1 Manje sengikhuluma kuwe, Josefa, tfumbu wami. Wena lowatalelwa ehlane letinhlupheko tami; yebo, etinsukwini telusizi lwami lolukhulu kakhulu make wakho wakutala.

2 Futsi shengatsi iNkhosi ingakungcwelisela lona nawe lelive, lokulive leliligugu kakhulu, libe lifa lakho kanye nelifa lentalelwane yakho kanye nabomnakenu, kute nivikeleke ingunaphakadze, uma kungukutsi niyawuyigcina imiyaleto yaloNgcwele waka-Israyeli.

3 Futsi manje, Josefa, tfumbu wami, lengamkhipha ehlane letinhlupheko tami, shengatsi iNkhosi ingakubusisa ingunaphakadze, ngoba intalelwane yakho ayiyukubhujiswa iphele nya.

4 Ngoba buka, uyintalo yesisu sami; futsi mine ngisitukulwane saJosefa lowatfwalwa watfunjelwa eGibhithe. Futsi tatitinkhulu tivumelwano teNkhosi leyatenta naJosefa.

5 Ngaloko-ke, Josefa ngempela walubona lusuku lwetfu. Futsi watfola setsembiso eNkhosini, sekutsi intalo yesisu sakhe iNkhosi Nkulunkulu iyovusa ligala lelilungile kuyo yindlu yaka-Israyeli; hhayi Mesiya, kodvwa ligala lelalitohleshulwa, noko, kutsi likhunjulwe etivumelwaneli teNkhosi kangangoba Mesiya uyawubonakaliswa kubo etinsukwini tekugcina, ngemandla amoya, kute baphume ebumnyameni babe sekukhanyeni—yebo, baphume ebumnyameni labakubo bangati futsi baphume ekutfunjweni baye enkhululekweni.

6 Ngoba Josefa ngempela wafakaza, watsi: Umboni iNkhosi Nkulunkulu wami iyawumvusa, loyawukuba ngumboni lokhetsiwe kuyo intalo yesisu sami.

7 Yebo, Josefa ngempela watsi: Naku lokushiwo yiNkhosi kimi: Umboni lokhetsiwe ngitawumvusa uyawuphuma kuyo intalo yesisu sakho; futsi uyawukwatiswa kakhulu emkhatsini wentalo yesisu sakho. Futsi ngitawumnika umyaleto wekutsi uyawukwenta umsebenti wentalo yesisu sakho, bomnakabo, loyawukuba ngulobalulekile kakhulu kubo, nasekubabuyiseleni elwatini lwetivumelwano lengatenta kuboyihlo.

8 Futsi ngitawumnika umyaleto wekutsi akayukwenta nome ngumuphi lomunye umsebenti, ngaphandle kwemsebenti lowo lengiyawumyaleta wona. Futsi nitawumenta abe mkhulu emehlweni ami; ngoba uyawukwenta umsebenti wami.

9 Futsi uyawukuba mkhulu njengaMosi, lengatsi ngiyawunivusela yena, kute akhulule bantfu bami, Awu yindlu yaka-Israyeli.

10 Futsi Mosi ngitawumvusa, kute akhulule bantfu bakho baphume eveni laseGibhithe.

11 Kodvwa umboni ngitawumvusa kuyo intalo yesisu sakho; futsi ngitawumnika emandla ekutsi aletse livi lami kuyo intalelwane yesisu sakho—futsi hhayi kuletsa livi lami kuphela, kusho iNkhosi, kodvwa kubakholwisa ngelivi lami, leliyawube selivele latisiwe emkhatsini wabo.

12 Ngaloko-ke, intalo yesisu sakho iyawubhala; kanjalo nentalo yesisu saJuda iyawubhala; futsi loko lokuyawubhalwa yintalo yesisu sakho, naloko lokuyawubhalwa yintalo yesisu saJuda, kuyawukhula ndzawonye, kute kuphikise timfundziso temanga futsi kucedze imibango, futsi kuletse kuthula emkhatsini wentalo yesisu sakho, kanye nekuyiletsa elwatini lwaboyise etinsukwini tekugcina, futsi ngalokunjalo naselwatini lwetivumelwano tami, kusho iNkhosi.

13 Futsi ebutsakatsakeni uyawukwentiwa abe nemandla, ngalolosuku ngesikhatsi umsebenti wami sewucala emkhatsini wabo bonkhe bantfu bami, kute nibuyiselwe, Awu yindlu yaka-Israyeli, kusho iNkhosi.

14 Futsi waphrofetha kanje Josefa, atsi: Buka, loyo mboni iNkhosi itawumbusisa; futsi labo labayofuna kumbulala bayawubhujiswa; ngoba lesi setsembiso, lengisitfole eNkhosini, ngentalo yesisu sami, siyawugcwaliseka. Buka, nginesiciniseko ngekugcwaliseka kwalesi setsembiso

15 Libito lakhe liyawubitwa ngami; futsi liyawukuba libito leyise. Uyawuba njengami; ngoba leyontfo, iNkhosi leyawuyiletsa ngesandla sakhe, ngemandla eNkhosi iyawuletsa bantfu bami ensindzisweni.

16 Yebo, waphrofetha kanjalo ke Josefa atsi: Nginesiciniseko ngalentfo, njengoba nginesiciniseko ngesetsembiso saMosi; ngoba iNkhosi itsite kimi, ngitawuyigcina intalelwane yakho ingunaphakadze.

17 Futsi iNkhosi itse: Ngitawuvusa Mosi; futsi ngitawumniketa emandla endvukwini; futsi ngitawumniketa kwehlulela ngembhalo. Kodvwa angeke ngilukhulule lulwimi lwakhe, kutsi akhulume kakhulu, ngoba angitukumenta abe liciko ekukhulumeni. Kodvwa ngitawumbhalela umtsetfo wami, ngemunwe wesandla sami lucobo; futsi ngitawumentela umkhulumeli wakhe.

18 Futsi iNkhosi yaphindza yatsi kimi: Ngitawuvusa kuyo intalo yesisu sakho; futsi ngitawumentela umkhulumeli. Buka, ngitawumniketa kutsi abhale umbhalo wentalo yesisu sakho, abhalele intalo yesisu sakho, futsi umkhulumeli wesisu sakho uyawukumemetela loko.

19 Futsi emavi layawuwabhala ayawuba ngemavi ladzingekile ngekuhlakanipha kwami kutsi andluliselwe kuyo intalo yesisu sakho. Futsi kuyawukuba shengatsi intalo yesisu sakho ikhale kubo iselutfulini; ngoba ngiyalwati lukholo lwabo.

20 Futsi iyawukhala iselutfulini; yebo, nangekuphendvuka kubomnakabo, nangemvakwetitukulwane letiningi lesetendlula ngabo, Futsi kuyawukwenteka kutsi kukhala kwabo kuyawukuya kuyo intalo yesisu sakho, njengekuba sobala kwemavi abo.

21 Ngenca yelukholo lwabo emavi abo ayawuchubekela phambili aphuma emlonyeni wami aye kubomnakabo labayintalo yesisu sakho; futsi butsakatsaka bemavi abo ngitawubenta bucine elukholweni lwabo, kute ngikhumbule sivumelwano lengasenta kuboyihlo.

22 Manje, buka, ndvodzana yami Josefa, babe wakudzala waphrofetha ngalendlela.

23 Ngaloko-ke, ngenca yalesi sivumelwano wena ubusisiwe; ngoba intalelwane yakho angeke ibhujiswe, ngoba iyawulalela emavi alencwadzi.

24 Futsi kuyawuvuka lomunye lonemandla emkhatsini wabo, loyawukwenta lokuningi lokuhle, ekukhulumeni nasekwenteni, uyawuba lithulusi etandleni taNkulunkulu, abe nelukholo lolukhulu, lwekwenta timangaliso letinkhulu, futsi ente leyontfo lenkhulu emehlweni aNkulunkulu, ekugcwalisekeni kwekubuyiselwa lokuningi kuyo indlu yaka-Israyeli, futsi nakuyo intalelwane yabomnakenu.

25 Manje, ubusisiwe, Josefa. Buka, umncane; ngaloko-ke lalela emavi emnakenu, Nefi, futsi kuyawukwentiwa kuwe ngekwemavi lesengiwakhulumile. Khumbula emavi eyihlo lobhubhako. Amen.