1 Futsi kwenteka kutsi ngesikhatsi Khoriyanthuma asaluleme emancebeni akhe, wacala wawakhumbula emavi Etheri labekawakhulume kuye.

2 Wabona kutsi besekuvele kubulewe ngenkembe cishe tigidzi letimbili tebantfu bakhe, wacala waba nelusizi enhlitiyweni yakhe; yebo besekubulewe tigidzi letimbili temadvodza lanemandla, kanjalo nebafati babo kanye nebantfwana babo.

3 Wacala kuphendvuka ebubini lebekabentile; wacala wawakhumbula lawo mavi labekakhulunywe ngemlomo wabo bonkhe baphrofethi, futsi wabona kutsi besekagcwaliseka kute kube manje, onkhe ngisho nalokuncane kanganani, futsi umphefumulo wakhe wakhala wala kudvudvuteka.

4 Futsi kwenteka kutsi wabhalela Shizi incwadzi, amcela kutsi asindzise bantfu, nekutsi bekatawunikela umbuso kuye ngenca yetimphilo tebantfu.

5 Futsi kwenteka kutsi ngesikhatsi Shizi asayitfolile lencwadzi yakhe wabhalela Khoriyanthuma incwadzi, watsi uma atawutinikela yena, kute ambulale ngenkemba yakhe lucobo, bekatawutisindzisa timphilo tebantfu.

6 Futsi kwenteka kutsi bantfu abaphendvukanga ebubini babo, bantfu baKhoriyanthuma baphehlelwa ekutfukutseleleni bantfu baShizi, kani nebantfu baShizi baphehlelwa ekutfukutseleleni bantfu baKhoriyanthuma; ngaloko-ke, bantfu baShizi balwa nebantfu baKhoriyanthuma.

7 Futsi ngesikhatsi Khoriyanthuma asabona kutsi besekatawukufa waphindze wababalekela bantfu baShizi.

8 Futsi kwenteka kutsi waya emantini aseRipliyankhumu, lokutsi, nakuhunyushwa, kusho lamakhulu, noma lokwendlula konkhe; ngaloko-ke, ngesikhatsi befika kulamanti bemisa emathende abo; naShizi ngalokunjalo wemisa akhe emathende dvute nabo; ngako-ke ngakusasa balwa futsi.

9 Futsi kwenteka kutsi balwa imphi lematima kakhulu, kuyo Khoriyanthuma waphindze walimala, waculeka ngenca yekulahlekelwa yingati.

10 Futsi kwenteka kutsi emabutfo aKhoriyanthuma awacindzetela emabutfo aShizi kangangekutsi awehlula, abenta kutsi bababalekele; babalekela ngaseningizimu, bamisa emathende abo endzaweni lebeyibitwa ngekutsi yi-Ogathi.

11 Futsi kwenteka kutsi libutfo laKhoriyanthuma lemisa emathende alo ngasegcumeni iRama; futsi kwakungilo kanye lelo gcuma lapho babe Mormon afihla khona imibhalo eNkhosini, leyayingcwele.

12 Futsi kwenteka kutsi babutsela ndzawonye bonkhe bantfu kulo lonkhe live, labebangakabulawa, ngaphandle kwa-Etheri.

13 Futsi kwenteka kutsi Etheri watibona tonkhe tento tebantfu, wabona kutsi labo bantfu labebavumelana naKhoriyanthuma bebabutsene ndzawonye ebutfweni laKhoriyanthuma, nebantfu labebavumelana naShizi bebabutsene ndzawonye ebutfweni laShizi.

14 Ngaloko-ke, sikhatsi lesingangeminyaka lemine bebabutsela ndzawonye bantfu, kute batfole bonkhe labebaseveni, nekutsi batfole onkhe emandla lokwakungenteka kutsi bawatfole.

15 Futsi kwenteka kutsi ngesikhatsi bonkhe sebabutsene ndzawonye, wonkhe muntfu kulelo butfo bekatsandza kuba kulo, nebafati babo kanye nebantfwana babo—emadvodza, besifazane kanye nebantfwana bahlonyiswe ngetikhali temphi, banetihlangu, netivikelo tesifuba, kanye netivikelo tenhloko, bagcokiswe ngendlela yemphi—bahamba nguloyo abhekene nalomunye kute balwe; futsi balwa lilanga lonkhe, kodvwa abancobanga.

16 Futsi kwenteka kutsi ngesikhatsi sekungubusuku besebakhatsele, baphumula etinkanjini tabo; futsi emvakwekutsi sebaphumulile etinkanjini tabo bacala kuhhewula kanye nekulila ngenca yekulahlekelwa bantfu babo labebabulewe, futsi kwaba kukhulu kukhala kwabo, kuhhewula kwabo kanye nekulila kwabo, kangangekutsi bawudzabula kakhulu umoya.

17 Futsi kwenteka kutsi ngakusasa baphindze bayawukulwa, lwaba lukhulu lwaphindze lwaba lubi lolo suku; noko, abancobanga, futsi uma busuku buphindze bufika badzabula umoya ngekukhala kwabo, nekuhhewula kwabo, kanye nangesililo sabo, ngenca yekulahlekelwa bantfu babo labebabulewe.

18 Futsi kwenteka kutsi Khoriyanthuma waphindze wabhalela Shizi incwadzi, amcela kutsi angasaphindzi atawukulwa, kodvwa kutsi atsatse umbuso, asindzise timphilo tebantfu.

19 Kodvwa buka, Moya weNkhosi besewuyekelile kuhlala kubo, Sathane besekanemandla onkhe etinhlitiyweni tebantfu; ngoba besebatinikele ekwenteni lukhuni tinhlitiyo tabo, kanye nasekuphumphutsekeni kwetingcondvo tabo kute babhujiswe; ngaloko-ke baphindze bahamba bayawukulwa.

20 Futsi kwenteka kutsi balwa lilanga lonkhe, futsi ngesikhatsi kufika busuku balala etikwetinkemba tabo.

21 Ngakusasa balwa kwate kwafika busuku.

22 Ngesikhatsi kufika busuku besebadzakiwe yintfukutselo, njengemuntfu lodzakwe liwayini; baphindze balala etikwetinkemba tabo.

23 Ngakusasa baphindze balwa; futsi ngesikhatsi kufika busuku bonkhe bese bafe ngenkemba ngaphandle kwalabangemashumi lasihlanu nakubili bebantfu baKhoriyanthuma, kanye nalabangemashumi lasitfupha nemfica bebantfu baShizi.

24 Futsi kwenteka kutsi balala etikwetinkemba tabo ngalobu busuku, ngakusasa baphindze balwa, balwa ngemandla abo onkhe ngetinkemba tabo kanye nengetihlangu tabo, lonkhe lelo langa.

25 Ngesikhatsi kufika busuku besekusele emashumi lamatsatfu nakubili ebantfu baShizi, kanye nemashumi lamabili nesikhombisa ebantfu baKhoriyanthuma.

26 Futsi kwenteka kutsi badla base bayalala, batilungiselela kufa ngakusasa. Futsi bebangemadvodza lamakhulu nalanemandla ngekwemandla ebantfu.

27 Futsi kwenteka kutsi balwa sikhatsi lesingangemahora lamatsatfu, baculeka ngenca yekulahlekelwa yingati.

28 Futsi kwenteka kutsi ngesikhatsi bantfu baKhoriyanthuma sebatfole emandla lenele ekutsi bangahamba, bese batawubaleka kute basindzise timphilo tabo; kodvwa, Shizi waphakama, kanye nebantfu bakhe, wafunga ngentfukutselo yakhe kutsi utawumbulala Khoriyanthuma noma yena abhubhe ngenkemba,

29 Ngaloko-ke, wabalandzela, ngakusasa wabakhandza; baphindze balwa ngenkemba. Futsi kwenteka kutsi ngesikhatsi bonkhe sebafile ngenkemba, ngaphandle kwaKhoriyanthuma naShizi, buka Shizi besekaculekile ngenca yekulahlekelwa yingati.

30 Futsi kwenteka kutsi ngesikhatsi Khoriyanthuma sekeyame enkembeni yakhe, kute aphumule kancane, wayishaya wayisusa inhloko yaShizi.

31 Futsi kwenteka kutsi emvakwekutsi sekayishaye wayisusa inhloko yaShizi, Shizi wasukuma wabambelela ngetandla takhe waphindze wawa; emvakwaloko walwela kutfola umphefumulo, wafa.

32 Futsi kwenteka kutsi Khoriyanthuma wawela phansi, kwaba shengatsi sewute imphilo.

33 Futsi iNkhosi yakhuluma ku-Etheri, yatsi kuye: Hamba. Wahamba, wabona kutsi emavi onkhe eNkhosi besekagcwaliseka; wase ucedzela umbhalo wakhe; (incenye lencane angitange ngiyibhale) wawufihla ngendlela yekutsi bantfu baLimhayi bawutfola.

34 Manje emavi ekugcina labhalwa ngu-Etheri ngulawa: Noma ngabe iNkhosi ifuna kutsi ngitsatfwe, noma kutsi ngibeketelele intsandvo yeNkhosi enyameni, akunandzaba, nangabe nje ngisindzisiwe embusweni waNkulunkulu, Amen.