1 Manje mine, Nefi, angeke ngikwati kutibhala tonkhe tintfo letafundziswa emkhatsini webantfu bami; futsi angisilo liciko ekubhaleni, njengasekukhulumeni; ngoba uma umuntfu akhuluma ngemandla aMoya loNgcwele emandla aMoya loNgcwele akutfwala loko akuyise etinhlitiyweni tebantfwana bebantfu.

2 Kodvwa bukani, kukhona labaningi labatente lukhuni tinhlitiyo tabo ngalokumelene naMoya loNgcwele, kute ungabi nendzawo kubo; ngaloko-ke balahla tintfo letiningi letibhaliwe futsi batitsatse njengetintfo letilite.

3 Kodvwa mine, Nefi, ngikubhalile loku lengikubhalile, futsi ngikutsatsa njengentfo lebaluleke kakhulu, ikakhulukati kubantfu bami. Ngoba ngibathandazela njalo emini, emehlo ami amantisa umcamelo wami ebusuku, ngenca yabo; futsi ngiyakhala kuNkulunkulu wami ngekukholwa, ngiyati kutsi utawukuva kukhala kwami.

4 Futsi ngiyati kutsi iNkhosi Nkulunkulu itawuyingcwelisa imithandazo yami kute kuzuze bantfu bami. Futsi emavi lengiwabhalile ebutsakatsakeni atawukwentiwa acine kubo; ngoba abavumisa kutsi bente lokuhle; abatisa ngaboyise; futsi akhuluma ngaJesu, futsi abavumisa kutsi bakholwe kuye, futsi babeketele kute kube sekugcineni, lokukuphila lokuphakadze.

5 Futsi akhuluma kakhulu ngalokumelene nesono, njengekuba sobala kweliciniso; ngaloko-ke, kute umuntfu lotawuwatfukutselela emavi lengiwabhalile ngaphandle kwekutsi anemoya wadeveli.

6 Ngiyatfokota ngalokusobala; ngiyatfokota ngeliciniso, ngiyatfokota ngaJesu wami, ngoba uwuhlengile umphefumulo wami esihogweni.

7 Nginelutsandvo ngebantfu bami, kanye nelukholo lolukhulu kuKhristu kutsi ngiyawuhlangana naleminingi imiphefumulo lengenasici esihlalweni sakhe sekwehlulela.

8 Nginelutsandvo ngemJuda—ngitsi umJuda, ngoba ngicondze wona lapho ngavela khona.

9 Ngetulu kwaloko nginelutsandvo ngebeTive. Kodvwa bukani, kute lengikufisako ngalaba ngaphandle kwekutsi babuyisane naKhristu, futsi bangene esangweni lelincane, bahambe endleleni lengumntjuntju lebaholela ekuphileni, futsi bachubeke kuleyo ndlela kute kuphele lusuku lwekuvivinywa.

10 Manje, bomnaketfu labatsandzekako, futsi ngalokunjalo nemJuda, kanye nani nonkhe mikhawulo yemhlaba, walaleleni lamavi futsi nikholwe kuKhristu; futsi uma ningakholwa kulamavi kholwani kuKhristu. Futsi uma niyokholwa kuKhristu nitawukholwa kulamavi, ngoba angemavi aKhristu, futsi unginike wona; futsi afundzisa bonkhe bantfu kutsi bente lokuhle.

11 Futsi uma angasiwo emavi aKhristu, yehlulelani—ngoba Khristu utawunikhombisa, ngemandla kanye nangenkhatimulo lenkhulu, kutsi angemavi akhe ngelusuku lwekugcina, futsi wena nami siyawuma buso nebuso phambi kwesihlalo sakhe; niyawukwati kutsi ngiyaletwe nguye kutsi ngitibhale leti tintfo, noma kungebutsakatsaka bami.

12 Futsi ngiyathandaza kuBabe egameni laKhristu kutsi labaningi betfu, uma kungesitsi sonkhe, basindziswe embusweni wakhe ngalolosuku lolukhulu nelwekugcina.

13 Manje, bomnaketfu labatsandzekako, bonkhe labo lokungebendlu yaka-Israyeli, kanye nani nonkhe mikhawulo yemhlaba, ngikhuluma kini njengelivi laloyo lokhala elutfulini: Salani kahle kute kube lolosuku lolukhulu luyafika.

14 Futsi nine leningeke nihlanganyele ebuhleni baNkulunkulu, futsi nihloniphe emavi emaJuda, futsi ngalokunjalo nemavi ami, kanye nemavi layawuphuma emlonyeni weMvana yaNkulunkulu, bukani, ngivalelisa kuvalelisa kwaphakadze, ngoba lamavi ayawunilahla ngelicala ngelusuku lwekugcina.

15 Ngoba loko lengikubopha emhlabeni, kuyawubekwa ebaleni ngalokumelene nani esihlalweni sekwehlulela; ngoba iNkhosi ingiyalete kanjalo futsi kufanele ngilalele. Amen.