1 Noko, kufiphala angeke kusaba njengoba kwakunjalo ngesikhatsi setinhlupheko takhe, lapho ekucaleni yatsi kulihlupha kancane live lakaZebuloni, kanye nelive lakaNaftali, futsi emvakwaloko yahlupha kakhulu endleleni leya eLwandle loluBovu ngensheya kweJordane eGalile letive.

2 Bantfu labebahamba ebumnyameni bakubonile kukhanya lokukhulu; labo labahlela eveni lelitfunti lekufa, etikwabo kukhanya kubakhanyisele.

3 Usandzisile sive, futsi wandzisa intfokoto—batfokota phambi kwakho njengentfokoto yekuvuna, nanjengentfokoto yebantfu uma babelana imphango.

4 Ngoba ulephulile lijoke lemtfwalo wakhe, kanye nesagila semahlombe akhe, nendvuku yebacindzeteli bakhe.

5 Ngoba konkhe kulwa kwelibutfo kunesiyaluyalu semsindvo, futsi tingubo tibhucabhucwe engatini; kodvwa loku kuyawuba nekuvutsa kanye nekushisa kwemlilo.

6 Ngoba sitalelwe umntfwana, siphiwe indvodzana; umbuso uyawuba semahlombe akhe; libito lakhe kuyawutsiwa, nguLomangalisako, nguMeluleki, nguNkulunkulu loneMandla, nguBabe longunaPhakadze, iNkhosana yekuThula.

7 Kukhula kwembuso kanye nekuthula akunasiphetfo, etikwesihlalo sebukhosi saDavide, kanye nakuwo umbuso wakhe kutsi awuhlele, kanye nekuwumisa ngekwehlulela kanye nekulunga kusukela nyalo nasemvakwaloku, nangunaphakadze. Inshisekelo yeNkhosi yemaBandla itawukwenta loku.

8 INkhosi itfumele livi layo kuJakobe futsi likhanyisile etikwa-Israyeli.

9 Futsi bonkhe bantfu bayawulati, baka-Efrayimu kanye nebantfu baseSamariya, labatsi ngekutigcabha kanye nangekukhukhumala kwenhlitiyo:

10 Titini tidzilikele phansi, kodvwa sitawukwakha ngematje labatwe kahle; imikhiwa igawuliwe, kodvwa sitawuyenana ibe yimisedari.

11 Ngako-ke, iNkhosi iyawuphakamisa titsa taResini tibhekane naye, ihlanganise titsa takhe ndzawonye;

12 EmaSiriya ngaphambili kanye nemaFilisti ngasemuva; futsi bayawumshwabudzela Israyeli ngemlomo lovulekile. Ngoba kuko konkhe loku intfukutselo yakhe ayikapheli, kepha sandla sakhe siseluliwe nanyalo.

13 Ngoba bantfu abaphendvukeli kuloyo lobashayako, noma bayifune iNkhosi yemaBandla.

14 Ngako-ke iNkhosi itawuncuma ku-Israyeli inhloko kanye nemsila, ligala kanye nelikhwane ngelusuku lunye.

15 Lomdzala, nguye loyinhloko; futsi umphrofethi lofundzisa emanga, ungumsila.

16 Ngoba baholi balaba bantfu babenta kutsi baduke; futsi labo labaholwa ngibo bayabhujiswa.

17 Ngako-ke iNkhosi angeke ibe nayo intfokoto ngemajaha abo, noma ibe nemusa kulabangenaboyise babo kanye nebafelokati; ngoba nguloyo naloyo wabo ungumtentisi kanye nementi webubi, futsi yonkhe imilomo ikhuluma buwula. Ngoba kuko konkhe loku intfukutselo yakhe ayikapheli, kodvwa sandla sakhe siseluliwe nanyalo.

18 Ngoba bubi buvutsa njengemlilo; buyawushwabudzela tinchachabutane nemanyeva, futsi bulumeke emahlatsi etihlahla, futsi bayawushunca babheke etulu njengekukhuphuka kwentfutfu.

19 Ngelulaka lweNkhosi yemaBandla live lisitsekile, nebantfu bayawuba tinkhuni temlilo; kute umuntfu loyawusindzisa umnakabo.

20 Futsi uyawuhlwitsa ngasesandleni sangesekudla alambe; futsi uyawudla ngesandla sangesancele angeke besutse; nguloyo naloyo muntfu uyawudla inyama yesandla sakhe lucobo—

21 Manase, ku-Efrayimu, kanye na-Efrayimu kuManase; bayawugucukela bakaJuda. Kuko konkhe loku intfukutselo yakhe ayikapheli, kepha sandla sakhe siseluliwe nanyalo.