1 Emavi aJakobe, umnakaboNefi, lawakhuluma kubantfu baNefi:

2 Bukani, bomnaketfu labatsandzekako, mine, Jakobe, ngibitwe nguNkulunkulu, futsi ngigcotjwe ngendlela yeluhlelo lwakhe lolungcwele, futsi ngincweliswe ngumnaketfu Nefi, lenimbuka njengenkhosi noma umvikeli, futsi lenincike kuye kutsi aniphephise, bukani niyati kutsi ngikhulume kini tintfo letiningi kakhulu.

3 Noko, ngikhuluma kini futsi; ngoba nginesifiso senhlalakahle yemiphefumulo yenu. Yebo, inshisekelo yami yinkhulu ngani; futsi nani lucobo lwenu niyakwati kutsi seloku kwaba njalo. Ngoba nginincusile ngayo yonkhe inkhutsalo; futsi nginifundzisile emavi ababe; futsi ngikhulumile kini mayelana nato tonkhe tintfo letibhaliwe, kusukela ekudalweni kwemhlaba.

4 Manje, bukani, ngitokhuluma kini mayelana netintfo letikhona, naleto letitawukwenteka; ngaloko-ke ngitawunifundzela emavi a-Isaya. Futsi lawo ngemavi umnaketfu lafisa kutsi ngiwakhulume kini. Futsi ngiwakhuluma kini ngenca yenu, kute nifundze futsi nidvumise ligama laNkulunkulu wenu.

5 Manje, emavi lengitowafundza ngiwo lawo Isaya lawakhuluma mayelana nayo yonkhe indlu yaka-Israyeli; ngaloko-ke, ngiwabhekisa kini, ngoba nibendlu yaka-Israyeli. Futsi tiningi tintfo letakhulunywa ngu-Isaya letibhekiswe kini, ngenca yekutsi nibendlu yaka-Israyeli.

6 Manje, ngulawa lamavi: Naku lokushiwo yiNkhosi Nkulunkulu: Bukani, ngitawuphakamisa sandla sami kubo beTive, futsi ngimise sibonakaliso sami kubantfu; futsi bayawuletsa emadvodzana akho etandleni tabo, kanye nemadvodzakati akho bayawuwatjatsa emahlombe abo.

7 Futsi emakhosi ayawuba bobabe bakho labakondlako, nemakhosikati abo bomake bakho labakondlako; bayawukhotsamela buso babo bubheke phansi, futsi bakhotse lutfuli lwetinyawo takho; futsi uyawukwati kutsi ngiyiNkhosi; ngoba abanawujabha labo labangilindzako.

8 Futsi manje mine, Jakobe, ngitokhuluma mayelana naloko lokuphatselene nalamavi. Ngoba bukani, iNkhosi ingikhombisile kutsi labo labebaseJerusalema, lapho saphuma khona, babulewe futsi batfwalwa batfunjwa.

9 Noko, iNkhosi ingikhombisile kutsi bayophindze babuye futsi. Futsi ngetulu kwaloko ingikhombisile kutsi iNkhosi Nkulunkulu, loNgcwele waka-Israyeli, itotibonakalisa kubo isenyameni; futsi emvakwekutsi itibonakalisile bayoyibhacabula futsi bayibetsele, njengekwemavi engilosi leyawakhuluma kimi.

10 Futsi emvakwekutsi sebatente lukhuni tinhlitiyo tabo futsi baticinisa tinhloko tabo ngalokumelene naloNgcwele waka-Israyeli, bukani, tehlulelo taloNgcwele waka-Israyeli tiyawuta etikwabo. Futsi lusuku luyeta lapho bayawushaywa baphindze bahlushwe.

11 Ngaloko-ke, emvakwekutsi sebabalekisiwe bayiswa emuva naphambili, ngoba naku lokushiwo yingilosi, labaningi bayawuhlushwa enyameni, futsi abayukuyekelwa kutsi babhujiswe, ngenca yemithandazo yalabatsembekile; bayawuhlakatwa, futsi bashaywe, futsi batondvwe; noko iNkhosi itawuba nesihawu kubo, kutsi uma batfola lwati ngeMhlengi wabo, bayawuphindze bagcogcwe ndzawonye emaveni lalifa labo.

12 Futsi babusisiwe beTive, labo umphrofethi labhale ngabo; ngoba bukani, uma kungukutsi bayawuphendvuka futsi bangalwi neSiyoni, baphindze bangatihlanganisi nalelo bandla lelikhulu nalelinengekile, bayawusindziswa; ngoba iNkhosi Nkulunkulu itawutigcwalisa tivumelwano leyatenta kubantfwana bayo; futsi ngalesi sizatfu umphrofethi utibhalile leti tintfo.

13 Ngaloko-ke, labo labalwa neSiyoni kanye nebantfu besivumelwano beNkhosi bayawukhotsa lutfuli lwetinyawo tabo; futsi bantfu beNkhosi abayukuba nemahloni. Ngoba bantfu beNkhosi ngibo labo labayilindzako; ngoba basakulindzile kuta kwaMesiya.

14 Futsi bukani, ngekwemavi emphrofethi, Mesiya utawuphindze ativete ngekwakhe kwesibili kute ababuyise; ngaloko-ke, yena utawutiveta ngekwakhe kubo ngemandla kanye nangenkhatimulo lenkhulu, nasekubhujisweni kwetitsa tabo, uma lolosuku lufika lapho bayawukholwa kuye; futsi kute namunye letawumbhubhisa lokholwa kuye.

15 Futsi labo labangakholwa kuye bayawubhujiswa, ngemlilo, kanye nesivunguvungu, nangekutamatama kwemhlaba, nangekucitseka kwengati, nangesifo lesingumashayabhuce, kanye nangendlala. Futsi bayawukwati kutsi iNkhosi inguNkulunkulu, loNgcwele waka-Israyeli.

16 Ngoba kuya ngani imphango isuswe kubo labanemandla, noma labatfunjiwe ngekwemtsetfo bakhululwe?

17 Kodvwa naku lokushiwo yiNkhosi: Nalabatfunjwa balabo labanemandla bayawususwa, futsi imphango yalabo labesabekako iyawukhululwa; ngoba Nkulunkulu loneMandla uyawukhulula bantfu bakhe besivumelwano. Ngoba naku lokushiwo yiNkhosi: Ngitawuphikisana nabo labo labaphikisana nawe—

18 Futsi mine ngitawubadlisa labo labakucindzetelako, inyama yabo lucobo; futsi bayawudzakwa yingati yabo lucobo njengeliwayini lelinongotelako; futsi yonkhe inyama iyawukwati kutsi mine iNkhosi nginguMsindzisi wakho kanye neMhlengi wakho, loneMandla waJakobe.