INcwadzi yaMormon
Sehluko 1
Amaroni uyala Mormon mayelana nemibhalo lengcwele—Imphi iyacala emkhatsini wemaNefi nemaLamani—EmaNefi lamatsatfu ayatsatfwa—Bubi, kungakholwa, kulumba, nebutsakatsi kuyandza. Cishe ngemnyaka weNkhosi wa 321 kuya kuwa 326.
1 Manje mine, Mormon, sengenta umbhalo wetintfo lengitibonile nalengitivile, ngiwubita ngeNcwadzi yaMormon.
2 Cishe ngesikhatsi Amaroni asafihle imibhalo eNkhosini, weta kimi, (ngineminyaka lecishe ibe lishumi budzala, ngacala kufundzisa ngandlela tsite ngendlela yekufundza kwebantfu bakitsi) Amaroni watsi kimi: Ngiyabona kutsi ungumntfwana lonesizotsa, futsi uyashesha kubona;
3 Ngako-ke, uma sewuneminyaka lecishe ibe ngemashumi lamabili nakune budzala ngifuna kutsi utikhumbule letintfo lowutibonile mayelana nalabantfu; futsi uma sewunaleyo minyaka uhambe uye eveni i-Anthumu, egcumeni leliyawubitwa ngekutsi yiShimu; ngulapho langibeke khona eNkhosini yonkhe imicopho lengcwele lemayelana nalabantfu
4 Buka, uyawutsatsa labongcwengcwe baNefi babe kuwe, bese kutsi labasalako uyawubashiya kuleyondzawo labakuyo; uyawucopha kulabongcwengcwe baNefi tonkhe tintfo lowutibonile mayelana nalabantfu.
5 Mine, Mormon, nginguwentalelwane yaNefi, (libito lababe bekunguMormon) ngatikhumbula leto tintfo Amaroni abengiyalete ngato.
6 Futsi kwenteka kutsi, sengineminyaka lelishumi nakunye budzala, ngatsatfwa ngubabe wangiyisa eveni lelingaseningizimu, eveni laseZarahemla.
7 Lonkhe lelive beseligcwele takhiwo, nebantfu besebabaningi, bangangesihlabatsi saselwandle.
8 Futsi kwenteka kutsi ngalona mnyaka kwacala kwaba khona imphi emkhatsini wemaNefi, labekafaka ekhatsi emaNefi, nemaJakobe, nemaJosefa kanye nemaZoramu; lemphi yayisemkhatsini wemaNefi, kanye nemaLamani, nemaLemuweli nema-Ishmayeli.
9 Manje emaLamani nemaLemuweli kanye nema-Ishmayeli bebabitwa ngekutsi maLamani, futsi lamacembu lamabili bekungemaNefi kanye nemaLamani.
10 Futsi kwenteka kutsi lemphi yacala kuba emkhatsini wabo eminceleni yaseZarahemla, ngasemantini aseSidoni.
11 Futsi kwenteka kutsi emaNefi bekabutsele ndzawonye sibalo lesikhulu semadvodza, lesasendlula sibalo lesingangetinkhulungwane letingemashumi lamatsatfu. Futsi kwenteka kutsi aba netimphi letiningi ngalowo mnyaka, lapho emaNefi ancoba khona emaLamani aphindze abulala labaningi bawo.
12 Futsi kwenteka kutsi emaLamani alihocisa lisu lawo, kwaba khona kuthula eveni; kuthula kwaba khona sikhatsi lesingangeminyaka lemine, kangangekutsi akubanga khona kucitseka kwengati.
13 Kodvwa bubi bandza eveni lonkhe, kangangekutsi iNkhosi yabatsatsa bafundzi bayo labatsandzekako, nemsebenti wetimangaliso newekwelapha waphela ngenca yebubi bebantfu.
14 Kwababete tipho letivela eNkhosini, naMoya loNgcwele akatange aseta kunoma ngubani, ngenca yebubi kanye nekungakholwa kwabo.
15 Mine, sengineminyaka lelishumi nesihlanu budzala ngandlela tsite nginesizotsa, ngako-ke ngavakashelwa yiNkhosi, ngeva futsi ngabati buhle baJesu.
16 Ngetama kushumayela kulabantfu, kodvwa umlomo wami wavalwa, ngalelwa kutsi ngibashumayele; ngoba buka besebamhlamukile Nkulunkulu wabo ngemabomu; nebafundzi labatsandzekako batsatfwa bakhishwa eveni, ngenca yebubi babo.
17 Ngahlala emkhatsini wabo, kodvwa ngalelwa kutsi ngibashumayele, ngenca yebulukhuni betinhlitiyo tabo; futsi ngenca yebulukhuni betinhlitiyo tabo lelive lacalekiswa ngenca yabo.
18 Futsi letigebengu taGadiyanthoni, lebetisemkhatsini wemaLamani, tagcwala lelive, kangangekutsi labebahlala kulo bacala kufihla emagugu abo ngephansi kwemhlaba; futsi anyibilika, ngenca yekutsi iNkhosi beyilicalekisile lelive, kute bangakhoni kuwabamba, noma bawagcine futsi.
19 Futsi kwenteka kutsi kwaba khona balumbi, nebatsakatsi, kanye nemilingo; nemandla alomubi asebenta eveni lonkhe, ate agcwaliseka onkhe emavi a-Abinadi, kanjalo ne-aSamuweli umLamani.