Sehluko 17
Efrayimu kanye neSiriya balwa naJuda—Khristu utawutalwa yintfombi—Catsanisa na-Isaya 7. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Futsi kwenteka kutsi etinsukwini ta-Ahazi indvodzana yaJothamu, indvodzana ya-Uziya, inkhosi yakaJuda, Resini, inkhosi yaseSiriya, kanye naPhekha indvodzana yaRemaliya, inkhosi yaka-Israyeli, bahamba bakhuphukela ngaseJerusalema kuyolwa nayo, kepha abakwatanga kuyincoba.
2 Futsi kwatjelwa indlu yaDavide, kutsi: ISiriya itihlanganise na-Efrayimu. Futsi inhlitiyo yakhe yatfutfumela, kanye netinhlitiyo tebantfu bakhe, njengetihlahla telihlatsi tinyakatiswa ngumoya.
3 Emvakwaloko iNkhosi yatsi ku-Isaya: Hamba nyalo uhlangabete Ahazi, wena kanye naSherayi Jashubi indvodzana yakho, ekugcineni kwemsele wesitiba lesingenhla kwemgwaco lomkhulu ensimini yemgezi wetingubo;
4 Futsi utsi kuye: Caphela, uthule; ungesabi, noma ungaphelelwa ngemandla ngenca yemisila lemibili yaleti tinkhuni letishuncako, ngenca yelulaka lolwesabekako lwaResini neSiriya, kanye nelwendvodzana yaRemaliya.
5 Ngenca yekutsi iSiriya, na- Efrayimu, kanye nendvodzana yaRemaliya bakwakhela luzungu, batsi:
6 Asikhuphuke siyobukana naJuda futsi simhluphe, asitehlukanisele yena, futsi sibeke inkhosi emkhatsini wakhe, yebo, indvodzana yaThabheyeli.
7 Naku lokushiwo yiNkhosi Nkulunkulu: Akuyukwenteka, noma kuphumelele.
8 Ngoba inhloko yeSiriya yiDamaseko, nenhloko yeDamaseko, nguResini; futsi ekhatsi kweminyaka lengemashumi lasitfupha nesihlanu Efrayimu iyawuhlakatwa kute angabe asaba nebantfu.
9 Inhloko ya-Efrayimu yiSamariya, nenhloko yeSamariya yindvodzana yaRemaliya. Uma ningetukukholwa ngempela aniyukumiswa.
10 Ngetulu kwaloko, iNkhosi yaphindze yakhuluma ku-Ahazi, itsi:
11 Cela sibonakaliso eNkhosini Nkulunkulu wakho; sicele noma sisekujuleni, noma ekuphakameni kwasezulwini.
12 Kodvwa Ahazi watsi: Angeke ngisicele, futsi angeke ngiyilinge iNkhosi.
13 Futsi watsi: Lalela nyalo, Awu yindlu yaDavide; ngabe kuyintfo lencane yini kuwe kukhatsata bantfu, kodvwa ungamkhatsata yini naNkulunkulu wami na?
14 Ngako-ke, iNkhosi lucobo lwayo iyawunniika sibonakaliso—Bukani, intfombi iyawukhulelwa, iyawutala indvodzana, iyawumetsa libito layo kutsi ngu-Imanyuweli.
15 Iyawudla bhotela kanye neluju, kute ikwati kwala lokubi ikhetse lokuhle.
16 Ngoba ngaphambi kwekutsi umntfwana akwati kwala lokubi futsi akhetse lokuhle, lelive lewulenyanyako liyawube selishiywe ngiwo omabili emakhosi alo.
17 INkhosi iyawuletsa etikwakho, nasetikwebantfu bakho, nasetikwendlu yeyihlo, tinsuku letingakefiki kusukela ngelusuku Efrayimu esuka ngalo kaJuda, inkhosi yase-Asiriya.
18 Futsi kuyawukwenteka kutsi ngalolosuku iNkhosi iyawushayela imphungane inkwela lesencenyeni yekugcina yeGibhithe, kanye nenyosi leseveni lase-Asiriya.
19 Futsi tiyawukuta, tiphumule tonkhe etihosheni letehlelako, nasemifantfwini yemadvwala, nasetikwawo onkhe emanyeva, nasetikwato tonkhe tihlahla.
20 Ngalolosuku iNkhosi iyawuhhula ngensingo lecashiwe, ngabo labangesheya kwemfula, iNkhosi yase-Asiriya, inhloko, kanye nelunwele lwetinyawo; futsi ngetulu kwaloko iyawusicedza nesilevu.
21 Futsi kuyawukwenteka kutsi ngalolosuku, umuntfu uyawuwondla litfole kanye netimvu letimbili;
22 Futsi kuyawukwenteka, ngenca yebuningi belubisi letiyawulukhipha uyawukudla bhotela; ngoba bhotela kanye neluju wonkhe muntfu losele eveni uyawukudla.
23 Futsi kuyawukwenteka ngalolosuku, tonkhe tindzawo letiyawuba khona, lapho kwakukhona imivini letinkhulungwane letilingana netinhlavu letitinkhulungwane tesiliva, kuyawuba tenchachabutane nemanyeva.
24 Ngemicibisholo kanye nebutjoki bantfu bayawukuta lapho, ngoba lonkhe live liyawuba tinchachabutane nemanyeva.
25 Futsi onkhe emagcuma ayawulinywa ngeligeja, lapho kungeke kusaba khona kwesaba tinchachabutane kanye nemanyeva; kodvwa ayawuba ekuchuba tinkhabi, kanye nekugcotjwagcotjwa timvu kanye netimbuti letincane ngelinani.