Sehluko 9
Ebumnyameni, livi laKhristu limemetela kubhujiswa kwebantfu labaningi kanye nemadolobha ngenca yebubi babo—Ngetulu kwaloko umemetela ngebuNkulunkulu Bakhe, watisa kutsi umtsetfo waMose sewugcwalisekile, futsi umema bantfu kutsi bete Kuye baphindze basindziswe. Cishe ngemnyaka weNkhosi wa 34.
1 Futsi kwenteka kutsi kwabakhona livi lelevakala kubo bonkhe labebahlala kulendzawo, kulo lonkhe live, limemeta litsi:
2 Maye, maye, maye kulaba bantfu; maye kulabahlala emhlabeni wonkhe ngaphandle kwekutsi baphendvuke; ngoba develi uyahleka, netingilosi takhe tiyatfokota, ngenca yekubulawa kwemadvodzana kanye nemadvodzakati lamahle ebantfu bami, futsi kungenca yebubi kanye netinengiso tabo kutsi bafile!
3 Buka, lelo dolobha lelikhulu iZarahemla ngilishise ngemlilo, kanye nalabahlala kulo.
4 Buka, lelo dolobha lelikhulu iMoroni ngilente kutsi licwile ekujuleni kwelwandle, kanye nalabahlala kulo kutsi bamite.
5 Buka, lelo dolobha lelikhulu iMoroniha ngilimbonye ngemhlabatsi, kanye nalabahlala kulo, kute ngifihle bubi kanye netinengiso tabo phambi kwebuso bami, kute ingati yebaphrofethi kanye neyalabangcwele ingabe iseta nanini kimi ngalokumelene nabo.
6 Buka, lidolobha laseGilgali ngilente kutsi licwile, kanye nalabahlala kulo kutsi bangcwatjwe ekujuleni kwemhlaba;
7 Yebo, nelidolobha lase-Oniha kanye nalabahlala kulo, lidolobha laseMokumu kanye nalabahlala kulo, lidolobha laseJerusalema kanye nalabahlala kulo; futsi ngente kutsi kuvele emanti esikhundleni sawo, kute ngifihle bubi kanye netinengiso tabo ngaphambi kwebuso bami, kute ingati yebaphrofethi kanye nalabangcwele ingabe iseta nanini kimi ngalokumelene nabo.
8 Futsi buka, lidolobha laseGadiyandi, nelidolobha laseGadiyomina, nelidolobha laJakobe, kanye nelidolobha laseGimigimino, onkhe lawa ngente kutsi acwile, ngenta emagcuma kanye netigodzi etindzaweni tawo; labahlala kuwo ngibangcwabe ekujuleni kwemhlaba, kute ngifihle bubi kanye netinengiso tabo ngaphambi kwebuso bami, kute ingati yebaphrofethi kanye neyalabangcwele ingabe iseta kimi nanini ngalokumelene nabo.
9 Buka, lelo dolobha lelikhulu iJakobugathi, lebelihlala bantfu benkhosi Jakobe, ngente kutsi lishiswe ngemlilo ngenca yetono tabo kanye nebubi babo, lobebungetulu kwabo bonkhe bubi bemhlaba wonkhe, ngenca yekubulala kwabo ngansense kanye nemacembu abo angansense; ngoba bekungibo labo labacedza kuthula kwebantfu bami kanye nembuso walelive; ngako-ke ngente kutsi bashiswe, kute ngibabulale ngaphambi kwebuso bami, kute ingati yebaphrofethi neyalabangcwele ingabe iseta kimi nanini ngalokumelene nabo.
10 Buka, lidolobha laLamani, nelidolobha laJoshi, nelidolobha laGadi, kanye nelidolobha laKhishkhumeni, ngente kutsi ashiswe ngemlilo, kanye nalabahlala kuwo, ngenca yebubi babo ekucosheni baphrofethi, kanye nekugcoba ngematje labo lengabatfumela kutsi bamemetele kubo ngalokumelene nebubi kanye netinengiso tabo.
11 Ngenca yekutsi babacosha bonkhe baphuma, bekute namunye emkhatsini wabo lobekalungile, ngiwehlisile umlilo futsi ngababulala, kute bubi kanye netinengiso tabo kufihleke phambi kwebuso bami, kute ingati yebaphrofethi kanye nalabangcwele lengabatfumela emkhatsini wabo ingabe isakhala kimi ivela emhlabatsini ngalokumelene nabo.
12 Kubhujiswa lokuningi nalokukhulu ngikwente kutsi kwehlele etikwalelive, kanye nasetikwalabantfu, ngenca yebubi kanye netinengiso tabo.
13 Awu nine nonkhe lenisindzisiwe ngenca yekutsi benilungile kakhulu kunabo, ningabuyela yini manje kimi, niphendvuke etonweni tenu, niphindze nigucuke, kute nginiphilise na?
14 Yebo, ngicinisile ngitsi kini, uma ningeta kimi niyawuba nekuphila lokuphakadze. Bukani, sandla sami semusa selulelwe kini, loyo loyawukuta, ngiyawumemukela; futsi babusisiwe labo labeta kimi.
15 Bukani, nginguJesu Khristu iNdvodzana yaNkulunkulu. Ngadala emazulu nemhlaba, kanye nato tonkhe tintfo letikuwo. BenginaBabe kusukela ekucaleni. NgikuBabe, naBabe ukimi; futsi ngami Babe ulidvumisile libito lakhe.
16 Ngeta kubami, kodvwa bami abangemukelanga. Futsi imibhalo lengcwele mayelana nekuta kwami igcwalisekile.
17 Ngebuningi balabo labangemukele, kubo ngibanikete kutsi babe ngemadvodzana aNkulunkulu; ngitawukwenta kanjalo nakulabo labayawukholwa egameni lami, ngoba buka, ngami kuhlengwa kuyeta, futsi kimi umtsetfo waMose ugcwalisekile.
18 Ngikukhanya nekuphila kwemhlaba. Ngingu-Alfa na-Omega, sicalo nesiphetfo.
19 Ningabe nisaletsa kimi nanini kucitfwa kwengati; yebo, imihlatjelo yenu kanye neminikelo yekushiswa iyawuyekelwa, ngoba angeke ngemukele lutfo lwemihlatjelo yenu kanye neminikelo yenu yekushiswa.
20 Niyawunikela umnikelo kimi wenhlitiyo ledzabukile kanye nemoya lotfobekile. Loyo lota kimi nenhlitiyo ledzabukile kanye nemoya lotfobekile, ngiyawumbhabhatisa ngemlilo kanye nangaMoya loNgcwele, njengemaLamani, ngenca yelukholo lwawo kimi ngesikhatsi sekuphendvuka kwawo, abhajatiswa ngemlilo kanye nangaMoya loNgcwele, kodvwa akakwatanga loko.
21 Bukani, ngite emhlabeni kute ngiletse kuhlenga emhlabeni, kute ngisindzise umhlaba esonweni.
22 Ngako-ke, loyo lophendvukako futsi ete kimi njengemntfwana lomncane, ngiyawumemukela, ngoba umbuso waNkulunkulu walabanjalo. Bukani, ngoba ngibeke phansi imphilo yami ngenca yalabanjalo, ngaphindze ngayitsatsa; ngako-ke phendvukani, nite kimi nine nonkhe emikhawulweni yemhlaba, futsi nisindziswe.