Sehluko 13
Jesu ufundzisa emaNefi uMthandazo weNkhosi—Kufanele babeke emagugu abo ezulwini—Bafundzi labalishumi nakubili ebufundisini babo bayaletwa kutsi bangacabangi ngetintfo letitidzingo tesikhashana—Catsanisa naMatewu 6. Cishe ngemnyaka weNkhosi wa 34.
1 Ngicinisile, ngicinisile ngitsi ngifisa kutsi nentele labamphofu tento temusa; kodvwa ngicinisile kutsi anitenti tento tenu temusa ngaphambi kwebantfu kute nibukwe ngibo; ngaphandle kwaloko aninamvuzo kuBabe losezulwini.
2 Ngako-ke, nawupha lutfo kumuntfu loweswele ungamemeteli, njengoba kwenta batentisi emasinagogeni kanye nasetitaladini, khona batawudvunyiswa bantfu. Ngicinisile ngitsi kini, sebawemukele umvuzo wabo.
3 Kodvwa uma wena upha tipho sandla sakho sangesencele asingakwati lesikwentako sangesekudla.
4 Kute tipho takho tibe sekusitsekeni; khona uyihlo lobona ekusitsekeni, utakunika umvuzo ngalokusobala.
5 Uma uthandaza ungenti njengebatentisi, ngoba bona bayakutsandza kuthandaza, beme emasinagogeni kanye nasemajikeni etitaladi, kute babonwe bantfu, Ngicinisile ngitsi kini, sebavele bawutfolile umvuzo wabo.
6 Kodvwa wena, uma uthandaza, ngena endlini yakho, futsi uma sewuwuvalile umnyango, thandaza kuBabe losekusitsekeni; futsi Babe, lobona ekusitsekeni, uyawukunika umvuzo ngalokusobala.
7 Kodvwa uma nithandaza, ningalibali kusho emagama lamanyenti langasho lutfo, njengebetive, ngoba bona bacabanga kutsi bayawuvakala ngekukhuluma kwabo lokunyenti.
8 Ngako-ke ningafani nabo, ngoba Babe utati kucala tintfo lenitidzingako ngaphambi kwekutsi niticele kuye.
9 Ngako-ke kufanele kutsi nithandaze ngalendlela: Babe wetfu losezulwini, alingcweliswe libito lakho.
10 Intsandvo yakho ayentiwe emhlabeni njengoba yentiwa ezulwini.
11 Usitsetselele tono tetfu, njengoba natsi sibatsetselela labasonako.
12 Ungasingenisi ekulingweni, kodvwa usisindzise kulokubi.
13 Ngoba umbuso ngewakho, nemandla, nebukhosi, kute kube phakadze. Amen.
14 Ngoba, uma nibatsetselela bantfu tono tabo Babe losezulwini naye uyawunitsetselela nani;
15 Kodvwa uma ningabatsetseleli bantfu tiphambuko tabo naBabe angeke anitsetselele tono tenu.
16 Ngetulu kwaloko, uma nizila kudla ningabi njengebatentisi, lababa nebuso lobulusizi, ngoba bona banyukubalisa buso babo kute babonakale kubantfu kutsi bazile kudla. Ngicinisile ngitsi kini, sebawemukele wabo umvuzo.
17 Kodvwa wena, uma uzila kudla, gcobisa inhloko yakho, futsi ugeze nebuso bakho;
18 Kute ungabonakali kubantfu kutsi uzile kudla, kodvwa kuBabe losekusitsekeni; futsi Babe, lobona ekusitsekeni, utakunika umvuzo ngalokusobala.
19 Ningatibekeli umcebo wenu lapha emhlabeni, lapho umvunya kanye nekutfomba kungawudla, nalapho emasela agcekeza khona futsi awebe;
20 Kodvwa tibekeleni umcebo wenu ezulwini, lapho umvunya nekutfomba kungenakona khona, futsi lapho emasela angenakugcekeza khona noma ebe.
21 Ngoba lapho kukhona umcebo wakho khona, nenhlitiyo yakho itawuba khona.
22 Sibane semtimba liso; ngako-ke uma, liso lakho liphilile, umtimba wakho wonkhe uyawugcwala kukhanya.
23 Kodvwa uma liso lakho lilibi, umtimba wakho wonkhe uyawugcwala bumnyama. Ngako-ke, uma, loko kukhanya lokukuwe kubumnyama, bukhulu kanganani lobo bumnyama!
24 Kute umuntfu longakhonta emakhosi lamabili; ngoba kusemkhatsini wekutsi uyawuyizonda lenye atsandze lenye, noma uyawubambelela kulenye ayidzelele lenye. Angeke ukhonte Nkulunkulu kanye nemcebo.
25 Manje kwenteka kutsi ngesikhatsi Jesu sekawakhulumile lamavi wabuka kulabalishumi nakubili labo labekabakhetsile, watsi kubo: Khumbulani emavi lengiwakhulumile. Ngoba bukani, ningulabo lengibakhetsile kutsi bafundzise laba bantfu. Ngako-ke ngitsi kini, ningacabangi ngemphilo yenu, kutsi nitawudlani, nitawunatsani; noma nangemitimba yenu, kutsi nitawukwembatsani. Ngabe imphilo ayikabaluleki yini kunenyama, kanye nemtimba kunetembatfo na?
26 Bukani tinyoni temoya, ngoba tona atihlanyeli, futsi ativuni noma atigcogceli etilulwini; kodvwa Babe loseZulwini uyatondla. Ngabe nine anincono yini kakhulu kunato na?
27 Ngumuphi kini lokungatsi ngekucabanga nje angete budze bengalo leyodvwa?
28 Kungani nikhatsateka ngetimphahla na? Bukani timbali temhlaba kutsi tikhula njani; atikhandleki, futsi atitfungi;
29 Kodvwa ngitsi kini, ngisho naSolomoni, kubo bonkhe bukhosi bakhe, bekangakambatsi ngisho njengayinye yato.
30 Ngako-ke, uma Nkulunkulu abembatsisa kanjena tjani basendle, lobukhona namuhla, bese kutsi ngakusasa bushe, ngisho nani niyawukwembatsiswa kanje, uma ningasibo belukholo loluncane.
31 Ngako-ke ningakhatsateki, nitsi, Sitawudlani? noma, Sitawunatsani? noma, Sitawukwembatsani na?
32 Ngoba Babe losezulwini uyati kutsi niyatidzinga tonkhe letintfo.
33 Kepha funani kucala umbuso waNkulunkulu kanye nekulunga kwakhe, khona tonkhe letintfo titawukwengetelwa kini.
34 Ngako-ke ningakhatsateki ngelikusasa, ngoba likusasa liyawutikhatsalela ngetintfo talo. Tinkhatsato telusuku tenele lona.