1 Manje buka, ngitawunikhombisa kutsi abatange bayibeke inkhosi kulelive; kodvwa ngawo lowo mnyaka, yebo, umnyaka wemashumi lamatsatfu, babulala esihlalweni sekwehlulela, yebo, bambulala umehluleli lomkhulu walelive.

2 Bantfu behlukana lomunye kulomunye; betehlukanisa lomunye kulomunye ngetive, wonkhe umuntfu ngekwemndeni wakhe nangekwetihlobo kanye nengekwebangani; futsi ngaleyondlela bawushabalalisa umbuso walelive.

3 Tonkhe tive tabeka sikhulu noma umholi wato; ngaleyondlela baba tive kanye nebaholi betive.

4 Manje buka, bekute muntfu emkhatsini wabo ngaphandle kwekutsi abe nemndeni lomkhulu netihlobo letiningi kanye nebangani; ngako-ke tive tabo taba tinkhulu kakhulu.

5 Manje konkhe loku kwenteka, bekusengakabi netimphi emkhatsini wabo; futsi bonkhe lobubi beta ebantfwini ngenca yekutsi batinikela emandleni aSathane.

6 Imitsetfo yembuso yashabalaliswa, ngenca yalelicembu leliyimfihlo lebangani kanye netihlobo talabo lababulala baphrofethi.

7 Badala kungevani lokukhulu kulelive, kangangekutsi incenye leningi yebantfu labalungile cishe yonkhe beseyigcwele bubi; yebo, bekukhona labambalwa kuphela bantfu labebalungile emkhatsini wabo.

8 Futsi ngaleyondlela iminyaka lesitfupha yayingakendluli kusukela incenye leningi yebantfu ikuyekela kulunga kwabo, njengenja ibuyela emahlanteni ayo, noma njengengulube ibhucuta eludzakeni lwayo.

9 Manje lelicembu leliyimfihlo, lelaliletse bubi lobungaka kubantfu, labutsana ndzawonye, labeka indvodza lelayibita ngaJakobe kutsi ibaphatse.

10 Futsi bayibita ngenkhosi yabo; ngako-ke yaba yinkhosi yalelicembu lelaligcwele bubi; futsi bekangumunye walabatiwako lowakhuluma ngekuphikisana nebaphrofethi labebafakaza ngaJesu.

11 Futsi kwenteka kutsi bebangakacini kangako ngekwesibalo njengetive tebantfu, labebahlangene ndzawonye ngaphandle nje kwekutsi baholi babo bamisa imitsetfo yabo, wonkhe muntfu ngekwesive sakhe; noko bebatitsa, nanoma bebangasibo bantfu labalungile, kodvwa bebahlangene ekutondzeni labo labebangene esivumelwaneni sekushabalalisa umbuso.

12 Ngako-ke, Jakobe sekabona kutsi titsa tabo tatitiningi kakhukhu kunabo, yena ayinkhosi yalelicembu, ngako-ke wayala bantfu bakhe kutsi babaleke baye encenyeni yelive lelikhashane ngasenyakatfo, lapho befike batakhele umbuso wabo khona, bate bahlangana nemahlubuka, (ngoba wabayenga ngekutsi bekutoba khona emahlubuka lamaningi) bate baba nemandla ngalokwanele kutsi bamelane netive tebantfu; futsi benta njalo.

13 Futsi luhambo lwabo lwalushesha kakhulu kangangekutsi alutange luvinjwe bate baphuma lapho bantfu bangakhona kufika khona. Waphela ngaleyondlela umnyaka wemashumi lamatsatfu; futsi kanjalo netindzaba tebantfu baNefi.

14 Futsi kwenteka kutsi ngemnyaka wemashumi lamatsatfu nakunye behlukana baba tive, wonkhe muntfu ngekwemndeni wakhe, tihlobo kanye nebangani; noko bebente sivumelwano sekutsi bebangeke balwe lomunye nalomunye; kodvwa bebangakahlangani ngekwemitsetfo yabo, kanye nangendlela yekubusa kwabo, ngoba yayimiswe ngekwetingcondvo talabo labebatikhulu kanye nebaholi babo. Kodvwa bamisa imitsetfo lecinile kutsi sivana sinye singeceli kulesinye, kangangekutsi ngelizinga lelitsite babanako kuthula eveni; noko, tinhlitiyo tabo tatigucukile tingekho eNkhosini Nkulunkulu wabo, futsi babagcoba ngematje baphrofethi baphindze babacosha babakhipha emkhatsini wabo.

15 Futsi kwenteka kutsi Nefi—sekavakashelwe tingilosi kanjalo nelivi leNkhosi, ngako-ke sekatibonile tingilosi, futsi angufakazi lowatibonela, anemandla labekaniketwe yena kutsi ati mayelana nebufundisi baKhristu, kanjalo angufakazi lowatibonela ekusukeni kwabo ngekushesha ekulungeni baye ebubini kanye nasetinengisweni tabo;

16 Ngako-ke, adzabukile ngenca yebulukhuni betinhlitiyo tabo kanye nebumphumphutse betingcondvo tabo—wahamba waya emkhatsini wabo ngawo lowo mnyaka, wacala kufakaza, ngesibindzi, kuphendvuka kanye nekutsetselelwa kwetono ngelukholo eNkhosini Jesu Khristu.

17 Wabafundzisa tintfo letiningi; futsi angeke tibhalwe tonkhe, incenye yato angeke yenele, ngako-ke atikabhalwa kulencwadzi. Futsi Nefi wafundzisa ngemandla nangeligunya lelikhulu.

18 Futsi kwenteka kutsi bantfu bamtfukutselela, ngoba bekanemandla lamakhulu kunabo, ngoba bekungenteki kutsi bangawakholwa emavi akhe, ngoba lwalulukhulu lukholo lwakhe eNkhosini Jesu Khristu kangangekutsi tingilosi tatimsita malanga onkhe.

19 Futsi egameni laJesu wabakhipha bodeveli kanye nemimoya lemibi; nemnakabo wamvusa ekufeni, emvakwekutsi agcotjwe ngematje weva buhlungu bekubulawa bantfu.

20 Futsi bantfu bakubona loku, baphindze bafakaza ngako, ngako bamtfukutselela ngenca yemandla akhe; ngetulu kwaloko wenta timangaliso letiningi, emehlweni ebantfu, egameni laJesu.

21 Futsi kwenteka kutsi umnyaka wemashumi lamatsatfu nakunye wendlula, kwaba khona labambalwa nje kuphela labaphendvukela eNkhosini; kodvwa ngebuningi balabo labaphendvuka bakhombisa ngekweliciniso kubantfu kutsi behlelwe ngemandla kanye naMoya waNkulunkulu, lowawukuJesu Khristu, labebakholelwa kuye.

22 Futsi liningi lalabo lokwakhishwa kubo bodeveli, belashwa ekuguleni kanye nasebutsakatsakeni babo, bamemetela kubantfu kutsi bentiwe nguMoya waNkulunkulu, base bayelapheka; ngetulu kwaloko bakhombisa tibonakaliso baphindze benta timangaliso emkhatsini webantfu.

23 Wendlula kanjalo-ke umnyaka wemashumi lamatsatfu nakubili. Futsi Nefi wakhala kubantfu ekucaleni kwemnyaka wemashumi lamatsatfu nakutsatfu; washumayela kubo kuphendvuka kanye nekutsetselelwa kwetono.

24 Manje ngifuna kutsi nikhumbule futsi, kutsi akutange kube khona namunye lowaletfwa ekuphendvukeni longatange abhajatiswe ngemanti.

25 Ngako-ke, emadvodza agcotjwa nguNefi kulobo bufundisi, kute kutsi bonkhe labo labebeta kuwo babhajatiswe ngemanti, futsi loku kube njengesibonakaliso sebufakazi kanye nebufakazi phambi kwaNkulunkulu, kanye nakubantfu, kutsi sebaphendvukile baphindze batfola kutsetselelwa kwetono tabo.

26 Futsi kwaba khona labaningi ekucaleni kwalowo mnyaka lababhajatiselwa ekuphendvukeni; ngaleyondlela incenye lenkhulu yemnyaka yaphela kanjalo-ke.