Sehluko 6
EmaNefi ayaphumelela—Kutikhukhumeta, kunotsa, kanye nekuhlukanisana ngekwetigaba kuyacala—LiBandla liyahlukana ngenca yekuphikisana—Sathane uholela bantfu ekutseni bavukelane ngalokusobala—Baphrofethi labaningi bamemetela kuphendvuka futsi bayabulawa—Babulali babo benta sigungu sekutsatsa umbuso. Cishe ngemnyaka weNkhosi wa 26 kuya kuwa 30.
1 Manje kwenteka kutsi bantfu bemaNefi bonkhe babuyela emaveni abo ngemnyaka wemashumi lamabili nesitfupha, wonkhe umuntfu, nemndeni wakhe, umhlambi wetimvu takhe nemhlambi wetinkhomo takhe, emahhashi akhe netinkhomo takhe, kanye nanoma yini lokunye lebekungekwabo.
2 Futsi kwenteka kutsi bebangakayidli yonkhe imiphako yabo; ngako-ke bayitsatsa yonkhe labebangakayidli, konkhe lokuyinhlavu kwabo kwalo lonkhe luhlobo, neligolide labo, nesiliva yabo, kanye nato tonkhe tintfo tabo letiligugu, babuyela emaveni abo nato tonkhe tintfo lebebanato, enyakatfo naseningizimu, eveni lelingasenyakatfo kanye naseveni lelingaseningizimu.
3 Banika leto tigebengu lebetingene esivumelwaneni sekutsi tigcine kuthula kwelive, leto lebetitsandza kutsi tisale tingemaLamani, emave, ngekwesibalo sawo, kute tikwati kutsi ngekusebenta kwato, tibe nako lebetingaphila ngako; futsi ngaleyondlela tikwati kutsi ticinisekise kuthula eveni.
4 Bacala futsi baphumelela baphindze bakhula kakhulu; iminyaka lengemashumi lamabili nesitfupha kanjalo neyesikhombisa yendlula, kwaba khona kuthula lokukhulu eveni; futsi bate benta imitsetfo yabo yahambisana nekulingana kanye nekulunga.
5 Manje besekute lutfo kulo lonkhe live lebekuvimbela bantfu ekutseni baphumelele njalo, ngaphandle kwekutsi bawele esiphambekweni.
6 BekunguGidigidoni, kanye nemehluleli, Lakhoniyasi, kanye nalabo labebabaholi labebakhetsiwe, labebacinisekise lokuthula lokukhulu eveni.
7 Futsi kwenteka kutsi kwaba khona emadolobha lamaningi lakhiwa kabusha, futsi kwaba khona lamaningi emadolobha lamadzala lalungiswa.
8 Kwaba khona leminingi imigwaco lemikhulu leyakhiwa, kanye naleminingi imigwaco leyakhiwa, lebeyisuka edolobheni iya kulelinye lidolobha, isuka eveni iya kulelinye live, isuka endzaweni iya kulenye indzawo.
9 Wendlula kanjalo-ke umnyaka wemashumi lamabili nesiphohlongo, bantfu bebasolo banekuthula njalo.
10 Kodvwa kwenteka kutsi ngemnyaka wemashumi lamabili nemfica kwacala kwaba khona imibango letsite emkhatsini webantfu; futsi labanye bebaphakeme kangangoba baba nekutikhukhumeta kanye nekutichayisa ngenca yemcebo wabo lomkhulu, yebo, kangangoba kwaba khona kuhluphana lokukhulu;
11 Ngoba bekukhona batsengisi labaningi eveni, kanjalo nebameli labaningi, kanye nalabebasetikhundleni labaningi.
12 Bantfu bacala kutsi behlukaniswe ngekwetigaba tabo, ngekunotsa kwabo kanye nangematfuba abo ekufundza; yebo, labanye bebete lwati ngenca yebuphuya babo, futsi labanye bakwati kufundza kakhulu ngenca yemcebo wabo.
13 Labanye bebaphakeme kangangoba bebatikhukhumeta, labanye bebatitfobile kakhulu; labanye babuyisela inhlamba ngenhlamba, ngesikhatsi labanye bakwemukela kwetfukwa nekuhlushwa kanye nato tonkhe tinhlobo tetinhlupheko, bangaphindziseli ngekwetfuka, kodvwa batfobile futsi badzabukile phambi kwaNkulunkulu.
14 Futsi ngaleyondlela kwaba khona kungalingani lokukhulu kulo lonkhe live, kangangekutsi libandla lacala kwehlukana; yebo, kangangekutsi ngemnyaka wemashumi lamatsatfu libandla lehlukana kulo lonkhe live ngephandle kwelidlanzana nje lemaLamani lebeliphendvukele elukholweni lweliciniso; futsi wona akatange akhweshe kulo, ngoba wona bekacinile, asimile, anganyakatiseki, afuna ngekukhutsala kwawo konkhe kugcina imiyaleto yeNkhosi.
15 Manje sizatfu salobo bubi bebantfu bekungulesi—Sathane bekanemandla lamakhulu, ekuphehleni bantfu kutsi bente tonkhe tinhlobo tebubi, futsi abakhukhumukisa ngekutichenya, abalinga kutsi bafune emandla, neligunya, nemcebo, kanye netintfo letilite temhlaba.
16 Ngaleyondlela Sathane waholela tinhlitiyo tebantfu ekutseni bente tonkhe tinhlobo tebubi; ngako-ke bajabulela kuthula iminyaka lembalwa kuphela.
17 Ngaleyondlela, ekucaleni kwemnyaka wemashumi lamatsatfu—bantfu sebatinikele sikhatsi lesidze kutsi bazulazuliswe tilingo tadeveli abayise noma ngukuphi lapho labetsandza kutsi abayise khona, nekutsi abentise noma ngabe ngubuphi bubi labekatsandza kutsi babente—futsi ngaleyondlela ekucaleni kwawo, lomnyaka wemashumi lamatsatfu, bese basesimeni sebubi lobukhulu.
18 Manje bebangoni ngekungati, ngoba bebayati intsandvo yaNkulunkulu mayelana nabo, ngoba beyifundzisiwe kubo; ngako-ke bamhlubuka Nkulunkulu ngekutsandza kwabo.
19 Manje besekungusetinsukwini taLakhoniyasi, indvodzana yaLakhoniyasi, ngoba Lakhoniyasi wasitsatsa sihlalo seyise futsi wababusa bantfu ngalowo mnyaka.
20 Ngaleso sikhatsi kwacala kutsi kube khona bantfu labaholwa ngumoya lovela ezulwini futsi labebatfunyiwe, bema emkhatsini webantfu kulo lonkhe live, bashumayela futsi bafakaza ngesibindzi ngetono kanye nangebubi bebantfu, bafakaza kubo mayelana nekuhlengwa iNkhosi lebeyiyawukwentela bantfu bayo, noma ngalamanye emavi, kuvuka kwaKhristu; bafakaza ngesibindzi ngekufa kanye nangekuva kwayo buhlungu.
21 Manje bekukhona labaningi bantfu labebatfukutsele kakhulu ngenca yalabo labebafakaza ngaletintfo; labo labebatfukutsele imvamisa bekubehluleli labakhulu, nalabo labebabaphristi labakhulu kanye nebameli; yebo, bonkhe labo labebabameli babatfukutselela labo labebafakaza ngaletintfo.
22 Manje bekute ummeli nemehluleli nemphristi lomkhulu lobekangaba nemandla ekubeka noma ngubani licala lekutsi abulawe ngaphandle kwekutsi kubekwa kwabo licala kuvunyelwe ngumbusi welive.
23 Manje bebabaningi labebafakaza ngetintfo letiphatselene naKhristu bafakaza ngesibindzi, labatsatfwa babulawa behluleli ngansense, kute lwati ngekufa kwabo lungafinyeleli kumbusi welive kute kube semvakwekufa kwabo.
24 Manje buka, loku bekuphikisana nemitsetfo yelive, kutsi nanoma ngumuphi umuntfu abulawe ngaphandle kwekutsi kutfolwe imvume kumbusi welive—
25 Ngako-ke sikhalo savela eveni laseZarahemla, saletfwa kumbusi welive, ngalokumelene nalabo behluleli labebabeke baphrofethi beNkhosi licala lekutsi bafe, ngalokungekho emtsetfweni.
26 Manje kwenteka kutsi batsatfwa baletfwa ngaphambi kwemehluleli, kute behlulelwe ngalawo macala labebawentile, ngekwemtsetfo lobewubekwe bantfu.
27 Manje kwenteka kutsi labo behluleli bebanebangani kanye netihlobo letiningi; futsi kwatsi labo labebasele, yebo, cishe bonkhe bameli kanye nebaphristi labakhulu, babutsana ndzawonye, bahlangana netihlobo talabo behluleli labebatogwetjwa emacala ngekwemtsetfo.
28 Bangena esivumelwaneni lomunye nalomunye, yebo, ngisho nakuleso sivumelwano lebesiniketwe ngulabo basendvulo, leso sivumelwano lesaniketwa futsi salawulwa ngudeveli, kutsi simelane nako konkhe kulunga.
29 Ngako-ke bahlangana ngalokumelene nebantfu beNkhosi, bangena esivumelwaneni sekubabulala, kanye nekukhulula labo labebanelicala lekubulala ekutseni babanjwe sijeziso, lebesitokhishwa ngekwemtsetfo.
30 Bawedzelela umtsetfo kanye nemalungelo elive labo; bangena esivumelwaneni lomunye nalomunye sekutsi bambulale umbusi, futsi babeke inkhosi eveni, kute live lingabe lisaba nenkhululeko kodvwa libe ngaphansi kwemakhosi.