Sehluko 21
Israyeli uyawugcogcwa ngesikhatsi sekuvela iNcwadzi yaMormon—BeTive bayawumiswa njengebantfu labakhululekile eMelika—Bayawusindziswa uma bakholwa futsi balalela; kungenjalo, bayawususwa baphindze bashabalaliswe—Israyeli uyawukwakha iJerusalema leNsha, tive letilahlekile tiyawubuya. Cishe ngemnyaka weNkhosi wa 34.
1 Ngicinisile ngitsi kini, ngininika sibonakaliso, kute nisati sikhatsi lapho letintfo setiyawukwenteka—kutsi ngiyawubagcogca, ekuhlakatekeni kwabo kwesikhatsi lesidze, bantfu bami, Awu nine bendlu yaka-Israyeli, ngiyawuphindze ngisungule emkhatsini wabo iSiyoni yami;
2 Bukani, ngitawuninika loku njengesibonakaliso—ngoba ngicinisile ngitsi kini ngesikhatsi letintfo lengitisho kini, naleto lengitawutisho kini emvakwaloku, nangemandla aMoya loNgcwele loyawuniketwa kini nguBabe, tiyawukwembulelwa beTive kute bati mayelana nalabantfu labayinsali yendlu yaJakobe, mayelana nalabantfu bami labayawuhlakatwa ngibo;
3 Ngicinisile, ngicinisile, ngitsi kini, ngesikhatsi letintfo sebembulelwa tona nguBabe, tiyawube tivela kuBabe, tisuka kubo tita kini;
4 Ngoba kukuhlakanipha kwaBabe kutsi babekwe kulelive, bamiswe njengebantfu labakhululekile ngemandla aBabe, nekutsi letintfo tiphume kubo tiye kuyo insali yentalelwane yenu, kute sivumelwano saBabe sigcwaliseke lavumelana ngaso nebantfu bakhe, Awu nine bendlu yaka-Israyeli;
5 Ngako-ke, ngesikhatsi lemisebenti kanye nemisebenti leyawukwentiwa emkhatsini wenu emvakwaloku iyawuvela kubeTive, iya kuyo intalelwane yenu leyawuncishelwa lukholo ngenca yebubi;
6 Ngoba ngaleyondlela kusifiso saBabe kutsi ivele kubeTive, kute avete emandla akhe kubeTive, ngalesi sizatfu kutsi beTive, uma bangayutenta lukhuni tinhlitiyo tabo, kutsi baphendvuke bete kimi baphindze babhajatiswe egameni lami futsi bati ngemaphuzu laliciniso emfundziso yami, kute babalwe kanye nebantfu bami, Awu nine bendlu yaka-Israyeli;
7 Futsi ngesikhatsi letintfo tetenteka kutsi intalelwane yenu icale kutati letintfo—kuyawuba sibonakaliso kubo, kute bati kutsi umsebenti waBabe sewucalile ekugcwaliseni sivumelwano lasenta kubantfu lababendlu yaka-Israyeli.
8 Futsi ngesikhatsi lolo suku selufika, kuyawukwenteka kutsi emakhosi ayawuvala imilomo yawo; ngoba loko labangakate bakutjelwe bayawukubona; naloko labangakate bakuve bayawukucondza.
9 Ngoba ngalolo suku, ngenca yami Babe uyawusebenta umsebenti, loyawuba ngumsebenti lomkhulu kanye nalomangalisako emkhatsini wabo; futsi kuyawuba khona emkhatsini wabo labangeke bawakholwe, nanoma indvodza iyawumemetela kubo.
10 Kodvwa bukani, imphilo yenceku yami iyawuba sesandleni sami; ngako-ke angeke bayilimate, nanoma simo sayo siyawukonakala ngenca yabo. Noko ngiyawuyelapha, ngoba ngitawubakhombisa kutsi kuhlakanipha kwami kukhulu kunebucili badeveli.
11 Ngako-ke kuyawukwenteka kutsi loyo longeke akholwe emavini ami, lenginguJesu Khristu, Babe layawuyenta kutsi iwaletse kubeTive, futsi uyawuyinika emandla ekutsi iwaletse kubeTive, (kuyawukwenteka njengoba Mosi asho) bayawususwa emkhatsini webantfu bami lababesivumelwano.
12 Futsi bantfu bami labayinsali yakaJakobe bayawuba semkhatsini webeTive, yebo, emkhatsini wabo njengelibhubesi emkhatsini wetilwane tasehlatsini, nanjengeliwundlu lelibhubesi emkhatsini wemihlambi yetimvu, leli, lekutawutsi uma lidzabula emkhatsini wato litinyatsele phansi liphindze litidzabule tibe ticucu, kubebete namunye longatikhulula.
13 Sandla sabo siyawuphakanyiselwa etikwetitsa tabo, futsi tonkhe titsa tabo tiyawubulawa.
14 Yebo, maye kubo beTive ngaphandle kwekutsi baphendvuke; ngoba kuyawukwenteka ngalolo suku, kusho Babe, kutsi ngiyawuwasusa emahhashi akho emkhatsini wakho, futsi ngiyawutibhubhisa tincola takho;
15 Ngiyawuwasusa emadolobha elive lenu, futsi ngitiwise phansi tonkhe tincaba tenu;
16 Futsi ngiyawubucedza butsakatsi eveni lenu, ngeke nisaba netangoma nanini;
17 Titfombe tenu letibatiwe nato ngalokunjalo ngiyawutisusa, kanye netitfombe tenu letimile ngiyawutisusa emkhatsini wenu, ngeke nanini nisakhonta imisebenti yetandla tenu;
18 Ngiyawutidzephuna tonkhe tinsika tetihlahla tenu emkhatsini wenu; ngiyawubhubhisa kanjalo nemadolobha enu.
19 Futsi kuyawukwenteka kutsi onkhe emanga, inkhohliso, umona, imibango, nebuphristi-mbumbulu, kanye nebugwadla kuyawucedvwa.
20 Ngoba kuyawukwenteka, kusho Babe, kutsi ngalolo suku loyo longeke aphendvuke ete kuyo iNdvodzana yami leTsandzekako, ngiyawumsusa emkhatsini webantfu bami, Awu nine bendlu yaka-Israyeli;
21 Ngiyawukwenta kuphindzisela nelulaka kubo, njengasetikwemahedeni, njengaloko labangakate bakuve.
22 Kodvwa uma bayawuphendvuka baphindze balalele emavi ami, bangatenti lukhuni tinhlitiyo tabo, ngiyawusungula libandla lami emkhatsini wabo, bayawungena esivumelwaneni baphindze babalwe emkhatsini walensali yakaJakobe, lengiyinike lelive kutsi kube lifa layo.
23 Bayawusita bantfu bami, insali yakaJakobe, kanjalo nalabaningi bendlu yaka-Israyeli njengekuta kwabo, kute bakhe lidolobha, leliyawubitwa ngekutsi yiJerusalema leNsha.
24 Ngaleso sikhatsi bayawusita bantfu bami kute bagcogcwe, labahlakateke ebusweni bonkhe bemhlaba, bete eJerusalema LeNsha.
25 Ngaleso sikhatsi emandla asezulwini ayawukwehlela emkhatsini wabo; nami ngalokunjalo ngiyawube ngisekhatsi.
26 Ngaleso sikhatsi umsebenti waBabe uyawucala ngalolo suku, ngisho nangesikhatsi lapho lelivangeli liyawushunyayelwa emkhatsini wensali yalabantfu. Ngicinisile ngitsi kini, ngalolo suku umsebenti waBabe uyawucala emkhatsini wabo bonkhe bantfu bami labahlakatekile, yebo, ngisho netive letilahlekile, Babe latiholela khashane watikhipha eJerusalema.
27 Yebo, umsebenti uyawucala emkhatsini wabo bonkhe bantfu bami labahlakatekile, ngaBabe kulungiselela indlela labangeta ngayo kimi, kute bacele kuBabe egameni lami.
28 Yebo, ngaleso sikhatsi umsebenti uyawucala, naBabe asemkhatsini wato tonkhe tive alungisa indlela bantfu bakhe labangagcogcelwa ngayo ekhaya eveni lelilifa labo.
29 Bayawuphuma kuto tonkhe tive; abayukuhamba ngekushesha, noma bahambe ngekubaleka, ngoba ngiyawuhamba phambi kwabo, kusho Babe, futsi ngiyawuba ngasemvakwabo.