Sehluko 12
Jesu ubita uphindze unika ligunya kubafundzi labalishumi nakubili—Wetfula inkhulumo kumaNefi lefanako neNshumayelo yaseNtsabeni—Ukhuluma ngeTibusiso—Timfundziso takhe tendlula futsi tibaluleke kakhulu kunemtsetfo waMosi—Bantfu bayaletwa kutsi baphelele njengoba Naye kanye naBabe Wakhe baphelele—Catsanisa naMatewu 5. Cishe ngemnyaka weNkhosi wa 34.
1 Futsi kwenteka kutsi emvakwekutsi Jesu sekawakhulumile lamavi kumaNefi, kanye nakulabo labebabitiwe, (manje sibalo salabo labebabitiwe, baphindze banikwe emandla neligunya lekubhabhatisa, bebalishumi nakubili) buka, welulela sandla sakhe esicukwini, wamemeta kuso, watsi: Nibusisiwe uma niyawuwalalela emavi alaba labalishumi nakubili lengibakhetsile emkhatsini wenu kutsi banifundzise, nekutsi babe tinceku tenu; futsi ngibanike emandla ekutsi babhabhatise ngemanti; emvakwekutsi senibhajatisiwe ngemanti, bukani, ngitawunibhabhatisa ngemlilo kanye nangaMoya loNgcwele; ngako-ke nibusisiwe uma niyawukholwa kimi niphindze nibhajatiswe, emvakwekutsi seningibonile phindze nati kutsi nginguye.
2 Ngetulu kwaloko, babusisiwe kakhulu labo labayawukholwa emavini enu ngoba niyawufakaza kutsi ningibonile, nekutsi niyati kutsi nginguye. Yebo, babusisiwe labo labayawukholwa emavi enu, behlele phansi ekujuleni kwekutitfoba baphindze babhajatiswe, ngoba bayawuvakashelwa ngemlilo kanye nangaMoya loNgcwele, futsi batfole kutsetselelwa kwetono tabo.
3 Yebo, babusisiwe labamphofu emoyeni labeta kimi, ngoba umbuso welizulu wabo.
4 Ngetuku kwaloko, babusisiwe bonkhe labo labakhalako, ngoba bayawudvudvutwa.
5 Babusisiwe labamnene, ngoba bayawudla lifa lemhlaba.
6 Babusisiwe bonkhe labo labalambele futsi bomele kulunga, ngoba bayawugcwaliswa ngaMoya loNgcwele.
7 Babusisiwe labanesihawu, ngoba bayawutfola kuhawukelwa.
8 Babusisiwe bonkhe labahlantekile enhlitiyweni, ngoba bayawumbona Nkulunkulu.
9 Babusisiwe bonkhe labalamulako, ngoba bayawubitwa ngekutsi babantfwana baNkulunkulu.
10 Babusisiwe bonkhe labo labahlushwa ngenca yelibito lami, ngoba umbuso welizulu wabo.
11 Futsi nibusisiwe uma bantfu bayawunetfuka baphidze banihluphe, basho yonkhe inhlobo yebubi lengemanga ngani, ngenca yami;
12 Ngoba niyawuba nenjabulo lenkhulu futsi nitfokote kakhulu, ngoba uyawuba mkhulu umvuzo wenu ezulwini; ngoba babahlupha kanjalo baphrofethi labanendvulela.
13 Ngicinisile, ngicinisile, ngitsi kini, ngininika kutsi nibe luswayi lwemhlaba; kodvwa uma luswayi luphelelwa bunandzi balo umhlaba uyawutselwa ngaluphi luswayi na? Lolo swayi lusuke ngaleso sikhatsi selungenamsebenti walutfo, kodvwa kutsi lulahlwe ngephandle lunyatselwe ngaphansi kwetinyawo tebantfu.
14 Ngicinisile, ngicinisile, ngitsi kini, ngininika kutsi nibe kukhanya kwalabantfu. Lidolobha lelakhiwe entsabeni angeke lisitseke.
15 Bukani, ngabe bantfu bayasikhanyisa yini sibane bese basibeka ngaphansi kwesitja na? Cha, kodvwa elutsini lwesibane, bese sikhanyisela bonkhe labasendlini;
16 Ngako-ke kukhanya kwenu akukhanye phambi kwalabantfu, kute babone imisebenti yenu lemihle futsi badvumise Babe losezulwini.
17 Ningacabangi kutsi ngitele kutawucitsa umtsetfo noma baphrofethi. Angiketeli kutawucitsa kodvwa kutawugcwalisa.
18 Ngoba ngicinisile ngitsi kini, kute liganyana linye nelichashatana linye lelisusiwe emtsetfweni, kodvwa kimi konkhe kugcwalisekile.
19 Bukani, ngininike umtsetfo kanye nemiyaleto yaBabe, kutsi nikholwe kimi, nekutsi niphendvuke etonweni tenu, nite kimi ngenhlitiyo ledzabukile nemoya lotfobekile. Bukani, ninemiyaleto ngaphambi kwenu, futsi nemtsetfo ugcwalisekile.
20 Ngako-ke wotani kimi futsi nisindziswe; ngoba ngicinisile ngitsi kini, ngaphandle kwekutsi nigcine imiyaleto yami, lenginiyalete ngayo ngalesi sikhatsi, angeke ningene embusweni welizulu.
21 Nivile kutsi kushiwo kubakadzeni, futsi ngetulu kwaloko kubhaliwe phambi kwenu, kutsi ungabulali, ngoba loyo lobulalako uyawuba sengotini yekwehlulelwa nguNkulunkulu;
22 Kodvwa ngitsi kini, loyo lotfukutselela umnakabo uyawuba sengotini yekwehlulelwa nguye. Futsi loyo loyawutsi kumnakabo, Silima, uyawuba sengotini emtsetfweni; naloyo loyawutsi, Wena siwula, uyawuba sengotini yemlilo wesihogo.
23 Ngako-ke, uma uyawukuta kimi, noma uyawufisa kuta kimi, futsi ukhumbule kutsi umnakenu unalokutsite ngawe—
24 Hamba uye kumnakenu, ucale ubuyisane nemnakenu, bese uta kimi ngenhloso lephelele yenhlitiyo, ngitawukwemukela.
25 Buyisana nesitsa sakho ngekushesha ngesikhatsi usendleleni naso, hleze nangasiphi sikhatsi sikutfole, bese uphonswa ejele.
26 Ngicinisile, ngicinisile, ngitsi kuwe, angeke uphume lapho ungakakhiphi isenine yekugcina ngci. Futsi ngesikhatsi usejele ungayikhipha yini isenine leyodvwa na? Ngicinisile, ngicinisile, ngitsi kuwe, Cha.
27 Bukani, kubhaliwe ngulabo betikhatsi takadzeni, kutsi ungaphingi;
28 Kodvwa mine ngitsi kini, loyo lobuka wesifazane, bese uyamkhanuka, sewuvele uphingile enhlitiyweni yakhe.
29 Bukani, ngininika umyaleto, wekutsi ningavumeli nayinye yaleti tintfo kutsi ingene inhlitiyweni yenu;
30 Ngoba kuncono kutsi ungativumeli letintfo, ngaloko utawutfwala siphambano sakho, kunekutsi uphonswe esihogweni.
31 Kubhaliwe, kutsi loyo loyawulahla umkakhe, akamnike incwadzi yesehlukaniso.
32 Ngicinisile, ngicinisile, ngitsi kini, loyo loyawulahla umkakhe, ngaphandle kwebugwadla, umenta kutsi aphinge; naloyo loyawutsatsa loyo lolahliwe uyaphinga.
33 Ngetulu kwaloko kubhaliwe kutsi, ungawafungeli emanga, kodvwa yenta tifungo takho eNkhosini;
34 Kodvwa ngicinisile, ngicinisile, ngitsi kini, ningafungi sanhlobo; noma ngelizulu, ngoba lisihlalo sebukhosi saNkulunkulu;
35 Noma ngemhlaba, ngoba usenabelo setinyawo takhe;
36 Noma ufunge ngenhloko yakho, ngoba angeke ugucule nalunye lunwele lube mnyama noma lube mhlophe;
37 Kodvwa ekukhulumisaneni kwenu nibotsi Yebo, yebo; Cha, cha; ngoba noma yini lendlula loku yimbi.
38 Bukani, kubhaliwe kutsi, liso ngeliso, litinyo ngelitinyo;
39 Kodvwa mine ngitsi, ningamelani nalokubi, kodvwa loyo lokumukula esihlatsini sangesekudla, mnike nalesi lesinye futsi;
40 Futsi noma ngabe ngubani lokumangalela emtsetfweni atsatse libhantji lakho, mnike nelijazi lakho futsi;
41 Futsi loyo loyawukuphocelela kutsi uhambe likhilomitha, hamba naye abe mabili.
42 Mnike loyo locela lutfo kuwe, naloyo loboleka kuwe ungamtsalaliseli.
43 Bukani kubhaliwe futsi, kutsi ubotsandza makhelwane wakho utondze sitsa sakho;
44 Kodvwa bukani, mine ngitsi kini, tsandzani titsa tenu, nibabusise labo labanicalekisako, nente lokuhle kulabo labanitondzako, nibathandazele labo labanisebentisa ngalokungakalungi kanye nalabo labanihluphako;
45 Kute nibe bantfwana baBabe losezulwini, ngoba yena wenta lilanga lakhe kutsi liphume kulababi nalabahle.
46 Ngako-ke leto tintfo letatisesikhatsini sakadzeni, letatingephansi kwemtsetfo, kimi tonkhe tigcwalisekile.
47 Tintfo takadzeni tiyekeliwe, tonkhe tintfo setinsha.
48 Ngako-ke ngifuna kutsi nani niphelele njengami, noma njengoba Babe losezulwini aphelele.