1 Futsi kwenteka kutsi ngasekupheleni kwemnyaka welishumi nesiphohlongo lawo mabutfo etigebengu besekayilungiselele imphi, acala kwehla futsi aphuma emagcumeni, kanye nasetintsabeni, nasehlane, nasetincabeni tawo leticinile, kanye nasetindzaweni tawo letifihlekile, acala kutitsatsela tindzawo taba ngetawo, lebetiseveni leliseningizimu kanye naleto lebetiseveni lelisenyakatfo, futsi acala kutitsatsela emave onkhe aba ngewabo labekashiywe ngemaNefi, kanye nemadolobha labekashiywe ete bantfu.

2 Kodvwa buka, bekute tilwane tasendle netinyamatane kulawo mave labekashiywe ngemaNefi, futsi bekute tinyamatane tetigebengu ngaphandle kwasehlane.

3 Tigebengu betingeke tiphile ngaphandle kwekutsi tibe sehlane, ngenca yekweswela kudla; ngoba emaNefi bekashiye tindzawo tawo tite lutfo, agcogca imihlambi yetimvu tawo kanye nemihlambi yetinkhomo tawo kanye nako konkhe labekanako, futsi aba licembu linye.

4 Ngako-ke, bekute litfuba lekutsi tigebengu tiphange futsi titfole kudla, ngaphandle kwekutsi tiphumele ebaleni tilwe nemaNefi; futsi ngenca yekutsi emaNefi bekalicembu linye, aphindze asibalo lesikhulu kakhulu, atibekele imiphako, emahhashi netinkhomo, kanye nemihlambi letinhlobonhlobo, kute akwati kuphila sikhatsi lesingangeminyaka lesikhombisa, ngaleso sikhatsi bekanelitsemba lekutsi ayawube sekatibulele taphela tigebengu eveni lonkhe; wendlula kanjalo-ke umnyaka welishumi nemfica.

5 Futsi kwenteka kutsi ngemnyaka welishumi nemfica Gidiyani watfola kutsi bekufanele kutsi akhuphuke ayawukulwa nemaNefi, ngoba bekute indlela yekutsi baphile ngaphandle kwekutsi baphange, bebe futsi babulale.

6 Bebangeke balokotse bagcwale eveni lonkhe kute bakwati kuhlanyela lokuyinhlavu, hleze emaNefi ete kuto futsi ababulale; ngako-ke Gidiyani waniketa umyaleto emabutfweni akhe wekutsi ngaloyo mnyaka bekufanele bakhuphuke bayawukulwa nemaNefi.

7 Futsi kwenteka kutsi bakhuphuka bayawukulwa; futsi kwakuyinyanga yesitfupha; buka, lwalulukhulu luphindze lwesabeka lolo suku lebeta ngalo kutawukulwa; futsi bebagcoke ngendlela yetigebengu; banesikhumba semvu lebesitungelete tinkhalo tabo, batihuce ngengati, tinhloko tabo tihhuliwe, babeke tivikelo tenhloko kubo; kubukeka kwemabutfo aGidiyani bekwesabeka kakhulu, ngenca yetivikelo tabo, nangenca yekutihuca kwabo ngengati.

8 Futsi kwenteka kutsi emabutfo emaNefi, ngesikhatsi abona kubukeka kwelibutfo la Gidiyani, awela phansi onkhe, akhala eNkhosini Nkulunkulu wawo, kutsi ibaphephise futsi ibakhulule etandleni tetitsa tawo.

9 Futsi kwenteka kutsi ngesikhatsi emabutfo aGidiyani akubona loku acala kumemeta ngelivi lelikhulu, ngenca yenjabulo yawo, ngoba bekacabanga kutsi emaNefi bekawiswe kwesaba ngenca yekwesaba emabutfo awo.

10 Kodvwa advumala ngaloku, ngoba emaNefi bekangawesabi; kepha bekesaba Nkulunkulu wawo futsi amncusa kutsi awavikele; ngako-ke, ngesikhatsi emabutfo aGidiyani agijima aya kubo bese atilungiselele kuhlangabetana nawo; yebo, ngemandla eNkhosi bawemukela.

11 Imphi yacala kulenyanga yesitfupha; kulwa kwaba kukhulu kwaphindze kwaba kubi kakhulu, yebo, kwaba kukhulu futsi kwaba kubi kakhulu kubulawa kwebantfu kwalapho, kangangekutsi bekungakate kwatiwe nanini kubulawa kwebantfu lokukhulu kangaka emkhatsini wabo bonkhe labantfu baLehi seloku ashiya eJerusalema.

12 Nanoma Gidiyani bekente kusonga kanye nekufunga, buka, emaNefi abashaya, kangangekutsi bahlehlela emuva phambi kwawo.

13 Futsi kwenteka kutsi Gidigidoni wayala kutsi emabutfo akhe abalandzele ate ayewufika eminceleni yasehlane, futsi nekutsi angaphephisi namunye loyawuwela etandleni tawo kuleyondlela; futsi ngaleyondlela abalandzela ate ababulala, eminceleni yelihlane, ate awugcina nemyalo waGidigidoni.

14 Futsi kwenteka kutsi Gidiyani, lobekeme alwa ngesibindzi, walandzelwa ngesikhatsi abaleka; ngenca yekukhatsala ngekulwa kwakhe lokukhulu wabanjwa wabulawa. Kwaphela kanjalo-ke ngaGidiyani sigebengu.

15 Futsi kwenteka kutsi emabutfo emaNefi aphindze abuyela endzaweni yawo yekuphepha. Futsi kwenteka kutsi lomnyaka welishumi nemfica wendlula, netigebengu atiphindzanga tabuya kutsi titawukulwa; atibuyanga nangemnyaka wemashumi lamabili.

16 Nangemnyaka wemashumi lamabili nakunye atibuyanga kutawukulwa, kodvwa tavimbetela tinhlangotsi tonkhe kute titungelete bantfu baNefi; ngoba beticabanga kutsi uma tingahle tivimbe bantfu baNefi emaveni abo, tibatungelete tinhlangotsi tonkhe, futsi uma betingabavimba kuyo yonkhe inzunzo yabo yangaphandle, loko bekungabenta kutsi batinikele njengetifiso tabo.

17 Manje bese batibekele lomunye umholi, libito lakhe bekunguZemnariha; ngako-ke bekunguZemnariha lowenta kutsi loku kuvinjetelwa kwenteke.

18 Kodvwa buka, loku kwaba lusito kumaNefi; ngoba bekulukhuni kutsi tigebengu tibavimbetele sikhatsi lesidze kute tiphumelele kumaNefi, ngenca yemphako lomningi labebawugcinile,

19 Futsi ngenca yekweswelakala kwemphako etigebengwini; ngoba buka, betingenalutfo ngaphandle nje kwenyama yekutsi titiphilise, leyo nyama letayitfola ehlane;

20 Futsi kwenteka kutsi tinyamatane tasendle tancipha ehlane kangangekutsi tigebengu taphose tabulawa yindlala.

21 EmaNefi bekahamba njalo emini kanye nasebusuku, atseleka emabutfweni, ababulala ngetinkhulungwane kanye nangemashumi latinkhulungwane.

22 Ngayolendlela kwaba sifiso sebantfu baZemnariha kutsi baliyekele lisu labo, ngenca yekubhujiswa lokukhulu lokwabehlela ebusuku nasemini.

23 Futsi kwenteka kutsi Zemnariha wanika umyalo kubantfu bakhe wekutsi bakuyekele kuvimbetela, bahambe baye etincenyeni letingephandle kakhulu telive lelingasenyakatfo.

24 Manje, Gidigidoni alati lisu labo, futsi ati ngebutsakatsaka babo ngenca yekufuna kudla, kanye nekubulawa lokukhulu lebekwentekile emkhatsini wabo, ngako-ke watfumela emabutfo akhe ngesikhatsi sasebusuku, futsi wayivala indlela yabo yekubaleka, wabeka emabutfo akhe endleleni yabo yekubaleka.

25 Loku emabutfo akwenta ngesikhatsi sasebusuku, futsi ahamba ayawuvimba ngaphambili kwaletigebengu, kwatsi ngakusasa, ngesikhatsi letigebengu ticala luhambo lwato, tahlangana nemabutfo emaNefi etindzaweni totimbili ngembili nangemuva.

26 Naleto tigebengu lebetiseningizimu nato ngalokunjalo tavinjelwa etindzaweni tato tekubaleka. Tonkhe letintfo tentiwa ngekuyalwa nguGidigidoni.

27 Kwaba khona tinkhulungwane letininingi letatinikela kutsi tibe tiboshwa temaNefi, kwatsi labasala kuto babulawa.

28 Umholi wato, Zemnariha, watsatfwa walengiswa esihlahleni, yebo, etulu kuso wate wafa. Emvakwekutsi sebamlengisile wate wafa basigawulela phansi sihlahla, babese bayakhala ngelivi lelikhulu, batsi:

29 Shengatsi iNkhosi ingabalondvolota bantfu bayo ekulungeni kanye nasebungcweleni benhlitiyo, kute bente kutsi babawise phansi bonkhe labo labayawufuna kubabulala ngenca yemandla kanye nemacembu layimfihlo, njengalendvodza lewiselwe phansi.

30 Batfokota futsi bakhala ngelivi linye, batsi: Shengatsi Nkulunkulu wa-Abrahama, Nkulunkulu wa-Isaka, kanye naNkulunkulu waJakobe, angabavikela labantfu bahlale ekulungeni, uma nje bayawubita libito laNkulunkulu wabo kutsi abavikele.

31 Futsi kwenteka kutsi bachumuka, bonkhe kanyekanye, bahlabelela, futsi badvumisa Nkulunkulu wawo ngentfo lenkhulu kangaka labentele yona, ekubalondvoloteni kutsi bangaweli etandleni tetitsa tabo.

32 Yebo, bakhala batsi: Hosana Nkulunkulu Longetulu Kwako Konkhe. Futsi bakhala batsi: Libusisiwe libito leNkhosi Nkulunkulu Somandla, Nkulunkulu Longetulu Kwako Konkhe.

33 Tinhlitiyo tabo takhukhumuka ngenca yenjabulo, kwate kwaba khona nekuphuma kwetinyembeti lokuningi, ngenca yebuhle lobukhulu baNkulunkulu ekubakhululeni etandleni tetitsa tabo; futsi bebati kutsi bekungenca yekuphendvuka kwabo kanye nekutitfoba kwabo lokwakwente kutsi bakhululwe ekubhujisweni kwaphakadze.