Sehluko 7
Jakobe uyachubeka nekufundza ku-Isaya: Isaya ukhulumisa kwaMesiya—Mesiya utawuba nelulwimi lwalabafundzile—Utawuniketa umhlane wakhe kubashayi—Akatukutfotjiswa—Catsanisa na-Isaya 50. Cishe ngemnyaka wa 559 kuya kuwa 545 ngaphambi kwekutalwa kwaKhristu.
1 Yebo, ngoba naku lokushiwo yiNkhosi: Ngabe ngehlukene nawe, noma ngabe ngikulahlile ingunaphakadze na? Ngoba isho kanje iNkhosi: Iphi incwadzi yamake wakho yesahlukaniso na? Ngabe nginike bani, noma ngumuphi kulengibakweletako lenginitsengise kubo na? Yebo, ngabe nginitsengise kubani na? Bukani, ngenca yebubi benu nititsengisile futsi ngenca yetiphambeko tenu make wenu ngehlukene naye.
2 Ngaloko-ke, ngesikhatsi ngifika, bekungekho muntfu; ngesikhatsi ngimemeta, yebo, akubanga namunye lophendvulako. Awu yindlu yaka-Israyeli, ngabe sandla sami sifinyetiwe yini kutsi asinawukwati kuhlenga, noma ngabe anginamandla ekukhulula na? Bukani, ngekukhuta kwami ngomisa lwandle, ngenta imifula yabo ibe lihlane kanye netinhlanti tabo tinuke ngenca yemanti lashile, futsi tiyafa ngenca yekoma.
3 Ngembatsisa emazulu ngebumnyama, futsi ngenta indvwangu yelisaka ibe simbonyo sawo.
4 INkhosi Nkulunkulu inginike lulwimi lwalabafundzile, kute ngikwati kukhuluma livi ngesikhatsi kini, Awu yindlu yaka-Israyeli. Uma senikhatsele ivuka kusa ngekusa. Ivusa indlebe yami kutsi ngive njengalabafundzile.
5 INkhosi Nkulunkulu iyivulile indlebe yami, futsi angitange ngihlubuke, noma ngibuke emuva.
6 Nganika umhlane wami kumshayi, kanye netihlatsi tami kulabo labebahlutfula tinwele. Angibusitselisanga buso bami ehlazweni kanye nasekukhafulelweni ngematse.
7 Ngoba iNkhosi Nkulunkulu itawungisita, ngako-ke angeke ngitfotjiswe. Ngako-ke ngibumisile buso bami njengelitje lelicine kakhulu, futsi ngiyati kutsi angeke ngijabhe.
8 Futsi iNkhosi isedvute, futsi iyawungitfola ngingenacala. Ngubani lotawumelana nami na? Asime ndzawonye. Ngubani lositsa sami na? Akasondzele edvute nami, futsi ngitawumshaya ngemandla emlomo wami.
9 Ngoba iNkhosi Nkulunkulu itawungisita. Nabo bonkhe labo labayawungilahla ngelicala, bukani, bonkhe bayawuguga njengengubo, futsi umvunya uyawubadla.
10 Ngubani emkhatsini wenu loyesabako iNkhosi, lolilalelako livi lenceku yayo, lohamba ebumnyameni futsi abete kukhanya na?
11 Bukani nine nonkhe leniphemba umlilo, lenitihaca ngetinhlasi, hambani ekukhanyeni kwemlilo wenu kanye nasetinhlasini leto lenitiphembile. Niyawutfola loku ngesandla sami—niyawulala phansi ngelusizi.