Sehluko 15
Jesu umemetela kutsi umtsetfo waMosi ugcwalisekile Kuye—EmaNefi anguletinye tetimvu lakhuluma ngato eJerusalema—Ngenca yebubi, bantfu beNkhosi labaseJerusalema abati ngetimvu letihlakatekile taka-Israyeli. Cishe ngemnyaka weNkhosi wa 34.
1 Manje kwenteka kutsi ngesikhatsi Jesu sekacedzile kukhuluma lenkhulumo waphonsa emehlo akhe esicukwini, futsi watsi kuso: Bukani, nitivile tintfo lengatifundzisa ngaphambi kwekutsi ngenyukele kuBabe; ngako-ke, loyo lowakhumbulako lamavi ami futsi awente, ngiyawumvusa ngelusuku lwekugcina.
2 Futsi kwenteka kutsi ngesikhatsi Jesu sekawashito lamavi wabona kutsi bekukhona labanye emkhatsini wabo labamangala, batibuta kutsi bekafuna benteni mayelana nemtsetfo waMosi; ngoba bebangawucondzi umbhalo lotsi tintfo letindzala bese tendlulile, nekutsi tonkhe tintfo bese titinsha.
3 Futsi watsi kubo: Ningamangali kutsi ngitsite kini tintfo letindzala setendlulile, nekutsi tonkhe tintfo setinsha.
4 Bukani, ngitsi kini umtsetfo sewugcwalisiwe lobewuniketwe Mosi.
5 Bukani, nginguye loyo lowaniketa umtsetfo, futsi nginguye loyo lowenta tivumelwano nebantfu bami baka-Israyeli; ngako-ke, umtsetfo kimi ugcwalisekile, ngoba ngite kutawugcwalisa umtsetfo; ngako-ke sewufike esiphetfweni.
6 Bukani, angiphikisani nebaphrofethi, ngoba njengoba lokuningi kungakagcwaliseki kimi, ngicinisile ngitsi kini, konkhe kuyawugcwaliseka.
7 Futsi ngenca yekutsi ngitsite kini tintfo letindzala setendlulile, angiphikisani naloko lokwakhulunywa mayelana netintfo letisetawukwenteka.
8 Ngoba bukani, sivumelwano lengasenta nebantfu bami asikagcwaliseki sonkhe; kodvwa umtsetfo lobewuniketwe Mosi sewunesiphetfo kimi.
9 Bukani, ngingumtsetfo, kanye nekukhanya. Bukani kimi, niphindze nibeketele kute kube sekugcineni, futsi niyawuphila; ngoba loyo loyawubeketela kute kube sekugcineni, ngiyomnika kuphila lokuphakadze.
10 Bukani, ngininike imiyaleto; ngako-ke gcinani imiyaleto yami. Futsi lona ngumtsetfo kanye nemfundziso yebaphrofethi, ngoba ngempela bafakaza ngami.
11 Manje kwenteka kutsi ngesikhatsi Jesu sekawakhulumile lamavi, watsi kulabo labalishumi nakubili labekabakhetsile:
12 Nibafundzi bami; futsi nikukhanya kulaba bantfu, labayinsali yendlu yaJosefa.
13 Bukani, leli live lelilifa lenu; futsi Babe uninike lona.
14 Futsi asikho nalesisodvwa sikhatsi lapho Babe anginika umyaleto wekutsi ngibatjele loku labomnakenu labaseJerusalema.
15 Futsi asikho nalesisodvwa sikhatsi lapho Babe anginika umyaleto wekutsi ngibatjele mayelana naletinye tive tendlu yaka-Israyeli, Babe latihola watikhipha kulelolive.
16 Wangiyaleta ngaloku kuphela Babe, kutsi ngibatjele kutsi;
17 Nginaletinye timvu letingasito talesi sibaya; futsi nato ngalokunjalo kufanele ngitihole, nato tiyawuliva livi lami; kuyawuba khona umhlambi munye, kanye nemelusi munye.
18 Manje, ngenca yekuba bonhloko lukhuni kanye nekungakholwa abalicondzanga livi lami; ngako-ke ngayaletwa nguBabe kutsi ngingabe ngisasho lutfo mayelana nalentfo kubo.
19 Kodvwa ngicinisile, ngitsi kini Babe ungiyaletile, futsi ngiyanitjela, kutsi nine nehlukaniswa nabo ngenca yebubi babo; ngako-ke kungenca yebubi babo kutsi bangati ngani.
20 Ngicinisile ngiyaphindza ngitsi kini letinye tive Babe watisusa kubo; futsi kungenca yebubi babo kutsi bangati ngato.
21 Ngicinisile ngitsi kini, ningibo labo lengatsi ngabo: Nginaletinye timvu letingasito talesi sibaya; nato kufanele ngitihole, nato tiyawuliva livi lami; futsi kuyawuba khona umhlambi munye, kanye nemelusi munye.
22 Abatange bangicondze, ngoba bebacabanga kutsi bekubeTive; ngoba bebangacondzi kutsi beTive bebayawuphendvuka ngekushumayela kwabo.
23 Abangicondzanga ngesikhatsi ngitsi tiyawuliva livi lami; futsi abacondzanga uma ngitsi beTive ngeke balive livi lami nangasiphi sikhatsi—nekutsi angiyukutibonakalisa kubo ngaphandle kwekutsi kube ngaMoya loNgcwele.
24 Kodvwa bukani, nine nilivile livi lami, naphindze nangibona; futsi nitimvu tami, nibalwa nalabo Babe langinike bona.