1 Manje buka, bekute namunye lophilako emkhatsini wabo bonkhe bantfu bemaNefi lebekawangabata ngisho nakancane emavi abo bonkhe baphrofethi labangcwele labebakhulumile; ngoba bebati kutsi bekufanele kutsi agcwaliseke.

2 Futsi bebati kutsi bekufanele kutsi Khristu sewufikile, ngenca yetibonakaliso letiningi lebetiniketiwe, ngekwemavi ebaphrofethi; nangenca yetintfo lebesetivele tentekile bebati kutsi bekufanele kutsi tonkhe tigcwaliseke njengoba bekukhulunyiwe

3 Ngako-ke atiyekela tonkhe tono tawo, kanye netinengiso tawo, nebugwadla bawo, bamsebentela Nkulunkulu ngako konkhe kukhutsala imini nebusuku.

4 Manje kwenteka kutsi ngesikhatsi sekatsetse tonkhe letigebengu taba tiboshwa, kangangekutsi kute namunye loweca kulebetingakabulawa, atiphonsa ejele tiboshwa tato, enta kutsi livi laNkulunkulu lishunyayelwe kuto; futsi ngebuningi baleto letaphendvuka etonweni tato taphidze tangena esivumelwaneni sekutsi betingeke tisaphindze tibulale betikhululwa.

5 Kodvwa liningi laleto lebetingangenanga esivumelwaneni, lebetisachubeka nekuba netimfihlo tekubulala etinhlitiyweni tato, yebo, liningi laleto lebetitfolakala tisongela bomnakabo betibekwa licala futsi tijeziswe ngekwemtsetfo.

6 Futsi ngaleyondlela awacedza onkhe lawo macembu ebubi, layimfihlo kanye nalatinengiso, lobekukhona kuwo bubi lobukhulu kakhulu, kanye nekubulala lokuningi kakhulu lobekwentiwa.

7 Waphela kanjalo-ke umnyaka wemashumi lababili nakubili, nemnyaka wemashumi lamabili nakutsatfu, nemnyaka wemashumi lamabili nakune, nemnyaka wemashumi lamabili nesihlanu; futsi yendlula kanjalo-ke iminyaka lengemashumi lamabili nesihlanu.

8 Futsi besekukhona tintfo letiningi lebesetentekile, emehlweni alabanye, letatingaba nguletinkhulu naletimangalisako; noko, angeke tibhalwe tonkhe kulencwadzi; yebo, lencwadzi angeke ikwati kucukatsa ngisho incenye yalokulikhulu yaloko lokwentiwa emkhatsini walabantfu labaningi kangaka esikhatsini lesingangeminyaka lengemashumi lamabili nesihlanu.

9 Kodvwa buka kukhona imibhalo lecuketse tonkhe tento talabantfu; futsi umlandvo lomfisha naloliciniso waniketwa nguNefi.

10 Ngako-ke ngente umbhalo wami waletintfo ngekwelombhalo waNefi, lowawucoshwe kubongcwengcwe labebabitwa ngekutsi bongcwengcwe baNefi.

11 Futsi buka, ngenta lombhalo kubongcwengcwe lengibente ngetami tandla lucobo.

12 Futsi buka, ngibitwa ngekutsi nginguMormon, ngibitwa ngelive laMormon, live Alima lamisa kulo libandla emkhatsini webantfu, yebo, libandla lekucala lelasungulwa emkhatsini wabo emvakwesiphambeko sabo.

13 Buka, ngingumfundzi waJesu Khristu, iNdvodzana yaNkulunkulu. Ngibitwe nguye kutsi ngimemetele livi lakhe emkhatsini webantfu bakhe, kute babe nekuphila lokuphakadze.

14 Futsi kudzingekile kutsi mine, ngekwentsandvo yaNkulunkulu, kute imithandazo yalabo lasebendlulile, labebangcwele, igcwaliseke ngekwelukholo, kumele ngente umbhalo waletintfo lesetentiwe—

15 Yebo, umbhalo lomncane waloko lokwenteka kusukela ngesikhatsi Lehi esuka eJerusalema, kwehle kute kufike kulesikhatsi samanje.

16 Ngako-ke ngenta umbhalo wami ngiwususela emilandvweni leyaniketwa ngulabo labebangaphambi kwami, kute kufike ekucaleni kwelusuku lwami.

17 Futsi emvakwaloko ngenta nembhalo wetintfo lengitibone ngewami emehlo.

18 Futsi ngiyati umbhalo lengiwentako ngumbhalo locondze ngco futsi loliciniso; noko kukhona tintfo letiningi, ngekwelulwimi lwetfu, lesingakhoni kutibhala.

19 Manje sengenta siphetfo senkhulumo yami, lokungeyami lucobo, futsi ngichubeka nekuniketa umlandvo wami ngetintfo letenteka ngaphambi kwami.

20 NginguMormon, ngisitukulwane lesimsulwa saLehi. Nginesizatfu sekudvumisa Nkulunkulu wami kanye neMsindzisi wami Jesu Khristu, kutsi wakhipha bobabe betfu eveni laseJerusalema, (futsi kute namunye lobekati ngaphandle kwakhe kanye nalabo labakhipha kulelo live) nekutsi unike mine nebantfu bakitsi lwati loluningi kangaka kute kusindziswe imiphefumulo yetfu.

21 Ngempela uyibusisile indlu yaJakobe, waba nemusa kuyo intalelwane yaJosefa.

22 Futsi nangabe bantfwana baLehi bayigcinile imiyaleto yakhe ubabusisile waphindze wabaphumelelisa njengekwelivi lakhe.

23 Yebo, ngempela insali yentalelwane yaJosefa uyawuphindze ayiholele ekuyatini iNkhosi Nkulunkulu wabo.

24 Futsi ngempela njengoba iNkhosi iphila, itawuyigcogca emagumbini lamane emhlaba yonkhe insali yentalelwane yaJakobe, lehlakatwe yakhishelwa ngaphandle emhlabeni wonkhe.

25 Futsi njengoba yente sivumelwano nayo yonkhe indlu yaJakobe, kanjalo nesivumelwano lavumelane ngaso nendlu yaJakobe siyawugcwaliseka ngesikhatsi sayo lesifanele, kute kubuyiselwe yonkhe indlu yaJakobe ekwatini ngesivumelwano lavumelene ngaso nabo.

26 Futsi emvakwaloko bayawumati uMhlengi wabo, longuJesu Khristu, iNdvodzana yaNkulunkulu; emvakwaloko bayawugcogcwa kuwo omane emagumbi emhlaba bayiswe emaveni abo, lapho bebahlakatwe kusuka khona; yebo, njengoba iNkhosi iphila kuyawuba njalo. Amen.