Sehluko 24
Sitfunywa seNkhosi sitawulungisa indlela yekuTa kwesiBili—Khrisru utawuhlala esihlalweni sekwehlulela—Israyeli uyaletwa kutsi akhokhe kwelishumi nekwemnikelo—Incwadzi yesikhumbuto iyagcinwa—Catsanisa naMalakhi 3. Cishe ngemnyaka weNkhosi wa 34.
1 Futsi kwenteka kutsi wabayaleta kutsi bawabhale lawo mavi Babe labekawanike Malakhi, labekatawubatjela wona, Futsi kwenteka kutsi emvakwekutsi sekabhaliwe wawachaza. Lawa ngemavi labatjela wona, atsi: Naku lokwashiwo nguBabe kuMalakhi—Bukani ngiyawutfumela sitfunywa sami, futsi siyawulungisa indlela embikwami, masinyane leNkhosi leniyifunako iyawukuta ethempelini layo, sitfunywa sesivumelwano lenitfokotako ngaso; bukani, siyawufika, kusho iNkhosi yemaBandla.
2 Kodvwa ngubani longamelana nelusuku lwekufika kwayo, futsi ngubani loyawukuma ngesikhatsi ichamuka na? Ngoba ifanana nemlilo wemcengi, nensipho yemgezi.
3 Iyawuhlala njengemcengi kanye nanjengemhlanti wesiliva; iyawuhlanta emadvodzana emaLevi, iwacenge njengeligolide nesiliva, kute anikele eNkhosini umnikelo ngekulunga.
4 Ngaleso sikhatsi umnikelo wakaJuda kanye newaseJerusalema uyawukwemukeleka eNkhosini, njengasemalangeni akadzeni, nanjengaseminyakeni yasemadvulo.
5 Futsi ngiyawusondzela kini kutakwehlulela; ngiyawuba ngufakazi losheshako ngimelane netangoma, netiphingi, nabofakazi bemanga, nalabo labadlela tisebenti emaholo ato, labo labacindzetela bafelokati netintsandzane, kanye nalabo labagcuzula sihambi, bangangesabi mine, kusho iNkhosi yemaBandla.
6 Ngoba ngiyiNkhosi, angigucuki; ngako-ke nine madvodzana aJakobe, anikabhujiswa.
7 Kusukela etinsukwini tabokhokho benu nisukile etimisweni tami, nangete natigcina. Buyelani kimi nami ngiyawubuyela kini, kusho iNkhosi yemaBandla. Kodvwa nitsi: Pho singabuyela kanjani?
8 Umuntfu angamebela yini Nkulunkulu? Noko niyangebela. Kodvwa nitsi: Sikwebela njani? Ngekwelishumi kanye nangekweminikelo.
9 Nicalekisiwe ngesicalekiso, ngoba ningebele, nonkhe nine sive.
10 Letsani konkhe kwelishumi endlini yengcebo, kute kutawubakhona kudla endlini yami; ningilinge manje ngaloku, kusho iNkhosi yemaBandla, nitawubona kutsi angeke yini nginivulele emafasitelo asezulwini, nginitfululele sibusiso kute kubete indzawo leyenele yekusigcina.
11 Ngiyawuvimba silwanyakatane ngenca yenu, futsi angeke sibhubhise titselo temhlabatsi wenu; noma umvini wenu uwise titselo tawo sikhatsi singakefiki emasimini, kusho iNkhosi yemaBandla.
12 Tonkhe tive tiyawutsi ningulababusisiwe, ngoba live lenu liyawuba live lelihle, kusho iNkhosi yemaBandla.
13 Emavi enu abenelulaka ngalokumelene nami, kusho iNkhosi, Noko nitsi: Sikhulumeni lokumelene nawe?
14 Nitsite: Akunamsebenti kukhonta Nkulunkulu, futsi sizuzani kutsi sitigcinile timiso takhe kanye nekutsi sihambe njengebantfu labalilako embikweNkhosi yemaBandla.
15 Nyalo sibita labatigabatisako sitsi bangulababusisiwe; yebo, benti balokubi bayaphumelela; yebo, labalinga Nkulunkulu bayaphunyula.
16 Nalabo labesaba iNkhosi bakhulumisana lomunye kulomunye, iNkhosi yalalela yeva; incwadzi yesikhumbuto yabhalwa embikwakhe macondzana nalabo labesaba iNkhosi, kanye nalabo bebahlonipha libito layo.
17 Futsi bayawuba bami, kusho iNkhosi yemaBandla, ngalolo suku uma sengigcogca ematje ami laligugu; ngiyawubaphephisa njengendvodza iphephisa indvodzana yayo leyisebentelako.
18 Ngaleso sikhatsi niyawubuya niphindze niwubone kahle umehluko emkhatsini walabalungile nalababi, emkhatsini waloyo lokhonta Nkulunkulu naloyo longamkhonti.