantiwe.
8 Ngetulu kwaloko ngeva livi leNkhosi, litsi: Ngubani lengiyawumtfuma, futsi ngubani lotawusiyela na? Emvakwaloko ngatsi: Nangu mine; tfuma mine.
9 Futsi yatsi: Hamba utjele laba bantfu—Lalelani njalo, kodvwa abatange bacondze; bonani njalo, kodvwa abatange babone.
10 Yenta inhlitiyo yalaba bantfu ikhuluphale, wente tindlebe tabo tibe butfuntfu, uvale emehlo abo—hleze babone ngemehlo abo, futsi beve ngetindlebe tabo, baphindze bacondze ngenhlitiyo yabo, baphendvuke bese bayaphiliswa.
11 Emvakwaloko ngatsi: Nkhosi, kutawute kube nini na? Yatsi: Kudzimate kubhujiswe emadolobha kubete bantfu labahlala khona, netindlu tingabe tisaba nebantfu, nelive lisale lingenalutfo.
12 Futsi iNkhosi ibasakatele kudze bantfu, ngoba kuyawuba khona incitsakalo lenkhulu ngekhatsi kwalelive.
13 Kodvwa ngisho namanje kuyawuba khona incenye yelishumi, bayawubuya, futsi bayawudliwa, njengesihlahla semtherebinte, nanjenge-oki lesiphunti sayo sikuwo lapho basusa emacembe ayo; kute intalelwane lengcwele ibe siphunti saso.