1 Futsi ngaleso sikhatsi ngitawumhlabelela lotsandziwe kakhulu wami ingoma yalotsandziwe wami, mayelana nesivini sakhe. Lotsandziwe kakhulu wami unesivini egcumeni lelivundze kakhulu.

2 Futsi wasibiyela, wakhipha nematje kuso, wasihlanyela ngemvini welikhetselo kakhulu, wakha umbhoshongo ekhatsi kuso, waphindze wakha sikhamo seliwayini kuso; abheke kutsi kufanele sitsele emagelebisi, kodvwa satsela emagelebisi esiganga.

3 Manje, Awu takhamuti taseJerusalema, kanye nani madvodza akaJuda, yehlulelani, ngiyanincusa, emkhatsini wami nesivini sami.

4 Ngabe yini lenye lebekufanele ngiyente esivinini sami loko lengingakwentanga kuso na? Ngaloko-ke, ngesikhatsi ngisabukile kutsi kufanele sitsele emagelebisi sona sitsele emagelebisi asendle.

5 Manje hambani; ngitawunitjela kutsi ngitawukwentani ngalesivini sami—ngitawususa lutsango lwaso, siyawudliwa siphele; ngitawulubhidlita lubondza lwaso, futsi siyawunyatselwa phansi;

6 Futsi ngitawusiyekela simoshakale; asiyukutsenwa noma sivukutwe; kodvwa kuyawuvela tinchachabutane kanye nemanyeva; ngetulu kwaloko ngitawuyala emafu kutsi anganisi imvula etikwaso.

7 Ngoba sivini seNkhosi yemaBandla yindlu yaka-Israyeli, bantfu bakaJuda basitfombo sakhe lesitsandzekako; ulindzele kwehlulela, kodvwa bukani, kucindzetelwa; ulindzele kulunga, kodvwa bukani, kukhala.

8 Maye kulabo labangeta indlu kulenye indlu, kute kungasabi nendzawo, kutsi bahlaliswe bodvwa ekhatsi nekhatsi kwemhlaba!

9 Etindlebeni tami, kusho iNkhosi yemaBandla, ngekweliciniso letiningi tindlu tiyawubate lutfo, futsi lamakhulu kanye nalamahle emadolobha akayukuba nebantfu.

10 Yebo, ema-eka lalishumi esivini ayawutsela ibhathi yinye, kanye nenhlanyelo yelihomere iyawutsela li-efa.

11 Maye kulabo labavuka ekuseni ngeluvivi, kute balandzele sinatfo lesinemandla, labo labachubeka kute kuhlwe, futsi badzakwe liwayini!

12 Lihabhu, nevayolini, nesigubhu, nemntjingozi, kanye neliwayini emadzilini abo; kodvwa abawatisi umsebenti weNkhosi, noma bacabange ngetento tetandla tayo.

13 Ngako-ke, bantfu bami bangene ekutfunjweni, ngenca yekubate lwati; futsi nebantfu labahloniphekile babo bafile yindlala, futsi ticuku tabo tihashulwe koma.

14 Ngako-ke, sihogo sitandzisile, futsi savula umlomo waso ngalokwecile; inkhatimulo yabo, nesicuku sabo, nemakhosi abo, kanye naloyo lojabulako, bayawukwehlela kuso.

15 Futsi umuntfu lodzelelekile uyawukwehliswa, nemuntfu lomkhulu uyawutfotjiswa, nemehlo alabatiphakamisako ayawutfotjiswa.

16 Kodvwa iNkhosi yemaBandla iyawuphakanyiswa ekwehlulelweni, naNkulunkulu longcwele uyawungcweliswa ekulungeni.

17 Ngaleso sikhatsi emawundlu ayawudla ngendlela yawo, nasetindzaweni leticitsiwe talabacebile kuyawudla tihambi.

18 Maye kulabo labadvonsa bubi ngetintsambo letilite, kanye nesono kungatsi yintsambo yencola;

19 Labo labatsi: Akaphutfume, asheshise umsebenti wakhe, kute siwubone: neseluleko saloNgcwele waka-Israyeli asisondzele futsi sifike, kute sisati.

20 Maye kulabo lababita bubi ngebuhle, nebuhle ngebubi, labo lababeka bumnyama bube kukhanya, nekukhanya kube bumnyama, labo lababeka lokubabako kube ngulokunongotelako, nalokunongotelako kube ngulokubabako!

21 Maye kulabo labahlakaniphile emehlweni abo kanye nalabanekucondza ngekubona kwabo!

22 Maye kulabo labangemachawe ekunatseni liwayini, nebantfu labangemachawe ekudidiyeleni sinatfo lesinemandla;

23 Labavumela lababi kute batfole umvuzo, labasusa kulunga kulolungile!

24 Ngako-ke, njengemlilo ushisa tinhlanga, kanye nelilangabi lidla emabibi, imphandze yabo iyawubola, futsi timbali tabo tiyawuphephuka njengelutfuli; ngenca yekutsi bawulahlile umtsetfo weNkhosi yemaBandla, futsi balidzelela livi laloNgcwele waka-Israyeli.

25 Ngako-ke, intfukutselo yeNkhosi yokhelekile kubantfu bayo, futsi iselulile sandla sayo kubo, yabashaya; emagcuma anyakata, tidvumbu tabo tadzabuka ekhatsi etitaladini. Noko kuko konkhe loku intfukutselo yakhe ayikapheli, kodvwa sandla sayo siseluliwe.

26 Futsi itawuphakamisa siboniso etiveni letikhashane, iphindze ishaye impembe kusukela emkhawulweni wemhlaba; futsi bukani, tiyawukuta masinyane ngelitubane; kute namunye loyawukhatsala noma akhubatele emkhatsini wato.

27 Kute namunye loyawutela noma alale; noma libhande letinkhalo tabo liceke, noma imichilo yeticatfulo tabo idzabuke;

28 Imicibisholo yabo leyawukhalipha, kanye nabo bonkhe butjoki babo bugotjwe, futsi tinselo temahhashi abo tiyawubalwa njengelitje lelicine kakhulu, kanye nemasondvo abo njengesivunguvungu, kubhodla kwabo njengekwelibhubesi.

29 Bayawubhodla njengemabhubesi lamancane; yebo bayawubhodla, bayibambe inyamatane, bayawukwemuka nayo ngekuphepha, futsi kute namunye longayikhulula.

30 Futsi ngalolosuku bayawubhodla ngetulu ngalokumelene nabo njengekuhlokoma kwelwandle; uma babuka eveni, bukani, bumnyama kanye nelusizi, nekukhanya kwentiwe kube mnyama emazulwini ako.