1 Manje bukani ngitsi kini, kufanele nihlolisise letintfo. Yebo, ngininika umyaleto wekutsi nihlolisise letintfo ngekukhutsala, ngoba makhulu emavi a-Isaya.

2 Ngoba ngempela wakhuluma ngalokuphatselene nato tonkhe letintfo mayelana nebantfu bami lokubendlu yaka-Israyeli; ngako-ke kufanele kutsi akhulume futsi kanjalo nakubeTive

3 Futsi tonkhe tintfo latikhuluma tenteka futsi tisatawukwenteka, nanjengekwemavi lawakhuluma.

4 Ngako-ke lalelani emavi ami; bhalani tintfo lenginitjele tona; futsi ngekwesikhatsi kanye nangekwentsandvo yaBabe tiyawumenyetelwa kubo beTive.

5 Futsi noma ngubani loyawuwalalela emavi ami aphendvuke aphindze abhajatiswe, nguye loyo loyawusindziswa. Hlolisisani emavi ebaphrofethi, ngoba baningi labafakaza ngaletintfo.

6 Manje kwenteka kutsi ngesikhatsi Jesu sekawashito lamavi waphindze watsi kubo, emvakwekutsi sekayichazile yonkhe imibhalo lengcwele lebebayitfolile, watsi kubo: Bukani, ngifuna kutsi nibhale leminye imibhalo lengcwele, leningakayibhali.

7 Futsi kwenteka kutsi watsi kuNefi: Letsa lapha lombhalo lowugcinile.

8 Futsi ngesikhatsi Nefi sekayiletsile imibhalo, wayendlala phambi kwakhe, wayibuka wase utsi:

9 Ngicinisile ngitsi kini, ngayaleta Samuweli, umLamani, inceku yami kutsi afakaze kulabantfu kutsi ngelusuku lapho Babe ayawudvumisa libito lakhe kimi kuyawuba khona labaningi labangcwele labayawuvuka ekufeni, futsi bayawuvela kulabaningi, baphindze babasebentele. Watsi kubo: Bekungenjalo na?

10 Bafundzi bakhe bamphendvula batsi: Yebo, Nkhosi, Samuweli waphrofetha njengekwemavi akho, futsi onkhe agcwaliseka.

11 Jesu watsi kubo; Pho kungani ningakayibhali lentfo, kutsi labangcwele labaningi ngempela bavuka bavela kulabaningi baphindze babasebentela na?

12 Futsi kwenteka kutsi Nefi wakhumbula kutsi lentfo ayikate ibhalwe.

13 Futsi kwenteka kutsi Jesu wayaleta kutsi ibhalwe; ngako-ke yabhalwa njengoba abeyaletile.

14 Manje kwenteka kutsi ngesikhatsi Jesu sekayichazile yonkhe imibhalo lengcwele, lebebayibhalile, wabayaleta kutsi batifundzise letintfo lebekatichazile kubo.