1 Manje, bukani, bomnaketfu, sengikhulumile kini, njengoba Moya ungiphocelele; ngaloko-ke, ngiyati kutsi loku kufanele ngempela kwenteke.

2 Futsi tintfo letiyawubhalwa kuleyo ncwadzi tiyawuba nguletiligugu lelikhulu kubantfwana bebantfu, ikakhulukati kuyo intalelwane yendlu yaka-Israyeli.

3 Ngoba kuyawukwenteka ngalolosuku kutsi emabandla lakhiwe, kodvwa hhayi eNkhosini, lapho lomunye ayawutsi kulomunye: Buka, mine ngimi lengiwenkhosi; futsi labanye bayawutsi: Mine, ngimi lengiweNkhosi; futsi wonkhe muntfu lowakhe emabandla uyawusho kanjalo, kodvwa hhayi eNkhosini—

4 Futsi ayawubanga ngulelo nalelo; nebaphristi bawo bayawubanga nguloyo naloyo, futsi bayawufundzisa ngekwemfundvo yabo, baphike naMoya loNgcwele, lokunguyena loniketa kukhuluma.

5 Futsi baphika emandla aNkulunkulu, loNgcwele waka-Israyeli; batsi kubantfu: Lalelani tsine, nive umyalo wetfu; ngoba bukani kute Nkulunkulu namuhla, ngoba iNkhosi neMhlengi seyiwentile umsebenti wayo, futsi seyinikete emandla ayo kubantfu.

6 Bukani, lalelani umyalo wami; uma bayawutsi kukhona simangaliso lesentekile ngesandla seNkhosi, ningakukholwa loko, ngoba ngalolu lusuku akasuye Nkulunkulu wetimangaliso; uwentile umsebenti wakhe.

7 Yebo, futsi kuyawuba khona labaningi labayawutsi: Dlani, natsa, ujabule, ngoba kusasa sitokufa; futsi kuyawuba kuhle kitsi.

8 Futsi ngetulu kwaloko kuyawuba khona labaningi labayawutsi: Dlani, natsa, ujabule; noko, mesabe Nkulunkulu—angeke akubeke licala ekwenteni sono lesincane; yebo, camba emanga kancane, sitakala ngalomunye ngenca yemavi akhe, gubhela makhelwane wakho umgodzi; kute bungoti kuloku; yenta tonkhe leti tintfo, ngoba kusasa sitofa; futsi uma kungukutsi sinelicala, Nkulunkulu utawusishaya ngemivimba lembalwa, ekugcineni siyawusindziswa embusweni waNkulunkulu.

9 Yebo, futsi kuyawuba khona labaningi labayawufundzisa ngalendlela, emanga nangelite kanye netimfundziso letibuwula, bayawukhukhumala etinhlitiyweni tabo, bafune ngekujula kufihla emasu abo eNkhosini; futsi imisebenti yabo iyawuba sebumnyameni.

10 Futsi ingati yalabangcwele iyawukhala emhlabatsini ngalokumelene nabo.

11 Yebo, bonkhe baphambukile endleleni, bangenwe yinkhohlakalo.

12 Ngenca yekutigcabha, nangenca yebafundzisi bemanga, nemfundziso yemanga, emabandla abo angenwe yinkhohlakalo, futsi emabandla abo aphakeme; ngenca yekutigcabha bakhukhumele.

13 Baphanga labamphofu ngenca yetindlu tabo letingcwele letinhle; baphanga labamphofu ngenca yetingubo tabo letinhle; futsi bahlupha labamnene nalabamphofu ngenhlitiyo, ngoba ekutichenyeni kwabo bakhukhumele.

14 Banetihloko letilukhuni kanye nekutigcabha; yebo, ngenca yekutigcabha, nebubi, netinengiso, nebugwadla, bonkhe badukile ngaphandle kwalabambalwa, lababalandzeli baKhristu labatfobekile; noko, bayaholwa, kute kutsi ngetikhatsi letiningi baphambuke ngenca yekutsi bafundziswa ngemiyalo yebantfu.

15 Awu labahlakaniphile, nalabafundzile, kanye nalabacebile, labakhukhumele ekutichenyeni kwetinhlitiyo tabo, kanye nabo bonkhe labo labashumayela timfundziso temanga, nabo bonkhe labo labenta bugwadla, futsi bagucule indlela lecondzile yeNkhosi, maye, maye, maye kubo, kusho iNkhosi Nkulunkulu Somandla, ngoba bayawuphonswa phansi esihogweni!

16 Maye kubo labo labakhweshisela eceleni labalungile njengentfo lengenalutfo futsi bahlambalate loko lokuhle, batsi kuyintfo lenganamsebenti! Ngoba lusuku luyeta lapho iNkhosi Nkulunkulu masinyane iyawubahambela bantfu basemhlabeni; futsi ngalolosuku lapho sebavutfwe ngalokungcwele ebubini lobukhulu bayawubhubha.

17 Kodvwa buka, uma bantfu basemhlabeni bangaphendvuka ebubini babo nasetinengisweni angeke babhujiswe, kusho iNkhosi yemaBandla.

18 Kodvwa buka, lelo bandla lelikhulu nalelinengekile, sifebe semhlaba wonkhe, kufanele liwele emhlabeni, futsi kuyoba kukhulu kuwa kwalo.

19 Ngoba umbuso wadeveli kufanele utanyatanyiswe, futsi labo labangebawo kufanele kutsi baphehlelwe ekuphendvukeni, noma develi utawubabamba ngtinketane takhe taphakadze, baphehlelwe entfukutselweni bashabalale.

20 Ngoba buka, ngalolosuku uyawudlanga etinhlitiyweni tebantfwana bebantfu, abaphehle kute batfukutselele loko lokuhle.

21 Futsi labanye utawubatfobisa, anguloku abakhohlisa kutsi balondzeke ngekwasenyameni, kute batsi; Konkhe kulungile eSiyoni; yebo, iSiyoni iyaphumelela, konkhe kuhle—futsi ngaleyo ndlela develi uyoyilutsa imiphefumulo yabo, futsi abahole ngebucili abayise phansi esihogweni.

22 Futsi buka, labanye uyobakhohlisa, abatjele kutsi asikho sihogo; atsi kubo: Mine angisuye develi, ngoba kute—ubahlebela kanje etindlebeni tabo, ate ababambe ngetinketane takhe letesabekako, abayise lapho sekute khona kukhululwa.

23 Yebo, babanjwa ngekufa, kanye nangesihogo; futsi kufa kanye nesihogo, kanye nadeveli, bonkhe labo lababanjwe ngato leti tintfo kumele beme phambi kwesihlalo sebukhosi saNkulunkulu, futsi bahlulelwe ngekwemisebenti yabo, kusuka lapho sekufanele baye endzaweni lelungiselwe bona, lichibi lemlilo kanye nesibabule, lokukuhlupheka lokungenakuphela.

24 Ngako-ke, maye kuloyo lokhululekile eSiyoni!

25 Maye kuloyo lomemeta atsi: Konkhe kulungile!

26 Yebo, maye kuloyo lolalela imiyalo yebantfu, aphike emandla aNkulunkulu, nesipho saMoya loNgcwele!

27 Yebo, maye kuloyo lotsi: Sesitfole lokwanele, futsi asisakudzingi lokunye!

28 Kwephetsa, maye kubo bonkhe labo labatfutfumelako, futsi labatfukutsele ngenca yeliciniso laNkulunkulu! Ngoba buka, loyo lowakhe etikwelidvwala ulemukela ngekutfokota; futsi loyo lowakhe etikwesisekelo lesisihlabatsi uyatfutfumela hleze awe.

29 Maye kuloyo loyawutsi: Sesilitfolile livi laNkulunkulu, futsi asisalidzingi lelinye livi laNkulunkulu, ngoba sesanele!

30 Ngoba bukani, naku lokushiwo yiNkhosi Nkulunkulu: Ngitawubanika bantfwana bebantfu umugca etikwalomunye umugca, umyalo etikwalomunye umyalo, lokuncane lapha nalokuncane lapho; futsi babusisiwe labo labalalela imiyalo yami, futsi baboleke indlebe ekucondziseni kwami, ngoba bayawufundza kuhlakanipha; ngoba kuloyo lomukelako ngitawumnika lokunye; futsi kulabo labayawutsi, Sesanele, kubo kuyawutsatfwa naloko labanako.

31 Ucalekisiwe loyo lobeka litsemba lakhe kumuntfu, noma ente umuntfu emandla akhe, noma lolalela imiyalo yebantfu, ngaphandle uma imiyalo yabo inikwa ngemandla aMoya loNgcwele.

32 Maye kubo beTive, kusho iNkhosi Nkulunkulu yemaBandla! Ngoba nanoma umkhono wami ngiyawuwelulela kubo lusuku nelusuku, batawungiphika; noko, ngitawuba nesihawu kubo, kusho iNkhosi Nkulunkulu, uma batawuphendvuka futsi bete kimi; ngoba umkhono wami weluliwe lonkhe lusuku, kusho iNkhosi Nkulunkulu wemaBandla.